ދިވެހިރާއްޖޭގެ ގުޅުން ޕްރައިވެޓް ލިމިޓެޑް (ދިރާގު) އަކީ ސިޔާސީ ނުފޫޒާއި ބާރުވެރިކަން ނުފޯރާ އޮތް ހަމައެކަނި ރައްޔިތުންގެ ކުންފުނި ކަމަށާއި އެ ކުންފުނީގެ އިތުރު ހިއްސާ ސަރުކާރުން ގަތުމަމީ މި ވަގުތަށް ބޭކާރު ހަރަދެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ ދިރާގަށް ސިޔާސީ ނުފޫޒު ނުފޯރުވި އޮންނަ ހަމައެކަނި ސަބަބަކީ އެ ކުންފުނި ޕްރައިވަޓައިޒްކޮށްފައިވުމާއި ދިރާގުގެ މެޖޯރިޓީ ހިއްސާ ސަރުކާރަށް ނެތުމުން ކަމަށެވެ.
"ރާއްޖޭގައި ހިންގާ ސަރުކާރު ހިއްސާވާ ކުންފުނިތަކުން ފައިދާވެ އަދި ސިޔާސީ ބޭނުމަށް އޮތް ވަސީލަތެއްގެ ގޮތުގައި ނެތީ ދިރާގު. ދިރާގުގެ އިތުރު ހިއްސާ މި ވަގުތު ސަރުކާރަށް ގަތުމަކީ ބޭކާރު ހަރަދެއް،" ނަޝީދު ކުރެއްވި ޕޯސްޓުގައި ވިދާޅުވި އެވެ.
ނަޝީދު އެހެން ވިދާޅުވެފައި މިވަނީ، ރާއްޖޭގެ އެންމެ ދުވަސްވީ މުވާސަލާތީ ހިދުމަތްދޭ ކުންފުނި ކަމުގައިވާ ދިރާގުގައި އޮންނަ ސަރުކާރުގެ ހިއްސާ 51 ޕަސެންޓަށް ބޮޑުކޮށް، ސަރުކާރުގެ މެޖޯރިޓީ ހިއްސާވާ ކުންފުންޏަކަށް ބަދަލުކުރުމުގެ މަސައްކަތް ފަށާފައިވާ ކަމަށް ރައީސް މުހައްމަދު މުއިއްޒު މިއަދު އިއުލާނުކުރެއްވުމާ ގުޅިގެންނެވެ.
މުއިއްޒު ވިދާޅުވީ ހިއްސާ މި ގޮތަށް ބަދަލުކުރަން ކުރަން ޖެހޭ މަސައްކަތްތައް މިހާރު ފަށާފައިވާ ކަމަށެވެ. ނަމަވެސް އޭގެ އިތުރު ތަފުސީލެއް އެމަނިކުފާނު ނުދެއްވަ އެވެ.
ދިރާގު ސަރުކާރު މެޖޯރިޓީ ހިއްސާވާ ކުންފުންޏަކަށް ހަދަނީ
ދިރާގުގައި އޮންނަ ސަރުކާރުގެ ހިއްސާ 51 އިންސައްތައަށް ބޮޑުކޮށް، އެ ކުންފުންޏަކީ ސަރުކާރުގެ މެޖޯރިޓީ ހިއްސާ އޮންނަ ކުންފުންޏަކަށް ބަދަލުކުރުމުގެ މަސައްކަތް ފަށާފައިވާކަން ރައީސް މުއިއްޒު ވަނީ އިޢުލާންކުރައްވާފަ. މި ބަދަލާއެކު ދިރާގު ހިންގުމުގެ މައިގަނޑު ބާރު ސަރުކާރަށް ލިބިގެންދާނެ.
ދިރާގު އުފެއްދީ ދިވެހި ސަރުކާރުގެ 55 ޕަސެންޓު އަދި އިނގިރޭސިވިލާތުގެ ކޭބަލް އެންޑް ވަޔާލެސްގެ 45 ޕަސެންޓު ހިއްސާ އޮންނަ ގޮތަށެވެ. މި ހިއްސާ ބަދަލުވީ 2009 ގައި އޭރު އޮތް އެމްޑީޕީގެ ސަރުކާރުން ދިރާގުގެ ހަތް ޕަސެންޓު ހިއްސާ 40 މިލިއަން ޑޮލަރަށް ކޭބަލް އެންޑް ވަޔާލެސްއަށް ވިއްކާލުމުންނެވެ.
މި މުއާމަލާތާއެކީ ދިރާގުގައި އޮތް ސަރުކާރުގެ ހިއްސާ ވަނީ 48 ޕަސެންޓަށް ތިރިވެފަ އެވެ. އޭގެ ފަހުން 2011 ގައި ސަރުކާރުން ވަނީ މި ހިއްސާގެ ތެރެއިން 6.2 ޕަސެންޓު އާންމުންނަށް ވިއްކާ، ދިރާގު ޕަބްލިކް ކުންފުންޏަކަށް ބަދަލުކޮށްފަ އެވެ.
ދިރާގު ޕަބްލިކް ކުންފުންޏަކަށްވީ ފަހުން، ކޭބަލް އެންޑް ވަޔާލެސްއިން ވަނީ 2013 ގައި އެ ކުންފުނީގެ ހިއްސާ ބަހުރެއިންގެ ބަޓެލްކޯ ގްރޫޕު (މިހާރު ބިޔޯން) އަށް ވިއްކާލާފަ އެވެ. މިހާރު ދިރާގުގެ މެޖޯރިޓީ ހިއްސާދާރަކީ ބިޔޯން އެވެ.
ދިރާގަކީ ރާއްޖޭގައި އޮތް އެންމެ އަގު ބޮޑު ކުންފުންޏެވެ. މޯލްޑިވްސް ސްޓޮކް އެކްސްޗޭންޖް (އެމްއެެސްއީ) ގައި ހުރި އަދަދުތަކުން ދައްކާ ގޮތުގައި އެ ކުންފުނީގެ މާކެޓް ކެޕިޓަލައިޒޭޝަން 12 ބިލިއަން ރުފިޔާއަށް އަރަ އެވެ. މިއީ ގާތްގަނޑަކަށް 776 މިލިއަން ޑޮލަރެވެ.
ދިރާގުން ވަނީ މިދިޔަ އަހަރުގެ ތެރޭގައި އާމްދަނީގެ ގޮތުގައި ލިބުނު 2.8 ބިލިއަން ރުފިޔާއިން 949 މިލިއަން ރުފިޔާގެ ސާފު ފައިދާއެއް ނެރެފަ އެވެ. މިއީ ލިބުނު އާމްދަނީގެ ނިސްބަތުން ވަރަށް ބޮޑު ފައިދާއެކެވެ.
