މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ އަންހެން ޑިވިޝަނުގެ ފައިނަލުގައި ކްލަބް ވެމްކޯ އާއި ކްލަބް އެމްޓީސީސީ ބައްދަލުކުރަން ޖެހިއްޖެ އެވެ.
ޖުމްލަ އެކު އަށް ޓީމާ އެކު ކުރިއަށްދިޔަ މުބާރާތުގެ ފައިނަލުން އެމްޓީސީސީ އާއި ވެމްކޯ އިން ޖާގަހޯދީ އިއްޔެ ހަވީރާއި ރޭ ޒުވާނުންގެ މަރުކަޒު އެތެރެ ކޯޓުގައި ކުޅުނު ސެމީ ފައިނަލް މެޗުތަކުން މޮޅުވެގެންނެވެ.
ސެމީ ފަައިނަލް ފުރަތަމަ މެޗުގައި ހުރާ ކޮމިއުނިޓީ ކްލަބްގެ މައްޗަށް އެމްޓީސީސީން ކުރިހޯދީ ފޯރިގަދަ ކުޅުމަކަށް ފަހު، 3-2 ސެޓުންނެވެ. އަދި، އެންމެ ފަހުގެ ޗެމްޕިއަން، ވެމްކޯ އިން ވަނީ މިދިިޔަ އަހަރުގެ ފައިނަލުގައި އެ ޓީމާ ދެކޮޅަށް ކުޅުނު ޕޮލިސް އަތުން ސީދާ ތިން ސެޓުން މޮޅުވެ، ތަށި ދިފާއުކުރަން މި ފަހަރުގެ ފައިނަލުން ފުރުސަތު ހޯދައިފަަ އެވެ.
ގްރޫޕް ސްޓޭޖުގައި ކުޅުނު ތިން މެޗުން މޮޅުވެގެން ސެމީ ފައިނަލަށް ދަތުުރުކުރި ހުރާ އިން ވަނީ ސެމީ ފައިނަލުގައި 25-23 އިން ފުރަތަމަ ސެޓު ގެންގޮސްފަ އެވެ. އެކަމަކު، ދެ ވަަނަ ސެޓުގައި، އެމްޓީސީސީން ކުޅުން ރަނގަޅުކޮށް، 15-25 އިން ސެޓު ގެންދިޔަ އެވެ. އަނެއްކާ ވެސް ހުރާ އިން ތަފާތު ދައްކައި، ތިން ވަނަ ސެޓު، 25-20 އިން ގެންގޮސް ލީޑެއް ނެގި އެވެ. އެކަމަކު، އެ ފޯމުގައި ކުރިއަށް ދެވޭގޮތެއްނުވި އެެވެ. އެމްޓީސީސީން ވަނީ ތަޖުރިބާ އާއި ރަނގަޅު ފޯމުގެ ބޭނުންކޮށް ފަހު ދެ ސެޓު، 15-25 އާއި 12-15 އިން ގެންގޮސް މެޗުން މޮޅުވެފަ އެވެ.
ރޭ ކުޅުނު ސެމީ ފައިނަލްގެ ދެ ވަނަ މެޗުގައި، ޕޮލިހަށް ވެމްކޯ ކައިރީގައި ޗެލެންޖެއް ދެވުނީ ފުރަތަމަ ސެޓުގަ އެވެ. އަނެއް ދެ ސެޓުގަައި ވެސް ވެމްކޯ އިން ކުޅުނީ ކޮންޓްރޯލްގައި އޮވެގެން ޕޮލިހަށް މާބޮޑު ފުރުސަތެއް ނުދީ އެވެ. އެ ގޮތުން، ވެމްކޯ އިން މެޗުގެ ފުރަތަމަ ސެޓު، 25-21 އިން ގެންދިޔައިރު، ދެން ކުޅުނު ދެ ސެޓު ގެންގޮސްފައިވަނީ، 25-19 އާއި 25-12 އިންނެވެ.
މިދިޔަ އަހަރުގެ ފައިނަލުގައި ވެސް ސީދާ ތިން ސެޓުން ޕޮލިސް ބަލިކުރި ވެމްކޯ އިން ވަނީ ފަސް ވަނަ ފަހަރަށް މި މުބާރާތުގެ ތަށި އުފުލާލައިފަ އެވެ. މި ފަހަރުގެ ފައިނަލުގައި އެމްޓީސީސީއާ ދެކޮޅަށް ވެމްކޯ އިން ކުޅޭ މެޗު އޮތީ މިރޭ، 20:30 ގަ އެވެ. ގްރޫޕް ސްޓޭޖުގައި ވެމްކޯ އިން ވަނީ ސީދާ ތިން ސެޓުން އެމްޓީސީސީ ބަލިކޮށްފަ އެވެ.
މިއަދު ހަވީރު، މުބާރާތުގެ ތިން ވަނަ ހޮވާ މެޗުގައި ހުރާ އާއި ޕޮލިސް ބައްދަލުކުރާނެ އެވެ. މި ދެ ޓީމު ގްރޫޕް ސްޓޭޖުގައި ކުޅުުނު މެޗުން ހުރާ ވަނީ 3-1 ސެޓުން މޮޅުވެފަ އެވެ.
