މާލެ ސަރަހައްދުގައި ރަޖިސްޓްރީކޮށް ދުއްވޭނެ ވެހިކަލްތަކުގެ އެންމެ މަތީ އަދަދު އަންނަ އޭޕްރިލްގެ ކުރިން ކަނޑައަޅަންޖެހޭނެ ކަމަށް އެއްގަމު ދަތުރުފަތުރާ ބެހޭ އާ ގާނޫނުގައި ހިމަނައިފި އެވެ.
މިދިޔަ ހަފުތާގައި ރައީސުލްޖުމްހޫރިއްޔާ ތަސްދީގުކުރެއްވި އެއްގަމު ދަތުރުފަތުރުގެ އައު ގާނޫނުގައި ބަޔާންކޮށްފައިވާ ގޮތުން، މާލޭގެ ކެރީން ކެޕޭސިޓީ ކަނޑައަޅަންޖެހެނީ އެ ގާނޫނުގެ ދަށުން އުފައްދާ ގްރޭޓާ މާލެ ޓްރާންސްޕޯޓު އެންޑް މޮބިލިޓީ އޮފީހުންނެވެ. އެއީ ޓްރާންސްޕޯޓު މިނިސްޓްރީގެ ދަށުން ހިންގާ އޮފީހެކެވެ.
އަންނަ އޮކްޓޫބަރު 1، ގައި އަމަލުކުރަން ފަށާ އެ ގާނޫނުގައި ބަޔާންކޮށްފައި ވަނީ، ގާނޫނަށް އަމަލުކުރަން ފަށާ ތާރީހުން ފެށިގެން ހަ މަސްދުވަހުގެ ތެރޭގައި މާލޭގެ ކެރީން ކެޕޭސިޓީ ކަނޑައަޅަންޖެހޭނެ ކަމަށެވެ. އެ ތާރީހު ހަމަވާނީ އޭޕްރިލް، 2027، އަށެވެ.
އެ އަދަދު ކަނޑައެޅުމަށްޓަކައި ކަމާބެހޭ ދިރާސާތައް ހަދައި ގްރޭޓާ މާލެ ޓްރާންސްޕޯޓު އެންޑް މޮބިލިޓީ އޮފީހުން ނޭޝަނަލް ރޯޑް ސޭފްޓީ ކައުންސިލަށް ހުށަހަޅައި ފާސްކުރަންވާނެ ކަމަށް އެ ގާނޫނުގައި ބަޔާންކޮށްފައިވެ އެވެ. އަދި، މާލޭގެ ކެރީން ކެޕޭސިޓީ ކަނޑައެޅުމަށްފަހު، އެއަށް އަމަލުކުރަން ލާޒިމުކުރުމުގެ ހަ މަސްދުވަހުގެ ކުރިން އެކަން އާންމުކޮށް އަންގައި އިއުލާނުކުރަންވާނެ ކަމަށް ވެސް އެ ގާނޫނުގައި ބަޔާންކޮށްފައިވެ އެވެ.
އޭގެ އިތުރުން، އެ ގާނޫނުގެ ދަށުން ނެޝަނަލް ރޯޑް ސޭފްޓީ ކައުންސިލެއް ވެސް އެކުލަވާލަންޖެހެ އެވެ. ގާނޫނަށް އަމަލު ކުރަން ފަށާތާ 30 ދުވަހުގެ ތެރޭގައި އެކުލަވާލަންޖެހޭ އެ ކައުންސިލްގައި ހިމެނޭނީ (1) ޓްރާންސްޕޯޓް މިނިސްޓަރު، (2) ބަންޑާރަނައިބު، (3) ހޯމް މިނިސްޓަރު، (4) އިންފްރާސްޓްރަކްޗާ މިނިސްޓަރު، (5) ކޮމިޝަނާ އޮފް ޕޮލިސް އެވެ.
އެ ކައުންސިލުގެ މައިގަނޑު މަސްއޫލިއްޔަތަކީ ދަތުރުފަތުރުގެ ގައުމީ ސިޔާސަތު އެކުލަވާލުމުގައި ރައީސްއަށް ލަފާ ދިނުމާއި ދަތުރުފަތުރުގެ ސްޓްރެޓެޖީ އެކުލަވާލުމުގައި ވަޒީރަށް ލަފާދިނުމެވެ.
އޭގެ އިތުރުން، ގާނޫނުގެ ދަށޫން ރޯޑް ސޭފްޓީ އެންޑް ޓްރެފިކް މެނޭޖްމަންޓް އެޑްވައިޒަރީ ކޮމިޓީއެއް ވެސް އުފައްދަންޖެހެ އެވެ. މިއީ ޓްރާންސްޕޯޓް މިނިސްޓަރު އުފައްދަންޖެހޭ ކޮމިޓީއެކެވެ. އެ ކޮމިޓީގެ މަސްއޫލިއްޔަތަކީ މިނިސްޓަރަށް އެކި ކަންކަމުގައި އެހީތެރިވެދިނުމެވެ.
