މާދަމާރޭ ފަށާ މި ފަހަރުގެ ދިވެހި ޕްރިމިއާ ލީގުގެ ސީޒަން ފެންނަނީ ވަރަށް ޝައުގުވެރިކޮށް ކަމަށާއި ވަރަށް ވާދަވެރި ލީގަކަށް ތައްޔާރުވާއިރު، ސަޕޯޓަރުންނާ އެކު މުބާރާތް އިތުރަށް ފުރިހަމަވެގެންދާނެ ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު، ޗެކް ރިޕަބްލިކްގެ ތޯމަސް ޓްރުޗާ ބުނެފި އެވެ.
ދިރާގު ދިވެހި ޕްރިމިއާ ލީގު 26/27 ގެ ފުރަތަމަ މެޗުގައި މާދަމާރޭ، މިދިޔަ ފަސް އަހަރު ރާއްޖޭގެ ލީގު ޗެމްޕިއަން މާޒިޔާ އިން ކުޅޭނީ މިދިޔަ ސީޒަނުގެ ލީގު ދެ ވަނަ އަދި ޕްރެޒިޑެންޓްސް ކަޕްގެ ޗެމްޕިއަން، އޮޑި ސްޕޯޓްސް ކްލަބާ ދެކޮޅަށެވެ.
މިއަދުގެ މެންދުރު ފަހު ބޭއްވި ނޫސްވެރިންގެ ބައްދަލުވުމުގައި މާޒިޔާގެ ކޯޗު، ޓްރުޗާ ބުނެފައިވަނީ، ކަޕް ވިނާސް ކަޕަށް ފަހު ރަނގަޅު ޓީމާ އެކު މަސައްކަތްކޮށްލަން މުއްދަތެއް ލިބި، އެ ވަގުތުތަކުގައި އެކަށީގެންވާ މިންވަރަށް ފިޓްނަސް، ޓެކްޓިކްސް، މެންޓަލިޓީ އަދި ޓާގެޓްތަކަށް މަސައްކަތްކުރެވުނު ކަމަށެވެ. އެކަމަކު، އޭއެފްސީ 20 އަހަރުން ދަށުގެ ކޮލިފައިން އަށް ދިޔަ ޓިމުގައި މާޒިޔާގެ 10 ކުޅުންތެރިންނާއި އެސިސްޓަންޓް ކޯޗު، އިބްރާހިމް ސައީދު (ކަކާ) އަދި ޑޮކްޓަރު، ހިޝާމް ޒަކީ ދިޔަ ކަމަށާއި އެ އެންމެން ނުލައި 14 ކުޅުންތެރިންނާ އެކު ޓްރެެއިނިން ކުރިއަށް ގެންދަން ގޮންޖެހުންތައް ދިމާވި ކަމަށެވެ.
ޗެރިޓީ ޝީލްޑާއި ކަޕް ވިނާސް ކަޕަކީ މާޒިޔާގެ ސީޒަނަށް "ބޫސްޓެއް"
މި ފަހަރުގެ ފުޓްބޯޅަ ސީޒަނުގެ ޗެރިޓީ ޝީލްޑާއި ކަޕް ވިނާސް ކަޕް މާޒިޔާއިން ކާމިޔާބުކުރުމަކީ، ކުރިއަށް އޮތް ދިވެހި ޕްރިމިއާ ލީގަށް އެ ޓީމަށް ލިބުނު ބޮޑު ހިތްވަރެއް ކަމަށް ކޯޗު ތޯމަސް ޓްރުޗާ ވަނީ "އަދަދު ސްޕޯޓްސް" އަށް ބުނެފައި. މާޒިޔާއިން މި ދެ މުބާރާތުގެ ތަށިވެސް އުފުލާލީ ފައިނަލުގައި ނިއު ރޭޑިއަންޓް ބަލިކުރުމަށްފަހުގައި
ޓްރުޗާ ބުނީ، ޖުމްލަކޮށް ޓީމާ އެކު މަސައްކަތް ކުރަން ލިބުނު މުއްދަތާ އެކު، އެކިއިރުގައި ކުރެވިފައި ހުރި ކަންކަމުން ޓީމާ މެދު ކުރެވޭ އުންމީދުތައް ބޮޑު ކަމަށެވެ. އަދި، މާޒިޔާ ގޮވައިގެން ލީގު ކާމިޔާބުކުރަން މި ފަަހަރު ނުކުންނަން ޖެހިފައި މި ވަނީ މިދިޔަ އަހަރުތަކަށް ވުރެން ރަނގަޅު ސީޒަނަކަށްކަން ޓްރުޗާ ފާހަގަކުރި އެވެ.
"ބޭރުގެ ނަޒަރަކުން ބަލަންޏާމު މިއީ ވަރަށް ޝައުގުވެރި ލީގަކަށްވާނެ. އަހަރެން ބުނާނީ ސަޕޯޓަރުން، ސްޓޭކްްހޯލްޑަރުން، ޝެއާހޯލްޑަރުން، އެންމެން، މިދިޔަ ދުވަސްތަކުގައި ރާއްޖޭގެ ފުޓްބޯޅައާ ދުރުގައި ތިބި މީހުން އެބަޖެހޭ ލީގު ބަލަން، އެއީ މި ފަހަރުގެ ސީޒަން ވަރަށް ޝައުގުވެރިވާނެ. އެއީ، ކޮންމެ ކޯޗެއްގައި އަހާއިރު ވެސް ލީގުގައި ޓާގެޓްތައް ހުންނާނެ. ލީގު ކާމިޔާބު ކުރާށޭ ބުނާނެ. ފަހެއް ނޫނީ ހަ ވަރަކަށް ޓީމު އޮންނާނެ ލީގު ކާމިޔާބުކުރަން ބޭނުންވާނެ، ދެ ޓީމެއް ވަރު ލީގުގައި ސަލާމަތުން އޮންނަން ބޭނުންވާނެ،" ކަޕް ވިނާސް ކަޕާ ދިމާކޮށް، މާޒިޔާއާ ހަވާލުވި ޓްރުޗާ ބުންޏެވެ.
"ވަރަށް ވާދަވެރި ލީގަކަށްވާނީ، ވަރަށް ޕްރެޑިކްޓް ކުރަން (ވާނެ ގޮތެއް ލަފާކުރަން ވެސް) އުނދަގޫ ކަމަކަށްވާނީ، ރާއްޖޭގައި މި މޫސުުމުގައި ދިމާވާގޮތަށް. ނޭނގޭނެ ވާރޭ ވެހޭނީ ކޮން ވަގުތެއްގައި ކަމެއް. ދެންމެ އައިއިރު ވިއްސާރަ، މިހާރު އެއޮތީ އަވިދީފައި. މި ކަހަލަ ގޮތަކަށް ލީގު ވާނެ، އަހަރެން ބޮޑަށް ބޭނުމީ ގިނަ ސަޕޯޓަރުން ދަނޑުން ފެންނަން. އަހަރެން ރިކުއެސްޓެއް ކުރަންޏާ ވެސް، ނޫނީ ނޫސްވެރިން ގާތުގައި ވެސް ބުނާނީ ވަރަށް ގިނަ ބަޔަކު ކުރިމަތީގައި މެޗުތައް ކުޅެން ބޭނުމޭ. މި ފަހަރު އަންނާށޭ މި ބުނަނީ ވަރަށް ގިނަ ޓީމުތަކުން މި އަންނަނީ ތަށި ހޯދަން،"
ރާއްޖޭގެ ފުޓްބޯޅައިގައި މީގެ 10 އަހަރު ކުރިން މަސައްކަތްކުރި ބިދޭސީ ކުޅުންތެރިންނާއި ކޯޗުންނަށް ވުރެން މި ވަގުތު ޓީމުތަކުގައި ތިބި ކުޅުންތެރިންނާއި ކޯޗުންގެ ތަޖުރިބާ އާއި ފެންވަރު ރަނގަޅުކަން ނޫސްވެރިންނަށް ވެސް އެނގޭނެ ކަމަށް ޓްރުޗާ ވަނީ ބުނެފަ އެވެ. އަދި، އެކަން ތަޖުރިބާ ކުރުމަށްޓަކައި، ސަޕޯޓަރުން މި ފަަހަރުގެ ލީގުގެ މެޗުތަކަށް އައުން ވަރަށް އެދެވޭ ކަމަށާއި ޔޫރަޕްގެ ރަނގަޅު ގައުމުތަކުގައި މަސައްކަތް ކޮށްފައިވާ ފަރާތްތައް ވެސް ހިމެނޭ ކަމަށް ޓްރުޗާ ވަނީ ބުނެފަ އެވެ.
ރާއްޖޭގެ ފުޓްބޯޅައިގައި މަސައްކަތްކުރަން ބަލާއިރު، އޭނާ އަށް އޮތް ހިތްހަމަަޖެހުމަކީ، މެޗު ޝެޑިއުލަކާއި ސީޒަން ކަލަންޑަރެއް ފެންނަން އޮތުން ކަމަށް ޓްރުޗާ ވަނީ ފާހަގަކޮށްފަ އެވެ.
"އަހަންނަށް އޮތް އެންމެ ރަނގަޅު ކަމަކީ އަހަންނަށް އެބައޮތް ޝެޑިއުލެއް ލިބިފައި މެޗުތަކުގެ. އަހަންނަށް އެނގޭ ދުނިޔޭގެ ބައެއް ގައުމުތައް އެބައޮތް މެޗު ޝެޑިއުލް އެހާ ރަނގަޅަށް ނެތް. އަހަންނަށް އެނގޭ ދުނިޔޭގައި އެބައޮތް އަންނަ ހަފްތާގައި ކުޅެން ޖެހޭ ޓީމު ނޭނގޭނެ މުބާރާތްތައް އޮންނަ ގައުމުތައް ވެސް. އެކަމަކު އެ އަށް ވުރެން ރާއްޖޭގައި ރަނގަޅަށް މި އޮތީ، އަހަރެމެން ތައްޔާރުވާން ފުރުސަތު ވެސް އެބައޮތް،" ޓްރުޗާ ބުންޏެވެ.
މި ފަހަރުގެ ދިވެހި ޕްރިމިއާ ލީގުގައި 10 ޓީމު ކުޅޭއިރު، ހއ. ދިއްދޫ އާއި ގދ. ގައްދޫގެ މެޗުތައް އެ ރަށުގައި ކުޅޭނެ އެވެ. މިއީ، ހޯމް އެންޑް އަވޭ ފޯމެޓަށް ރާއްޖޭގައި ކުޅޭ ފުރަތަމަ ސީޒަނެވެ. އަވޭ މެޗުތަކެއް ކުޅުމަށްޓަކައި، ހއ. ދިއްދޫ އާއި ގދ. ގައްދޫ އަށް ދިއުން ތަފާތު ތަޖުރިބާ އަކަށްވާނެ ކަމަށް ޓްރުޗާ ވަނީ ބުނެފަ އެެވެ. އެއީ، މާލެ އާއި ވިލިމާލެ ނޫން މާހައުލެއް ބަލާލައި، ރާއްޖޭގެ އެހެން ސަރަަހައްދެއްގެ ފުޓްބޯޅައިގެ ކަންކަން ދެނެގަންނަން ވެސް ފުރުސަތު ލިބޭނެތީ ކަމަށް ޓްރުޗާ ވަނީ ބުނެފަ އެވެ.
ދިވެހި ޕްރިމިއާ ލީގުގެ އާ ސީޒަނުގައި މާޒިޔާ އާއި އޮޑި ކުޅޭ މެޗު އޮތީ މާދަމާރޭ 9 ޖަހާއިރު އެެވެ.
