ދިވެހި ޕްރިމިއާ ލީގުގައި މުޅިން އަލަށް ވާދަކުރާ ގދ. ގައްދޫ ޓީމު ގޮވައިގެން، އެ ޓީމުގެ ކޯޗު މުހައްމަަދު ނަޒީހުގެ ޓާގެޓެއްގެ ގޮތުގައި އެ ޓީމު ލީގުގައި ބޭއްވުމަށް އަމާޒު ހިފައިފި އެވެ.
ދިހަ ޓީމު ވާދަކުރާ ދިވެހި ޕްރިމިއާ ލީގުގެ ސީޒަނުގައި މި ފަހަރު ދެ ރަށެއްގެ ޓީމު ވާދަކުރެ އެވެ. އެއީ، ސައުތު ރީޖަން ލީގުގެ ޗެމްޕިއަން، ގައްދޫގެ އިތުރުން ނޯތު ރީޖަން ލީގުގެ ޗެމްޕިއަން، ހއ. ދިއްދޫ އެވެ. މި ދެ ޓީމުގެ ހޯމް މެޗުތައް އެ ރަށުގައި ކުޅޭއިރު، ގައްދޫން ފުރަތަމަ މެޗުގައި މާދަމާ ހަވީރު އަމިއްލަ ރަށުގައި ނުކުންނާނީ، ރާއްޖޭގެ އެންމެ ކާމިޔާބު ކްލަބް ނިއު ރޭޑިއަންޓް ސްޕޯޓްސް ކްލަބާ ދެކޮޅަށެވެ.
މެޗުގެ ކުރިން ބޭއްވި ވީޑިއޯ ކޮންފަރެންސް ނޫސްވެރިންގެ ބައްދަލުވުމުގައި ނަޒީހު ބުނީ، ނިއު ރޭޑިއަންޓާއި ގައްދޫ މި ބައްދަލުުކުރަނީ ވަރަށް ތާރީހީ މެޗެއް ކަމަށެވެ. ފުރަތަމަ ފަަހަރަށް ދިވެހި ޕްރިމިއާ ލީގުގެ މެޗެއް މާލޭން ބޭރުގައި ކުޅޭއިރު އެ މެޗު ގައްދޫގައި ނިއުއާ ދެކޮޅަށް ކުޅޭތީ އެވެ.
ނަޒީހު ބުނީ، މި ތާރީހީ މެޗު އެ ގޮތަށް ދެމެހެއްޓޭތޯ މަސައްކަތްކުރާއިރު އަމާޒަކީ ބައިވަރު ގޯލުތަކެއް ގައްދޫ ކޮޅަށް ނުވަދެ، މި ޓީމުގެ މެނޭޖްމަންޓާއި ރަށުގެ ރައްޔިތުން ވެސް އުންމީދުނުކުރާ ވަރުގެ ނަތީޖާއެއް ނެރެގެން މީހުންގެ މޫނުމަތިން ހިނިތުންވުން ގެނެވޭތޯ މަސައްކަތްކޮށްދިނުން ކަމަށެވެ.
"(މިދިޔަ ސީޒަނުގައި ދިވެހި ޕްރިމިއާ ލީގުގެ) ކޮލިފައިން އަށް ގޮސްފައި، އަޅުގަނޑުމެން ކޮޅަށް ހަ ގޯލު ޖެހީމަ ވަރަށް ގިނަ މީހުން ދެން ނިންމި މިކަން މި ނިމުނީއޭ. އަޅުގަނޑު ދިޔައީ އެއްގޮތަކަށް ވެސް އެކަން ނިންމާލާކަށެއް ނޫން. މި ފަހަރު ވެސް އުންމީދަކީ، ގައްދޫ ޓީމު ގޮވައިގެން ނުވެއްޓި، ޕްރިމިއާ ލީގުން ނުވެއްޓި އަންނަ ސީޒަނާ ހަމައަށް ދިއުން. އެއީ، އަޅުގަނޑުގެ އުންމީދު، އަޅުގަނޑު އެއްގޮތަކަށް ވެސް އޮޅުވައެއް ނުލަން އަޅުގަނޑުމެންގެ ޓާގެޓެއް،" ފުރަތަމަ ޑިިވިޝަންގެ ގިނަ ކްލަބްތަކެއްގެ ކޯޗަކަށް މަސައްކަތްކޮށްފައިވާ ނަޒީހު ބުންޏެވެ.
ދިވެހި ޕްރިމިއާ ލީގުގެ ފޯމެޓް އޮތްގޮތުން، 10 ޓީމު ކުޅެގެން އެންމެ ފުލަށް ދާ ދެ ޓީމެއް ރެލިގޭޓްވާނެ އެވެ. އަދި، ހަތް ވަނަ އާއި އަށް ވަނަ އަށް ދާ ޓީމު، ދިވެހި ޕްރިމިއާ ލީގުގެ ކޮލިފިކޭޝަނުގައި ކުޅެން ޖެހޭނެ އެވެ.
ނަޒީހު ބުނީ، ގައްދޫގެ ޓާގެޓަކީ ޕްރިމިއާ ލީގު ހޯދުމޭ ބުނުމަކީ ރަނގަޅު ކަމަކަށް ވެސް ނުވާނެ ކަމަށެވެ.
މި އުޅެނީ ޕްރިމިއާ ލީގު ހޯދާށޭ ބުނެފިއްޔާ އެއީ ވަރަށް އެހެން ކަހަލަ ވާހަކަ އަކަށް ވާނީ، ސަބަަބަކީ އެ ވަރުގެ ކުުޅުންތެރިންނާއި އެ ވަރުގެ މެނޭޖްމަންޓަކާއި އެ ވަރަށް ފައިސާއެއް ނެތް. މިސާލަކަށް ނިއު ރޭޑިއަންޓްގައި އެބަހުރި 350،000 ރުފިޔާ ދޭ ކުޅުންތެރިއެއް. އަޅުގަނޑުމެންގެ މުޅި ސްކޮޑުގެ އަގު ވެސް ނާރާ ގާތްގަނޑަކަށް އެ ވަރަށް. އެހެންވެއްޖިއްޔާ މި ޑިފަރެންސް އެއީ ވަރަށް ހިއުޖް ޑިފަރެންސެއް (ފަަރަގެއް)،"
ނަޒީހު ބުނީ، ނިއު އާއި ގައްދޫ އަކީ މުޅިން ދެ ލެވަލެއްގެ ދެ ޓީމު ކަމަށެވެ. އެއީ، ތިބި ކުޅުންތެރިންގެ ފެންވަރާއި އެހެނިހެން ކަންކަމަށް ބެލިޔަސް ފެންނަން އޮތް ހަގީގަތްކަން ނަޒީހު ފާހަގަކުރި އެވެ. ކުޅުމުގެ ކެރިއަރުގައި ނިއު އާއި ވިކްޓަރީއާ ގުޅުން އޮތުމުން އެ ދެ ޓީމު އަބަދުވެސް ހާއްސަވާނެކަން ފާހަގަކޮށް ނަޒީހު ބުނީ، އެ ދެ ޓީމު މިހާރު އޮތް ލެވަލަށް ބަލާއިރު، ޕޮއިންޓެއް ލިބުނަސް އެއީ ހިތްހަމަޖެހުމެއް ކަމަށެވެ.
"ރާއްޖޭގައި އޮތް އެންމެ ވަރުގަދަ ތިން ޓީމުގެ ތެރެއިން އެއް ޓީމު ނިއު ރޭޑިއަންޓަކީ، ދެން، އުންމީދު ކޮންމެ ބައެއްގެ ވެސް އޮންނާނެ، އެކަމަކު، މި ދައްކަނީ، މުޅިން ދެ ދަރަޖައެއްގެ ދެ ޓީމެއްގެ ވާހަކަ. ނަތީޖާ އަކީ ހަމަ ގޯސް ދުވަހެއްގައި ނަތީޖާ ނެރެވިދާނެ ހަމަ އާދައިގެ ޓީމަކަށް ވެސް،" މި ވަގުތު ދެ ޓީމުގައި އޮތް ފަރަގަށް އިޝާރާތްކޮށް ނަތީޖާއެއް ނެރުމުގައި ހުރި އުނދަގޫތަކަށް އިޝާރާތްކޮށް ނަޒީހު ބުންޏެވެ.
"ގިވަޕް ކުރީކީއެއް ނޫން އެއްގޮތަކަށް ވެސް މި ޓީމަށް ނުވާވަރު ކަމެއް ނޫނޭ ނާދިރު ކަމެކޭ މި ބުނަނީ، އެއީ، ތައްޔާރުވާން ލިބުނު ވަގުތާއި މީގެ ތެެރެއަށް އައިސް ބޭރު ކުޅުންތެރިންނަށް ޓްރެއިން މި ކުރެވުނީ ދެ ޓްރެއިނިން ވަރު. ގިވަޕެއް ނުކުރަން، މި ފާހަގަކުރީ ލެވަލްގެ ތަފާތު މާ ބޮޑަށް މި ހުރީ ދެ ޓީމުގެ ބެންޗަށް ބަލާލާއިރު ވެސް. ޓީސީ ވެސް ގްރީން ވެސް ބަލިކޮށްފިން ކޮލިފައިންގައި، އެއީ ލެވަލްގެ ގޮތުން ދާދި ހަމަހަމަ ދެ ޓީމު، ވާހަކަ އަކީ ގައްދޫ ޓީމާ އަޅުވާއިރު ކުޑަކުޑަ ޑިފަރެންސެއް ހުރީ، އެކަމަކު، މީގެ އެބަހުރި ވަރަށް ބޮޑު ޑިފަރެންސެއް،"
ނަޒީހު ބުނީ، ގައްދޫ ގޮވައިގެން ކުރިއަށް އޮތް އެއް މަސް ދުވަހު މަސައްކަތް ކުރުމުން، އޭނާގެ ރާގު ވެސް އަދި ވާހަކަ ވެސް ބަދަލުވުން އެކަށީގެންވާ ކަމަށެވެ. އޭނާ ބުނީ، ގައްދޫ ގޮވައިގެން ތައްޔާރުވާން ލިބުނު ވަގުުތު މާ ކުޑަ ކަމަށާއި ފުޓްބޯޅަ ޓީމެއް ތައްޔާރުވާން ޕްރީ ސީޒަނަކަށް ގާތްގަނޑަކަށް 30 ދުވަސް ބޭނުންވާއިރު، 45 ޓްރެއިނިން އާއި ފަސް ވަރަކަށް މެޗު ކުޅެން ބޭނުންވާ ކަމަށެވެ.
"އަޅުގަނޑުމެން މި ކުޅުނީ ތިނަދޫއާ އެކު މެޗެއް. ނިއު ރޭޑިއަންޓް އެ އައީ ކަޕް ވިނާސް ކަޕް ކުޅެފައި، ޗެރިޓީ މެޗު ކުޅެފައި، ހަމަ ކޮމްޕެޓިޓީވް ވަރަށް ވަރުގަދަ ފަސް މެޗު ކުޅެފި، އެ ޑިފަރެންސް ވެސް އެއީ ވަރަށް ބޮޑު ތަފާތެއް. މީގެ އެއް މަސް ފަހުން، އެ ޑިފަރެންސް ނީންނާނެ. އެއީ ގައްދޫ ޓީމު ވެސް ހަތަރު ވަރަކަށް މެޗު ކުޅޭނެ އޭރަށް، މެޗު ފިޓްނަސް އަކީ ކިތަންމެ ވަރަކަށް ޓްރެއިނިން ހެދިޔަސް އަންނަ އެއްޗެއް ނޫން، އަނެއްކާ އެ ވަރުގެ ޓްރެއިނިން އެއް ނެތް ހެދިފައި،" ނަޒީހު ބުންޏެވެ.
ނިއު އިން ކުޑަކޮށް ވެސް ދަށްކޮށް ފެންނަނީ އެ ޓީމުގެ މެދުތެރެއިން ކުޅޭ ބޯޅަތައް ލަސްވުން ކަމަށް ނަޒީހު ވަނީ ބުނެފަ އެވެ. އަދި، އެކަން ނިއުގެ ކޯޗު އަންދްރޭ އަށް ވެސް ފާހަގަވެފައި ހުންނާނެ ކަމަށާއި އޭގެ ފައިދާ ނަގައިގެން ގައްދޫން ކުޅެން ވިސްނާއިރު، އެ ފެންވަރުގެ ކުޅުންތެރިން މަދުކަން ނަޒީހު ވަނީ ފާހަގަކޮށްފަ އެވެ.
ނިއު އާއި ގައްދޫ ކުޅޭ މެޗު ފަށާނީ މާދަމާ ހަވީރު، 4 ޖަހާއިރު، ގައްދޫ ފުޓްބޯޅަ ދަނޑުގަ އެވެ.
