ކަޕް ވިނާސް ކަޕްގެ ލީގު ބުރުގެ ފަހު މެޗުގައި، ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަނުން މިރޭ ކުޅުނު މެޗު 1-1 އިން އެއްވަރުވެއްޖެ އެވެ.
ހަތަރު ޓީމު ވާދަކުރާ ކަޕް ވިނާސް ކަޕްގައި ފުރަތަމަ ކުޅުނު ދެ މެޗުން، މާޒިޔާ އާއި ނިއު ވެސް މޮޅުވެފައި އޮތުމުން، މިރޭގެ މެޗަށް ނުކުތްއިރު ވެސް ދެ ޓީމަށް ވަނީ އަންނަ ބުދަ ދުވަހުގެރޭ ކުޅޭ ފައިނަލުން ޖާގަ ޔަގީންވެފަ އެވެ. އެހެންކަމުން، ގަލޮޅު ދަނޑުގައި މިރޭ ކުޅުނު މެޗަށް މާޒިޔާ އާއި ނިއު އިން ވެސް ނުކުތީ އާންމުކޮށް ފުރަތަމަ އެގާރައިގައި ކުޅެލަން ނުލިބޭ ކުޅުންތެރިންނަށް އެ ފުރުސަތު ދީގެންނެވެ.
ނިއު އާއި މާޒިޔާ އިން މިރޭ ކުޅުނު މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ. އެ ގޮތުން، މާޒިޔާގެ ޒުވާން ފޯވާޑް، މުހައްމަދު އިލާން އިމްރާނަށް އެޓޭކަށް ޖެހި ލިބުނު ބޯޅައިގައި ފޮނުވާލުން ލަސްކޮށްލުމުން ފުރުސަތު ގެއްލުނީ އެވެ. ނިއުގެ ޒުވާން ތަރި، އީތަން އިބްރާހިމް ޒަކީ އޭރިއާބޭރުން ޖެހި ޝޮޓެއް، މާޒިޔާގެ ގޯލްކީޕަރު، އިޔާން އަބްދުލް އަލީމް (ޗިކީ) ވަނީ މަތަކޮށްފަ އެވެ.
މެޗުގައި ލީޑުނެގީ މާޒިޔާ އިންނެވެ. އެ ގޮތުން، 63 ވަނަ މިނިޓްގައި މި ލަނޑު ޖެހީ ބެނިންގެ މިޑްފީލްޑަރު، ކޮޑްޖޯ ގޯމޭޒް އެވެ. މިއީ، މާޒިޔާ ފުރަތަމަ އެގާރައިގައި ހިމެނިގެން ގޯމޭޒްގެ ފުރަތަމަ މެޗެވެ. މާޒިޔާގެ ފުލްބެކް، ނާޝިއު އަހުމަދު ޝިހާމް އޭރިއާތެރެއަށް ވަދެ ނެގި ހުރަހަށް އަރައި ގޯމޭޒް ވަނީ ހަމަޖެހިލައިފައި ގޯލަށް ފޮނުވާލައިފަ އެވެ. މިއީ، ނިއު އިން ބަދަލުތަކެއް ގެނެސް ހަމަޔަކަށް އެޅެން ނެގި ވަގުތުގެ ތެރޭގައި ކުރިއަށް ޖެހިގެން ތަނަވަސްކުރި ފުރުސަތެއްގައި ރަނގަޅު ތަނަށް ހުސްވެ، ގޯމޭޒް ޖެހި ލަނޑެކެވެ.
ނިއު އިން އެއްވަރުކުރީ މެޗުގެ 72 ވަނަ މިނިޓްގަ އެވެ. މި ލަނޑު ޖެހީ، ބަދަލަކަށް ދެ ވަނަ ހާފުގައި ކުޅެން އެރި އަހުމަދު ހުސާމް (ހުސާންކޮ) އެވެ. މާޒިޔާގެ އޭރިއާތެރެއިން ނިއުގެ އީތަން އަށް ލިބުނު ބޯޅަ ހަމަޖެހިލައިފައި ގޯލުގެ ކުޑަ އޭރިއާތެރެއަށް ދުވެފައި ހުސްކޮށް އެރި ހުސާމް އަށް ދިނުމުން އޭނާ ވަނީ ގޯލުގެ ތެރެއަށް ފޮނުވާލައިފަ އެވެ.
މެޗުގެ ބާކީ ބައިގައި ނިއު އާއި މާޒިޔާ އިން ވެސް އިތުރު ގޯލެއް ޖަހައި މެޗުން މޮޅުވެ، ސައްތަ އިން ސައްތަ ރެކޯޑަކާ އެކު ފައިނަލަށް ދެވޭތޯ ބެލި އެވެ. އެހެން ނަމަވެސް އެއްވެސް ޓީމަަކަށް ގޯލެއް ނުޖެހި، މެޗު އެއްވަަރުވެގެން ނިމުނީ އެވެ.
ބުދަ ދުވަހުގެރޭ ކުޅޭ ކަޕް ވިނާސް ކަޕް ފައިނަލަކީ، މި ސީޒަނުގައި މާޒިޔާ އާއި ނިއުގެ ތިން ވަނަ ކުރިމަތިލުމެވެ. މި ދެ ޓީމު ބައްދަލުކުރި ފުރަތަމަ މެޗަކީ ޗެރިޓީ ޝީލްޑް މެޗެވެ. އެ މެޗު އެއްވަރުވެ، ޕެނަލްޓީ ޖަހައިގެން މާޒިޔާ މޮޅުވީ އެވެ.
