ކްލަބް ވެމްކޯ އިން މި ފަހަރުގެ ވޮލީބޯލް އެސޯސިއޭޝަން ކަޕްގެ އަންހެން ޑިވިޝަންގެ ޗެމްޕިއަންކަން ކުޅުނު ހުރިހާ މެޗަކުން މޮޅުވެގެން ސައްތަ އިން ސައްތަ ރެކޯޑަކާ އެކު ހޯދުމަކީ ހަގީގަތުގައި މުޅި ޓީމުގެ ހިތްވަރުން ހާސިލްކުރެވުނު ކަމެއް ކަމަށް އެ ޓީމުގެ ކޯޗު، އަހުމަދު އަދީލް (ބޭބެ) ބުނެފި އެވެ.
ވެމްކޯ އިން މި ފަހަރުގެ އެސޯސިއޭޝަން ކަޕްގެ ޗެމްޕިއަންކަން ހޯދީ ރޭ ކުޅުނު ފައިނަލް މެޗުގައި 3-1 ސެޓުން މޮޅުވެގެންނެވެ. މިއީ، ވެމްކޯ އިން އެސޯސިއޭޝަން ކަޕްގެ ޗެމްޕިއަންކަން ޖެހިޖެހިގެން ހޯދި ހަ ވަނަ ފަހަރެވެ.
އެމްޓީސީސީ ބަލިކޮށް ވެމްކޯ އިން ހަ ވަަނަ ފަހަރަށް އެސޯސިއޭޝަން ކަޕް ކާމިޔާބުކޮށްފި
ވޮލީބޯލް އެސޯސިއޭޝަން ކަޕްގެ އަންހެން ޑިވިޝަނުގެ ފައިނަލުގައި އެމްޓީސީސީ 3-1 ސެޓުން ބަލިކޮށް، ކްލަބް ވެމްކޯ އިން ހަ ވަނަ ފަހަރަށް މި މުބާރާތުގެ ތަށި އުފުލާލައިފި. މުޅި މުބާރާތުގައި ކުޅުނު ހުރިހާ މެޗަކުން މޮޅުވެގެން ވެމްކޯ ތަށި ހޯދިއިރު، މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އެ ޓީމުގެ ފާތިމަތު ޖޫޒާން ޒަރީރު.
ވެމްކޯ އިން އެސޯސިއޭޝަން ކަޕް ކާމިޔާބުުކުރީ، 2021، 2022، 2023، 2024، 2025 އަދި 2026 ވަނަ އަހަރު އެވެ. މީގެ ތެރެއިން އެންމެ ފަހުން ތިން ފަހަރު މި މުބާރާތުގެ ތަށި އުފުލާލިއިރު، ޓީމަށް އިރުޝާދުދިނީ މި ފަހަރުގެ މުބާރާތުގެ މޮޅު ކޯޗުގެ މަގާމު ހޯދި ބޭބެ އެވެ.
"އަދަދު ސްޕޯޓްސް" އަށް ދިން އިންޓަވިއުއެއްގައި، ބޭބެ ބުނީ، ވެމްކޯ ޓީމާ އޭނަ ހަވާލުވި ފަހުން ޖެހިޖެހިގެން ތިން ފަހަރު މުބާރާތުގެ ތަށި ލިބިގެންދިއުމަކީ ހަގީގަތުގައި އެންމެން އެކުވެގެން ކުރި މަަސައްކަތުން ހާސިލްކުރެވުނު ކަމެއް ކަމަށެވެ.
"މުބާރާތް 100 ޕަސެންޓް ރެކޯޑަކާ އެކު ހުރިހާ މެޗަކުން މޮޅުވެގެން ނިންމާލެވުމަކީ ވަރަށް ބޮޑަށް ހިތްހަމަޖެހޭ ކަމެއް. ހަގީގަތުގައި މި ފަހަރު މިކަން ކުރަން ވަރަށް އުނދަގޫ ފަހަރެއް މިއީ. ވަރަށް ވަރުގަދަކޮށް ޓީމުތައް އޮތީ. ކޮންމެ މެޗެއް ވެސް ވީ ތަފާތު ޗެލެންޖަކަށް. އަހަރެމެންގެ ޓީމްވޯކް، ޑިސިޕްލިން، ދެން ވިނިން ސްޕިރިޓް މި އެހީވީ މި ހުރިހާ ޗެެލެންޖުތަކުން އަރައިގަނެ މި ކާމިޔާބީ ހޯދަން،" ބޭބެ ބުންޏެވެ.
"ވެމްކޯގެ އެންމެ ބޮޑު ހިތްވަރަަކީ ހަގީގަތުގައި ޓީމްވޯކް. ގިނަ ކުޅުންތެރިން މި ޓީމުގައި ވަރަށް ގިނަ ދުވަހު އެކުގައި ކުޅެފި. އެހެންވެ، އެކަކު އަނެކަކުގެ ކަންކަން ދަނެެގެން އެހީވެގެން ކުޅެން ވެސް ވަރަށް ފަސޭހަ. އެންމެންނަށް އެންމެންގެ ރޯލު އެނގި އެ ޒިންމާ އަދާކުރަން ވަރަށް ރަނގަޅަށް ފައިޓްކުރޭ. ނަތީޖާއަކީ ޓީމެއްގެ ގޮތުަގައި ވަރުގަދަކޮށް ފެނުން،"
ވެމްކޯ ޓީމު ކޯޓު މަތީގައި ލީޑުކުރުމުގައި ފާތިމަތު ޖޫޒާން ޒަރީރު އާއި އައިޝަތު މާޖިދާ (މާޖީ) އިސް ރޯލެއް އަދާކުރާކަން ބޭބެ ފާހަަގަކުރި އެވެ. އަދި، ކޯޓު މަތީގަޔާއި ބޭރުގައި ވެސް ޖޫޒާން އާއި މާޖީގެ ދައުރު ފުރިހަމަ އަށް އަދާކުރުމަކީ މި ކާމިޔާބީ ހޯދަން ވަރަށް ބޮޑަށް ބާރުއެޅުނު ކަަމެއް ކަމަށް ބޭބެ ފާހަގަކުރި އެވެ.
ވެމްކޯ ޓީމުގެ އެސިސްޓަންޓް ކޯޗަކަށް މަސައްކަތްކުރި ރާއްޖޭގައި އުފެދުނު އެންމެ މޮޅު އެއް ވޮލީބޯޅަ ކުޅުންތެރިޔާ، އަހުމަދު އަބްދުލް ކަރީމް (ލޯންގޭ) ކޮށްދިން މަސައްކަތް ވެސް ބޭބެ ވަނީ އަގުވަޒަންކޮށްފަ އެވެ. އަދި، ޓީމުގެ ބާކީ ކޯޗިން ސްޓާފުންނާއި މެނޭޖަރު ވެސް ވަރަށް ރަނގަޅަށް ޓީމެއްގެ ގޮތުގައި މަސައްކަތްކުރިކަން ބޭބެ ވަނީ ފާހަގަކޮށްފަ އެވެ.
އޭނާ އަށް އިތުބާރުކޮށް ވެމްކޯގެ މެނޭޖްމަންޓުން އެ ޒިންމާ ދިނީތީވެ އެންމެނަށް ޝުކުރު އަދާކުރާ ކަމަށާއި މި ކާމިޔާބީ އަކީ މީގައި ޝާމިލުވެ އުޅުނު ކޮންމެ މީހެއްގެ ވެސް ހިއްސާ އޮތް ކަމެއް ކަމަށް ބޭބެ ވަނީ ބުނެފަ އެވެ.
