ރިސޯޓު ތަރައްގީކުރަން ކުއްޔަށް ދޫކޮށްފައިވާ ތަންތަނުގެ ތެރެއިން މަސައްކަތް ނުނިމި އަހަރުތަކެއް ވެފައިވާ ތަންތަނުގެ ތެރެއިން ބައެއް ތަންތަނަށް އިތުރު ފުރުސަތެއް ނުދީ، ކުލީގެ އެއްބަސްވުންތައް ބާތިލުކުރެވޭ ގޮތަށް ޓޫރިޒަމް މިނިސްޓްރީން ގަވާއިދެއް ހަދައިފި އެވެ.
ޓޫރިޒަމުން މިއަދު ގެޒެޓުކުރި ޓޫރިޒަމްގެ ބޭނުމަށް ތަރައްގީކޮށް ނުނިމި ހުރި ތަންތަނާ ގުޅޭ އާ ގަވާއިދުގެ ދަށުން، ކޮންސްޓްރަކްޝަން މުއްދަތު އިތުރުކޮށްފައިވާ ތަންތަނާއި އިތުރުކޮށްފައި ނުވާ ތަންތަނަށް ވެސް ވެސް އަމަލުކުރަނީ އެއް ގޮތަކަށެވެ.
މިހެން ނަމަވެސް އެއްވެސް ފުރުސަތެއް ނުދީ އަތުލަނީ ވަކި ޝަރުތުތަކެއް ހަމަވާ ތަންތަނެވެ. ބައެއް ތަންތަނަށް ފަހު ފުރުސަތެއް ދޭއިރު، އެހެން ބައެއް ތަންތަނަށް ފުރުސަތު ދިނުމާއި ފިޔަވަޅު އެޅުން އޮތީ މިނިސްޓްރީގެ އިހުތިޔާރުގަ އެވެ.
އިތުރު ފުރުސަތެއް ނުދީ ކުލީގެ އެއްބަސްވުން ބާތިލުކުރާ ހާލަތުތައް
- ތަރައްގީކުރަން ދީފައިވާ މުއްދަތުން އަށް އަހަރު ދުވަސް ފާއިތުވެ، ކުއްޔާއި ޖޫރިމަނާގެ ފައިސާގެ ގޮތުގައި ދައުލަތަށް ދައްކަން ޖެހޭ ފައިސާ 10 މިލިއަން ޑޮލަރަށް ވުރެ އިތުރުވެފައިވާ ތަންތަން
- ތަން ތަރައްގީކުރުމުގެ އެއްވެސް އަމަލީ މަސައްކަތެއް ކޮށްފައި ނުވާ ތަންތަން
- ތަރައްގީކޮށް ނިމިފައި ނުވާ ތަންތަނުގެ ތެރެއިން، ގްރޭސް ޕީރިއަޑަށް ފަހު، ކޮންސްޓްރަކްޝަން ޕީރިއަޑު 60 މަސް ދުވަހަށް ވުރެ އިތުރުކޮށްފައިވާ ތަންތަން
- ކުލީގެ މުއްދަތުން އަށް އަހަރު ދުވަސް ފާއިތުވެފައިވާ ތަންތަން ނުވަތަ ތަރައްގީކުރުމުގެ މަސައްކަތުގެ 15 ޕަސެންޓަށް ވުރެ ދަށް ތަންތަން
ޓޫރިޒަމުން ފަހު ފުރުސަތު ދެނީ މަސައްކަތް ނުނިމޭ ރިސޯޓުތަކުގެ ތެރެއިން، ގްރޭސް ޕީރިއަޑު ހަމަވެ، މުއްދަތު އިތުރުކޮށްފައި ނުވާ، އަދި ކުލީގެ މުއްދަތުން އަށް އަހަރު ދުވަސް ނުވާ ތަންތަނަށެވެ. މި ގޮތަށް ދޭ މުއްދަތުގެ ތެރޭގައި އެ ތަންތަނުގެ މަސައްކަތް ނިންމައި، އޮޕަރޭޝަނަށް ނުގެނެސްފި ނަމަ ކުލީގެ އެއްބަސްވުން ބާތިލުކުރެވެ އެވެ.
ތަރައްގީކޮށް ނުނިމޭ ތަންތަނުގެ ތެރެއިން އިމާރާތްކުރުމުގެ (ކޮންސްޓްރަކްޝަން) މުއްދަތު އޮތް ތަންތަމުގެ ތެރެއިން، މަސައްކަތް ނުހިނގާ ތަންތަނަށް، މިނިސްޓްރީއަށް ފިޔަވަޅު އެޅެ އެވެ. އަދި، މި ތަންތަނުގެ 50 ޕަސެންޓަށް ވުރެ ބޮޑު ބަޔެއް ނިމިފައިވާ ނަމަ، ކޮންސްޓްރަކްޝަން މުއްދަތު އިތުރުކުރުން އޮތީ މިނިސްޓްރީގެ އަތް މަތީގަ އެވެ.
މި ތަންތަނުގެ އެއްބަސްވުން ބާތިލުކުރިޔަސް، އެ ތަނަކާ ގުޅިގެން އަރާފައިވާ ޖޫރިމަނާގެ ފައިސާ، ދައުލަތަށް ދައްކަން ޖެހެ އެވެ. އަދި ރަހުނުކޮށްފައި އޮތް ތަނެއް ނަމަ، ނޫނީ ރަހުނުގެ ގޮތުގައި ވިއްކާލަން ހުއްދަ ދީފައި އޮތް ތަންތަން ވެސް، ރަހުނު ހިފި ފަރާތަށް އެންގުމަށް ފަހު، އެއްބަސްވުން ބާތިލުކުރެވެ އެވެ.
ނުނިމި ދުވަސްވެފައިވާ ތަންތަން އަތުލެވޭ އިޖުރާއަތުތައް ތަފުސީލުކޮށް، ސަރުކާރުން ގަވާއިދެއް ހެދިއިރު، ތަރައްގީ ނުކުރާ ނަމަ އެއްބަސްވުން ބާތިލުކުރުމުގެ ބާރު މިހާރު ވެސް ސަރުކާރަށް ލިބެ އެވެ. މިހެން ނަމަވެސް، ހުރިހާ ސަރުކާރެއްގައި ވެސް މަސައްކަތް ކުރަނީ ތަންތަން އަތުނުލައި ލުއިތަކާއި ފުރުސަތުތައް ދީގެން ރިސޯޓުތައް ހުޅުވޭތޯ އެވެ.
ސަރުކާރުތަކުން މި ސިޔާސަތު އިސްކުރި ނަމަވެސް، އެ ބޭނުންވީ ނަތީޖާ ނެރެވުނު ކަމަކަށް ނުބެލެވެ އެވެ. ޓޫރިޒަމް މިނިސްޓްރީގެ ތަރައްގީކުރަމުން އަންނަ ރިސޯޓުތަކުގެ ލިސްޓުގައި ހުރި ގިނަ ތަންތަނަކީ ޒަމާނުއްސުރެން މަސައްކަތް ނުނިމި ހުރި ތަންތަނެވެ. އަދި، ކޮންމެ ސަރުކާރެއްގައި އިތުރު ތަންތަން ކުއްޔަށް ދޫކުރަމުން އަންނައިރު، މި ލިސްޓު އަންނަނީ އަހަރުންއަހަރަށް ދިގުވަމުންނެވެ.
