ކުޅުނު ތިން މެޗުން ވެސް މޮޅުވެ، ފުރިހަމަ ރެކޯޑަކާ އެކު ހުރާ ކޮމިއުނިޓީ ކްލަބުން ގްރޫޕް ސްޓޭޖުގެ މެޗުތައް ނިންމާލިއިރު، އެ ގްރޫޕުން ދެ ވަނަ ޓީމުގެ ގޮތުގައި ޕޮލިސް ކްލަބުން ވޮލީބޯލް އެސޯސިއޭޝަން ކަޕް (ވީއޭއެމް) ކަޕް އަންހެން ޑިވިޝަންގެ ސެމީ ފަައިނަލަށް ދަތުރުކޮށްފި އެވެ.
ހުރާ އިން ގްރޫޕް އޭގެ އެއް ވަނަ ހޯދީ ނުވަ ޕޮއިންޓާ އެކު އެވެ. ތިން މެޗުން ވެސް އެ ޓީމު މޮޅުވިއިރު، ޖުމްލަކޮށް އެ ހުރިހާ މެޗެއްގައި ވެސް ރަނގަޅު ކުޅުމެއް ދެއްކި އެވެ. ގްރޫޕްގެ ދެ ވަނަ ހޯދި ޕޮލިސް ކްލަބަށް ހަ ޕޮއިންޓް ލިބުނެވެ. ތިން ވަަނައިގައި ނިންމި ސިޓީ ފްރެންޑްސް ކްލަބްގެ އޮތީ ތިން ޕޮއިންޓެވެ. އަދި، ވޮލީބޯލް ޔޫތު ނިއު ޖެނެރޭޝަން ކެޓީ ތިން މެޗުން ވެސް ބަލިވެ، ޕޮއިންޓެއް ނުލިބި އެވެ.
ގްރޫޕް އޭގެ ފަހު މެޗުތައް އިއްޔެ ކުޅުނުއިރު، އިއްޔެ ހަވީރު އޮތީ ޕޮލިސް ކްލަބާއި ވޮލީބޯލް ޔޫތު ނިއު ޖެނެރޭޝަން ބައްދަލުކުރާ މެޗެވެ. މިދިޔަ އަހަރުގެ ރަނަރަޕް، ޕޮލިހުން ވަނީ މި މެޗުން ފަސޭހަކަމާ އެކު މޮޅުވެފަ އެވެ. އެ ގޮތުން، ޕޮލިހުން ސެޓުތައް ގެންދިޔައީ، 25-23، 25-11 އަދި 25-14 އިންނެވެ.
ހުރާ އިން ރޭ ކުޅުނު މެޗުގައި ސިޓީ ފްރެންޑްސް ކްލަބް އަތުން މޮޅުވީ 3-1 ސެޓުންނެވެ. ހުރާ އިން މެޗުގެ ފުރަތަމަ ދެ ސެޓު، 25-23، 25-18 އިން ގެންގޮސް ހަމަޖެހިލި ނަމަވެސް، ސީދާ ތިން ސެޓުން މެޗުން މޮޅުވެވޭ ގޮތެއްނުވި އެވެ. ތިން ވަނަ ސެޓުގައި ސިޓީ ފްރެންޑްސް ކްލަބުން ކުޅުން ރަނގަޅުކޮށް، 22-25 އިން މި ސެޓު ގެންގޮސް އުންމީދެއް ހޯދި އެވެ. އެކަމަކު، ހުރާ އިން ވަނީ ހަތަރު ވަނަ ސެޓު، 25-17 އިން ހޯދައި، މެޗުން މޮޅުވެފަ އެވެ.
މުބާރާތުގައި މިއަދު ހަވީރާއި މިރޭ އޮތީ ގްރޫޕް ބީގެ ފަހު މެޗުތަކެވެ. އެ ގޮތުން، މިއަދު ހަވީރު ކުޅޭ މެޗުގައި، ސެމީގެ ޖާގަ ޔަގީންކޮށްފައިވާ އެންމެ ފަހުގެ ޗެމްޕިއަން، ކްލަބް ވެމްކޯ އިން ކުޅޭނީ ފުރަތަމަ ދެ މެޗުން ބަލިވެ މުބާެރާތުން ކަޓާފައިވާ ރާއްޖެ ވޮލީބޯލް ކްލަބާ ދެކޮޅަށެވެ. އަދި، މިރޭގެ މެޗުގައި ކްލަބް އެމްޓީސީސީ އާއި ގުޑް ގޭމް ސްޕޯޓްސް (ޖީޖީ ސްޕޯޓްސް) އިން ވާދަކުރާއިރު، މި މެޗުން މޮޅުވާ ޓީމަކަށް މި ގްރޫޕްގެ ދެ ވަނަ ޖާގައިގެ އިތުރުން، ސެމީ ފައިނަލުގެ ފަހު ޖާގަ ލިބިގެންދާނެ އެވެ.
