ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗެއާމަން ކަމުން މިދިޔަ ބުރާސްފަތި ދުވަހު ވަކިކުރި އަހުމަދު ޝަހީރު، މޯލްޑިވްސް ޓޫރިޒަމް ޑިވެލޮޕެމެންޓް ކޯޕަރޭޝަން (އެމްޓީޑީސީ) ގެ ޗެއާމަންގެ މަގާމަށް އައްޔަނުކޮށްފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން (ޕީސީބީ) އިން މިއަދު ބުނީ އޭނާ އެ މަގާމަށް އައްޔަނުކޮށްފައި ވަނީ އިއްޔެ ކަމަށެވެ.
އެމްޓީޑީސީގެ ޗެއާމަންގެ މަގާމަށް ޝަހީރު އައްޔަނުކޮށްފައި މި ވަނީ، އަޔާޑާ ރިސޯޓު ހިންގާ ގދ. މަގުއްދުވާގެ ހެޑްލީސް ނުއަގުގައި ވިއްކާލުމުގެ ޑީލަށް މަގުފަހި ކުރުމަށްޓަކައި މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަންގެ އިތުރު ހިއްސާ ވިއްކަން އެ ކުންފުނިން ނިންމާފައިވާ ދަނޑިވަޅެއްގަ އެވެ.
ރައިޓްސް އިޝޫއަކަށް ގޮސް، ކުންފުނީގެ މިހާރުގެ ހިއްސާ ދާރުންނަށް އިތުރު ހިއްސާ އަގުހެޔޮކޮށް ގަތުމުގެ ފުރުސަތު ހުޅުވާލަން ނިންމީ އެ ކުންފުނީގެ ބޯޑުންނެވެ.
އެމްޓީޑީސީގެ މެނޭޖުމަންޓުން އޮޅުވާލާ ކަމަށް ބުނެ ބޯޑުން އަސާމީ އިސްތިއުފާ ދީފި
އެމްޓީޑީސީގެ މެނޭޖުމަންޓުން ބޯޑުގެ ނިންމުންތަކާ ޚިލާފަށް އަމަލުކޮށް، އާންމު ހިއްސާދާރުންގެ މަސްލަހަތު ގެއްލޭ ފަދަ ނިންމުންތައް ނިންމާ ކަމަށް ބުނެ އެ ކުންފުނީގެ ބޯޑު މެންބަރު އަސާމީ ރުޝްދީ އިސްތިއުފާ ދެއްވައިފިއެވެ. އޭނާ އިސްތިއުފާ ދެއްވީ އަޔާޑާ ރިސޯޓުގެ މައްސަލައާއި ކުންފުނީގެ ހިއްސާ އިތުރުކުރުމުގެ ނިންމުމުގައި މެނޭޖުމަންޓުން ކަންކަން އޮޅުވާލާފައިވާ ކަމަށް ތުހުމަތު ކުރެއްވުމަށްފަހުއެވެ.
މަގުއްދުވާގެ ހެޑް ލީސް ހޯލްޑަރަކީ އެމްޓީޑީސީ އެވެ. ލީސްގެ މުއްދަތު ހަމަވާނީ 2031 އަށެވެ. އެމްޓީޑީސީ އިން އުޅެނީ ރަށުގެ ހެޑް ލީސް އަޔާޑާ ހިންގާ އަހްމެޓް އައިޑެނިޒް ކުންފުންޏަށް އެންމެ 1.5 މިލިއަން ޑޮލަރަށް ވިއްކާލާށެވެ.
އެކަމަކު، އަޔާޑާ އާއި އެމްޓީޑީސީއާ ހަދާފައިވާ އެއްބަސްވުމުގައިވާ ގޮތުން، ބާކީ އޮތް މުއްދަތުގައި ކޮންމެ އަހަރަކު ހަތަރު މިލިއަނެއްހާ ޑޮލަރު ކުލީގެ ގޮތުގައި ދައްކަންޖެހެ އެވެ. އެހެންކަމުން ލީސް ވިއްކާލަން މި އުޅެނީ ކުންފުންޏަށް 20 މިލިއަން ޑޮލަރުގެ ގެއްލުމެއް ލިބޭ ގޮތަށެވެ.
ނަމަވެސް، އަޔާޑާ ހިންގާ ގދ. މަގުއްދުވާގެ ހެޑްލީސް އެ ރިސޯޓު ތަރައްގީކުރި ތުރުކީ ކުންފުންޏަށް ވިއްކާލަން އުޅޭ ވާހަކަ އެމްޓީޑީސީން ވަނީ ދޮގުކޮށްފަ އެވެ. އަދި، އެ ރަށް ހިމެނޭހެން އެ ކުންފުނީގެ އެއްވެސް މުދަލެއް ވިއްކާލަން ނޫޅޭ ކަމަށް ބުނެ އެ ކުންފުނިން ވަނީ ބަޔާނެއް ވެސް ނެރެފަ އެވެ.
އެ މައްސަލައިގައި އެމްޓީޑީސީގެ ބޯޑުގައި ހިމެނުނު އަސާމީ ރުޝްދީ ވަނީ އިސްތިއުފާދެއްވައިފަ އެވެ. އޭނާ އިސްތިއުފާދެއްވަމުން ވިދާޅުވީ ރައިޓްސް އިޝޫއަކަށް ދާން ބޯޑުން ރުހުން ދިން ކަމަށް މެނޭޖުމަންޓުން ދެއްކި ވާހަކަތައް ދޮގުކުރެއްވުމަށްފަހު އެވެ.
އޭނާގެ އިސްތިއުފާގެ ސިޓީގައި ލިޔުއްވާފައި ވަނީ ރައިސްޓް އިޝޫ ދާން ބޯޑުން ރުހުން ދިނީ ޝަރުތުތަކަކާއެކު ކަމަށެވެ. ނަމަވެސް ބޯޑުން ކުރި ޝަރުތުތަކުގެ އަޕްޑޭޓް ނުދީ، ހިއްސާ ވިއްކަން ބޯޑުން ހުއްދަ ދިން ކަަމަށް އާންމުކުރުމަކީ ހިއްސާދާރުންނާއި އާންމު ރައްޔިތުން ބޯޑު މެންބަރުންނާ މެދު ގޯސް ތަސައްވުރެއް އުފެދޭނެ ކަމެއް އޭނާ ވިދާޅުވި އެވެ.
