"ދައުރު" ނޫހަށް އެއްޗެހި ގޮވައި ރައީސް މުހައްމަދު މުއިއްޒުގެ އިސް ތަރުޖަމާނު މުހައްމަދު ހުސެއިން ޝަރީފް (މުންދު) ނެރުއްވި ބަޔާނަށް ފާޑުކިޔުން އަމާޒުވި ފަހުން އެ ބަޔާން ޑިލީޓުކޮށްފި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރުކުރާ ގޮތަށް ހަމަޖެއްސީ ރިސޯޓު އޯނަރުންނާ މަޝްވަރާ ކުރުމަށްފަހު ކަމަށް މުންދު އިއްޔެ ވިދާޅުވެފައިވާތީ "ދައުރު" އިން ވަނީ އެކަމުގެ ފެކްޓް ޗެކެއް ހަދައިފަ އެވެ. ދައުރުން ބުނީ މުންދު ވިދާޅުވެފައި ވަނީ "ބުހުތާނު ދޮގެއް" ކަމަށެވެ.
އެ ނޫހުގެ ހަބަރަށް ރައްދު ދެއްވަމުން މުންދު މިއަދު ވަނީ ދެ ސަފުހާގެ ބަޔާނެއް ނެރެ "ދައުރު" ނޫހުން ހެދީ "ރޯބުހުތާނު ދޮގެއް" ކަމަށް ވިދާޅުވެފަ އެވެ.
"މަޓީއާ މަޝްވަރާކޮށްފައިނުވާ ކަމަށް އެ ވިދާޅުވާ ވިދާޅުވުމަކީ ދޮގެއް. މަޓީއަށް އެކަން ކުއްލި ހައިރާންކަމަކަށްވީ ކަމަށް ބުނާ ބުނުމަކީ ވެސް ދޮގެއް. ޗީފް ގަވަމަންޓް ސްޕޯކްސްޕާސަން ހެއްދެވީ 'ބުހުތާނު ދޮގެއް' ކަމަށް ވިދާޅުވެފައިވާ ވާހަކައަކީ 'ރޯބުހުތާނު ދޮގެއް' ކަމުގައި ދަންނަވަން،" މުންދު ނެރުނު ބަޔާނުގައި ވިދާޅުވެފައިވެ އެވެ.
މުންދުގެ ބަޔާން އިންޓަނެޓު މެދުވެރިކޮށް އާންމު ކުރުމާއެކު ވަރަށް އަވަހަށް ގިނަ ބައެއްގެ ފާޑުކިޔުން އެ ބަޔާނަށް އަމާޒުވި އެވެ. ގިނަ މީހުން ބުނީ އެ ބަޔާނުގެ ބަސްމަގު ހުރީ ގައުމުގެ އެންމެ މަތީ އޮފީހާ އެއް ފެންވަރެއްގައި ނޫން ކަމަށެވެ.
"މިއީ ހަމަ ރައީސް އޮފީހުގެ ރަސްމީ ޕޭޖު؟ ދެ ފަހަރަށް ޗެކްކޮށްލައިފިން ރަސްމީ ޕޭޖުތޯ މިއީ،" މުންދުގެ ބަސްމަގު ހުރި ގޮތުން މީހަކު ފޭސްބުކްގައި ބުނެފައިވެ އެވެ.
އެހެން މީހަކު ބުނެފައި ވަނީ "މިއީ ގައުމެއްގެ ރައީސް އޮފީހުގެ ޕޭޖަކުން ލިޔަންޖެހޭ ކަހަލަ އެއްޗެއް ނޫން" ކަމަށެވެ. އަދި "ރާއްޖޭގެ ކަންމަތި ޕޭޖުތައްހެން" ނުއުޅެން ވެސް ރައީސް އޮފީހަށް އޭނާ އިލްތިމާސްކޮށްފައިވެ އެވެ.
މުންދު އިއްޔެ ވަނީ އަދަދު ގެ ނޫސްވެރިޔާ ލީވާން އަލީ ނާސިރު ނޫސްކޮންފަރެންސަކުން ނެރެލައިފަ އެވެ. އަދި އެ ނޫސްކޮންފަރެންސް ނުފަށައި ފަހުން ވަނީ ކެންސަލްކޮށްފަ އެވެ.
