ބުރާސްފަތި ދުވަހު ބާއްވާ އިންޖިނިއަރިން އެވޯޑުގައި ދަރިވަރަކު ދޭ ސްޕީޗުން ކުރީގެ ރައީސުންގެ ނަންތައް އުނިކޮށް، ރައީސް މުހައްމަދު މުއިއްޒުގެ ނަން އެކަނި ހިމަނަން ހައުސިން މިނިސްޓްރީން އަންގައިފި އެވެ.
އަދަދު އަށް އެނގިފައިވާ ގޮތުގައި އެވޯޑު ހަފްލާގައި މޯލްޑިވްސް ޕޮލިޓެކްނިކްގެ ދަރިވަރަކަށް ސްޕީޗް ދިނުމަށް ލިބުނު ފުރުސަތުގައި ކުރީގެ ރައީސުންގެ ނަންތައް ހިމަނައިގެން ތައްޔާރުކުރި ސްޕީޗް އެޕްރޫވްކުރަން ހައުސިން މިނިސްޓްރީއަށް ފޮނުވި އެވެ. އެގޮތުން އެ ސްޕީޗުން ކުރީގެ ރައީސުންގެ ނަންތައް އުނިކޮށް ހަމައެކަނި މުއިއްޒުގެ ނަން ހިމަނަން އެންގުމުން އެގޮތަށް ޕޮލިޓެކްނިކުން ވަނީ އަމަލުކޮށްފަ އެވެ.
ކުރީގެ ރައީސުން ނަންތައް ހިމަނައިގެން ޕޮލިޓެކްނިކުން ތައްޔާރުކުރި ސްޕީޗާއި ހައުސިން މިނިސްޓްރީގެ އެންގުމަށް ކުރީގެ ރައީސުންގެ ނަންތައް އުނިކޮށް ހަމައެކަނި މުއިއްޒުގެ ނަން ހިމަނައިގެން ތައްޔާރުކުރި ސްޕީޗް މި ނޫހަށް ވަނީ ލިބިފަ އެވެ.
ސްޕީޗުން އުނިކޮށްފައިވަނީ ކުރީގެ ރައީސް އިބްރާހިމް ނާސިރު އާއި ކުރީގެ ރައީސް މައުމޫން އަބްދުލްގައްޔޫމްގެ ނަމެވެ. އޭގެއިތުރުން އަލްއަމީރު މުހައްމަދު ފަރީދު ދީދީގެ ނަންވެސް ސްޕީޗުން އުނިކުރަން އެންގި އެވެ.
މިގޮތަށް ތާރީހު އޮޅުވާލައި ހަމައެކަނި މުއިއްޒަށް ސަނާކިޔުމުގެ ނިޔަތުގައި ސްޕީޗެއް ތައްޔާރުކުރަން ޖެހުމުން ޕޮލިޓެކްނިކްގެ ލެކްޗަރާއިންނާއި ބައެއް މުވައްޒަފުން ކަންބޮޑުވުން ފާޅުކޮށްފައިވާކަން ވަނީ އެނގިފަ އެވެ.
"ސްޕީޗާއި ހުރިހާ އެއްޗެއް ރެޑީކޮށްފައި ހަދާފައި މިއިނީ ހުރިހާ ކުރީގެ ޕްރެޒިޑެންޓްސްއިންނަށް އެމީހުންގެ ކްރެޑިޓްސްތައް ދީފައި. އިންދާ ހައުސިން މިނިސްޓްރީން މި އަންގަނީ ސްޓްރިކްޓްކޮށް ހުރިހާ ޕްރެޒިޑެންޓްސްއިންގެ ނަންތައް ރިމޫވްކޮށްފައި ހަމައެކަނި މުއިއްޒުގެ ނަން ޖަހާފައި މުއިއްޒަށް ކްރެޑިޓްސް ދޭން. ހިސްޓްރީ ގެއްލުވާލަން މި ބުނަނީ،" މިކަމުގެ މައުލޫމާތު އެނގޭ މީހާ ބުންޏެވެ.
މިކަމާ ގުޅިގެން ހައުސިން މިނިސްޓްރީއާ އަދަދު އިން ސުވާލުކުރުމުން ހަބަރު ޝާއިއުކުރުމާ ހަމައަށް އެއްވެސް އެއްޗެއް ބުނެފައެއް ނުވެ އެވެ.
ހައުސިން މިނިސްޓްރީން ބާއްވާ އިންޖިނިއާސް އެވޯޑް ބޭއްވުމަށް ހަމަޖެހިފައިވަނީ "ހޮނަރިން އެކްސެލެންސް، މޭކިން ހިސްޓްރީ" ތީމްގެ ދަށުންނެވެ. މި އެވޯޑް ހަފްލާގައި 10 ދާއިރާއަކުން އެވޯޑް ދިނުމަށް ވަނީ ހަމަޖެހިފަ އެވެ.
އިންޖިނިއަރުން ގައުމަށް ކޮށްދެއްވާ ހިދުމަތުގެ އަގުވަޒަން ކުރުމުގެގޮތުން މި އަހަރުން ފެށިގެން އިންޖިނިއަރިންގެ އެވޯޑު ބާއްވަން ފައްޓަވާނެ ކަމަށް މިދިޔަ އަހަރު ވިދާޅުވީ މުއިއްޒެވެ. މައުލޫމާތު ލިބޭ ގޮތުގައި ބުރާސްފަތި ދުވަހު ބާއްވާ އެވޯޑު ހަފްލާގައި އެމަނިކުފާނަށްވެސް އެވޯޑެއް އެރުވުމަށް ވަނީ ހަމަޖެހިފަ އެވެ.
މިދިޔަ އަހަރުން ފެށިގެން ކޮންމެ އަހަރެއްގެ އޮގަސްޓް 30، ވަނަ ދުވަހަކީ ގައުމީ ފެންވަރެއްގައި ފާހަގަކުރާ "ދިވެހިރާއްޖޭގެ އިންޖިނިއަރުންގެ ދުވަސް" ކަމުގައި މުއިއްޒު ވަނީ ހަމަޖައްސަވާފަ އެވެ. އިންޖިނިއަރިން ދުވަހު މުޅިންވެސް ފެނިގެންދަނީ އެމަނިކުފާނަށް އެކި ގޮތްގޮތުން ސަނާކިޔަން ސަރުކާރުން މަސައްކަތްކުރާތަނެވެ.
