ޑްރަގް ކެފޭއެއް ގޮތަށް ގ. ޕެލިކަން ގޭގައި މަސްތުވާތަކެތި ބޭނުންކޮށް އެތަކެތި ވިޔަފާރިކުރަން ހުއްދަ ދިން ގޭގެ ވެރިފަރާތް 10 އަހަރަށް ޖަލަށްލުމަށް ކްރިމިނަލް ކޯޓުން އިއްޔެ ހުކުމްކޮށްފި އެވެ.
މި މައްސަލައިގައި ޖަލަށްލާން ހުކުމްކުރީ ގ. ޕެލިކަން، އިބްރާހިމް ނާޒިމް އެވެ. އޭނާއަކީ މަސްތުވާތަކެތީގެ ގާނޫނުގެ 127 ވަނަ މާއްދާގެ ދަށުން މި ކުށް ސާބިތުވި ފުރަތަމަ މީހާ އެވެ.
އިބްރާހިމް ނާޒިމްގެ މައްޗަށް ސާބިތުވީ ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ޖަދުވަލު 1 ގައިވާ މަސްތުވާތަކެއްޗެއް ނުވަތަ ޖަދުވަލު 2 ގައިވާ މަސްތުވާއެއްޗެއް، ޓްރެފިކްކުރުމަށް ނުވަތަ ޕެޑަލްކުރުމަށް ނުވަތަ އުފެއްދުމަށް ނުވަތަ އެއިން ކަމެއް ކުރުމަށްކަން ގަބޫލުކުރެވޭހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާފަރާތުން ހުއްދަ ދިނުން ނުވަތަ ހުއްދަކުރުމުގެ ކުށެވެ.
ޕެލިކަން ގޭގައި ނާޒިމް ހަދާފައިވާ ތިން ފަންގިފިލާގެ އިމާރާތުގައި މަސްތުވާތަކެތީގެ އެކިއެކި ކުށްތައް ހިންގަމުން އަންނަކަމާއި 2014 ވަނަ އަހަރުން ފެށިގެން މަސްތުވާތަކެތީގެ ކުށްތައް އެ ގޭގައި ހިންގަމުން އަންނަކަން ރެކޯޑުކުރެވިފައިވާކަން ހުކުމުގައި ފާހަގަކޮށްފައިވެ އެވެ.
މީގެއިތުރުން އެ ގެއަކީ ތަކުރާރުކޮށް މަސްތުވާތަކެތި ވިއްކުމާއި އޭގެ ވިޔަފާރިކުރުމާއި އެނޫންވެސް މަސްތުވާތަކެއްޗާ ގުޅޭ ކުށްތައް ހިންގުމަށް ބޭނުންކުރަމުން އަންނަ ތަނެއް ކަމަށް އެކަށީގެންވާ ޝައްކެއް ނެތް މިންވަރަށް ޝަރީއަތަށް ވަނީ ސާބިތުވެފަ އެވެ.
ޝަރީއަތުގައި އިބްރާހިމް ނާޒިމް ބުނެފައިވަނީ އެ ގެއަކީ އޭނާ ކުއްޔަށް ދީފައި ހުރި ގެއެއް ކަމަށާއި އެ ގޭގައި މަސްތުވާތަކެތީގެ ކަންކަން ކުރަމުންދާކަން ނޭނގޭ ކަމަށެވެ. އޭގެއިތުރުން އަދަބާ ގުޅޭގޮތުން އިބްރާހިމް ނާޒިމް ބުނެފައިވަނީ އޭނާއަށް ދިން އަދަބަކީ ނުހައްގު އަދަބެއް ކަމަށާއި އެކަން އެނގޭނީ މަހުޝަރު ދުވަހުން ކަމަށެވެ.
ނަމަވެސް ދައުލަތުން ބުނެފައިވަނީ އެ ގޭގައި މަސްތުވާތަކެތީގެ ކަންކަން ކުރަމުންދާކަން ތަކުރާރުކޮށް އިބްރާހިމް ނާޒިމަށް އެންގުމުންވެސް ފިޔަވަޅު ނާޅާ ކަމަށާއި އޭގެއިންވެސް ދޭހަކޮށްދެނީ އެ ގޭގައި ހިނގާ ކަންކަމަކީ އޭނާއަށް އެނގިގެން ހިނގާ ކަންކަން ކަމަށެވެ.
ފުލުހުން އަންނަނީ ޑްރަގް ކެފޭތައް ފާހަަގަކޮށް އެތަންތަން ކޯޓު މެދުވެރިކޮށް ބަންދުކުރަމުންނެވެ. އޭގެއިތުރުން އެތަންތަނުގެ ވެރިންނަށް އިންޒާރުގެ ނޯޓިސްވެސް ފުލުހުން އަންނަނީ ދެމުންނެވެ.
