ރާއްޖޭގައި އެތެރޭގެ އުދުހުންތައް ބާއްވަމުން އަންނަ މައިގަނޑު ތިން އެއާލައިންގެ ތެރޭގައި ހިމެނޭ މަންޓާ އެއާގެ ޑޮމެސްޓިކް އޮޕަރޭޝަންތައް މުޅިން ހުއްޓާލައި، ހަމައެކަނި ސީޕްލޭންގެ ހިދުމަތް ދޭ ގޮތަށް ބަދަލުކުރަން ނިންމިއިރު، ސަރުކާރުން އެކަމާ އަޅައިނުލާތީ ހުޅުމާލޭ ދެކުނު ދާއިރާގެ މެމްބަރު އަހުމަދު ޝަމްހީދު ކަންބޮޑުވުން ފާޅުކުރައްވައިފި އެވެ.
އަދަދު ނޫހަށް އެނގިފައިވާ ގޮތުގައި މަންޓާ އެއާއިން ނިންމާފައިވަނީ ކުރިއަށް އޮތް ތިން މަހާއި ހަ މަސް ދުވަހުގެ ތެރޭގައި އޭޓީއާރުގެ ދަތުރުތައް މުޅިން ހުއްޓާލުމަށެވެ.
މި ނިންމުމާ ގުޅިގެން މުވައްޒަފުންނާ ވެސް މިހާރު ވަނީ މުއާމަލާތުކޮށްފަ އެވެ.
އުދުހުން ހުއްޓާލާ މައިގަނޑު ސަބަބުތައް
- ޑޮމެސްޓިކް އެއާޕޯޓުތައް ހިންގާ ކުންފުނިތަކުން، ހާއްސަކޮށް ވާދަވެރި މޯލްޑިވިއަން ހިންގާ އައިލެންޑް އޭވިއޭޝަނުން، ހިދުމަތްތަކަށް ބޮޑު އަގު ނެގުން.
- ފްލައިޓް އޮޕަރޭޝަންސްއާއި ގްރައުންޑް ހޭންޑްލިން ފަދަ ކަންކަމަށް ނަގާ އަގު ދަށްކޮށްދޭން އައިލެންޑް އޭވިއޭޝަނުން އިންކާރުކުރުން.
- ދަތުރުތައް ކުރަމުން އައި ބ. ދަރަވަންދޫ، ރ. އިފުރު، އަދި ޅ. މަޑިވަރު އެއާޕޯޓުތަކުން މަންޓާއަށް ހަރަދުކުޑަކޮށް އޮޕަރޭޓުކުރެވޭނެ މަގެއް ނުފެނުން.
- ދެ އެއާލައިން ގުޅިގެން ކޯޑު ޝެއާކޮށްގެން ދަތުރުތައް ކުރިއަށް ގެންދަން މަންޓާއިން ހުށަހެޅުމުން އައިލެންޑް އޭވިއޭޝަނުން އެކަމަށް އިންކާރުކުރުން.
ދަތުރުތައް ހުއްޓާލާތީވެ ޕައިލެންޓުންނާއި، އިންޖިނިއަރުންނާއި، އަދި ގްރައުންޑް އޮޕަރޭޝަންސްގެ މުވައްޒަފުން ހިމެނޭހެން މަންޓާގައި މަސައްކަތްކުރާ ގިނަ އަދަދެއްގެ މުވައްޒަފުންގެ ވަޒީފާ ގެއްމުގެ ބިރު ވަނީ ހީވެފަ އެވެ.
މިހާރު އެ އެއާލައިނުން ޑޮމެސްޓިކް ދަތުރުތައް ކުރަނީ ހަމައެކަނި ދާލު އެއާޕޯޓަށެވެ. އަދި އޭޓީއާރު 600-72 މަރުކާގެ ތިން ފްލީޓުގެ ފްލީޓު ވަނީ އެކަކަށް ކުޑަކޮށްފައެވެ.
މެންބަރު ޝަމްހީދު ވިދާޅުވީ، ދިވެހިންނަށް އެންމެ މަތީ ފެންވަރުގެ ވަޒީފާތައް އުފައްދައިދޭ މިފަދަ އެއާލައިންތައް ފެއިލްވެގެންދާއިރު، ސަރުކާރުން އެއްވެސް ފިޔަވަޅެއް ނާޅައި ހިމޭނުން އޮތުމަކީ ޒިންމާދާރު ގޮތެއް ނޫން ކަމަށެވެ.
"މަންޓާ އެއާގެ ހިދުމަތް ހުއްޓުމަކަށް އައުމަކީ އިންތިހާއަށް ކަންބޮޑުވާންޖެހޭ ކަމެއް. ދިވެހިންނަށް އެންމެ މަތީ ފެންވަރުގެ ވަޒީފާތައް އުފައްދައިދޭ މިފަދަ އެއާލައިންތައް ފެއިލްވެގެން ދާއިރު، ސަރުކާރުން އެއްވެސް ފިޔަވަޅެއް ނާޅައި ހިމޭނުން އޮތުމަކީ ޒިންމާދާރު ގޮތެއް ނޫން،" ޝަމްހީދު ވިދާޅުވި އެވެ.
ފެބްރުއަރީ 24، 2019 ގައި ޚިދުމަތް ދޭން ފެށި މަންޓާ އެއާއިން މީގެ ކުރިން ދ. ކުޑަހުވަދޫ، ސ. ގަން، ހއ. ހޯރަފުށި، ރ. އިފުރު، ޅ. މަޑިވަރު، އަދި ބ. ދަރަވަންދޫއަށް ދަތުރުކޮށްފައިވެ އެވެ. މީގެ އިތުރުން ސީދާ ދާލު އެއާޕޯޓުން އިންޑިއާގެ ބެންގަލޫރަށް ވެސް އެ އެއާލައިނުން ދަތުރުތައް ބާއްވާފައިވެ އެވެ.
މަންޓާއިން ޑޮމެސްޓިކް ދަތުރުތައް މުޅިން ހުއްޓާލުމާއެކު، ރާއްޖޭގައި ދެން އެތެރޭގެ އުދުހުންތައް އޮންނާނީ މޯލްޑިވިއަނާއި ވިލާ އެއާ އެކަންޏެވެ. ވިލާ އެއާއިން އދ. މާމިގިއްޔާއި ދަރަވަންދުއަށް އެކަނި ދަތުރުކުރާތީ، ބާކީ ހުރި ގިނަ އެއާޕޯޓުތަކަށް ފްލައިޓު އަޅާ ހަމައެކަނި އެއާލައިނަކަށް މޯލްޑިވިއަން ވެގެންދާނެ އެވެ.
