ސްރީލަންކާގެ ޑޮކްޓަރުން، މީހެއްގެ ހަށިގަނޑުން 3.1 ކިލޯގްރާމްގެ ބްލެޑާ ސްޓޯންއެއް ނަގައިފި އެވެ. މިއީ މިހާތަނަށް ރެކޯޑް ކުރެވުނު މިފަދަ އެންމެ ބޮޑު ހިލަ ކަމަށް ބެލެވެ އެވެ.
މި އޮޕަރޭޝަން ކޮށްފައިވަނީ މިދިޔަ ހަފުތާގައި، ސްރީލަންކާގެ އިރުމަތީ ސަރަހައްދެއް ކަމަށްވާ ތްރިންކޮމަލީގެ ހޮސްޕިޓަލެއްގަ އެވެ.
އުމުރުން 55 އަހަރުގެ މި މީހާ ހޮސްޕިޓަލުގައި އެޑްމިޓްކުރީ ސްޓްރޯކެއް ޖެހިގެންނެވެ. ނަމަވެސް، އޭނާއަށް ފަރުވާ ދެމުން ދިޔައިރު ކުޑަކަމުދާން އުނދަގޫވާކަން ފާހަގަކުރެވިގެން ހެދި ޓެސްޓުތަކުން، އޭނާގެ ބްލެޑާގައި ހިލަ ހުރިކަން ޑޮކްޓަރުންނަށް އެނގުނެވެ.
އޮޕަރޭޝަން ކޮށްގެން ނެގި މި ހިލައިގެ ބަރުދަނުގައި ދުވަސް ފުރިފައި އޮންނަ ތުއްތު ކުއްޖެއްގެ ބަރުދަން ހުރިއިރު، އޭގެ ބޮޑުމިން ހުރީ އޮސްޓްރިޗް ބިހެއްގެ ސައިޒަށެވެ.
މި އޮޕަރޭޝަންގައި އިސްކޮށް އުޅުއްވި ޑޮކްޓަރު ޕްރަހަލަހަން ބާލަކްރިޝްނަން ވިދާޅުވީ، މިހާތަނަށް ލިބެން ހުރި ރެކޯޑުތަކަށް ބަލާއިރު، މިއީ އޮޕަރޭޝަން ކޮށްގެން ނެގި އެންމެ ބޮޑު މިފަދަ ހިލަ ކަމަށެވެ.
މީގެ އިތުރުން، އޮޕަރޭޝަނަށް ފަހު ބަލިމީހާގެ ހާލަތު ވަރަށް ރަނގަޅު ކަމަށް ވެސް ޑޮކްޓަރު ވިދާޅުވި އެވެ.
ޑޮކްޓަރުން މައުލޫމާތު ދޭ ގޮތުގައި، އެ މީހާ އަދިވެސް އޮތީ ހޮސްޕިޓަލުގައި އެޑްމިޓްކޮށްފަ އެވެ. އަދި އޭނާގެ އެހެނިހެން ބަލިތަކަށް ފަރުވާ ދިނުން ކުރިއަށްދާ ކަމަށް ޑޮކްޓަރުން ވިދާޅުވި އެވެ.
ޑޮކްޓަރު ބާލަކްރިޝްނަން އިތުރަށް ވިދާޅުވީ، އެ ހިލަ އެ މީހާގެ ބްލެޑާގައި އުފެދިފައި ހުންނަތާ ގާތްގަނޑަކަށް ފަހެއް ނުވަތަ ދިހަ އަހަރު ވެދާނެ ކަމަށެވެ.
ބްލެޑާގައި ހިލަ އުފެދެނީ ކުޑަކަމުދާ ތަކެތީގައި ހުންނަ މިނަރަލްސް ގަނޑުވެ، ހަރު އެތިކޮޅުތަކަކަށް ބަދަލުވުމުންނެވެ.
އާންމު ގޮތެއްގައި މިފަދަ ހިލަ އުފެދެނީ ބްލެޑާ އެއްކޮށް ހުސްނުވެ، ބާކީ ހުންނަ ކުޑަކަމުދާ ތަކެތި ގަނޑުވެ ކްރިސްޓަލްތަކަކަށް ބަދަލުވުމުންނެވެ.
ވެލިފުކެއްގެ ސައިޒަށް ހުންނަ ކުދި ހިލަތައް އަމިއްލައަށް ބޭރުވި ނަމަވެސް، އެއް ސެންޓިމީޓަރަށް ވުރެ ބޮޑެތި ހިލަތަކުގެ ސަބަބުން ކުޑަކަމުދާ ނިޒާމަށް ހުރަސްއެޅި، ފަރުވާ ބޭނުންވެ އެވެ. އަދި ހަތަރު ސެންޓިމީޓަރަށް ވުރެ ބޮޑު ހިލަތައް ބެލެވެނީ އާދަޔާ ހިލާފަށް ބޮޑެތި ހިލަތަކުގެ ގޮތުގަ އެވެ.
ގިނިސް ވޯލްޑް ރެކޯޑްސްގައިވާ ގޮތުން، މީގެ ކުރިން އެންމެ ބޮޑު ހިލައެއް ބްލެޑާއިން ނަގާފައިވަނީ 2003 ވަނަ އަހަރު ބްރެޒިލްގެ ބަލިމީހެއްގެ ގައިންނެވެ. އެ ހިލައިގެ ބަރުދަނުގައި 1.9 ކިލޯގްރާމް ހުރިއިރު، ދިގުމިނުގައި 17.9 ސެންޓިމީޓަރު ހުއްޓެވެ.
