ރާއްޖޭގެ އެންމެ ދުވަސްވީ މުވާސަލާތީ ހިދުމަތްދޭ ކުންފުނި ކަމުގައިވާ ދިރާގުގައި އޮންނަ ސަރުކާރުގެ ހިއްސާ 51 ޕަސެންޓަށް ބޮޑުކޮށް، ސަރުކާރުގެ މެޖޯރިޓީ ހިއްސާވާ ކުންފުންޏަކަށް ބަދަލުކުރުމުގެ މަސައްކަތް ފަށާފައިވާ ކަމަށް ރައީސް މުހައްމަދު މުއިއްޒު މިއަދު އިއުލާންކުރައްވައިފި އެވެ.
ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމެއްގައި މިކަން އިއުލާންކުރައްވަމުން މުއިއްޒު ވިދާޅުވީ ހިއްސާ މި ގޮތަށް ބަދަލުކުރަން ކުރަން ޖެހޭ މަސައްކަތްތައް މިހާރު ފަށާފައިވާ ކަމަށެވެ. ނަމަވެސް އޭގެ އިތުރު ތަފުސީލެއް އެމަނިކުފާނު ނުދެއްވަ އެވެ.
ދިރާގު އުފެއްދީ ދިވެހި ސަރުކާރުގެ 55 ޕަސެންޓު އަދި އިނގިރޭސިވިލާތުގެ ކޭބަލް އެންޑް ވަޔާލެސްގެ 45 ޕަސެންޓު ހިއްސާ އޮންނަ ގޮތަށެވެ. މި ހިއްސާ ބަދަލުވީ 2009 ގައި އޭރު އޮތް އެމްޑީޕީގެ ސަރުކާރުން ދިރާގުގެ ހަތް ޕަސެންޓު ހިއްސާ 40 މިލިއަން ޑޮލަރަށް ކޭބަލް އެންޑް ވަޔާލެސްއަށް ވިއްކާލުމުންނެވެ.
މި މުއާމަލާތާއެކީ ދިރާގުގައި އޮތް ސަރުކާރުގެ ހިއްސާ ވަނީ 48 ޕަސެންޓަށް ތިރިވެފަ އެވެ. އޭގެ ފަހުން 2011 ގައި ސަރުކާރުން ވަނީ މި ހިއްސާގެ ތެރެއިން 6.2 ޕަސެންޓު އާންމުންނަށް ވިއްކާ، ދިރާގު ޕަބްލިކް ކުންފުންޏަކަށް ބަދަލުކޮށްފަ އެވެ.
ދިރާގު ޕަބްލިކް ކުންފުންޏަކަށްވީ ފަހުން، ކޭބަލް އެންޑް ވަޔާލެސްއިން ވަނީ 2013 ގައި އެ ކުންފުނީގެ ހިއްސާ ބަހުރެއިންގެ ބަޓެލްކޯ ގްރޫޕު (މިހާރު ބިޔޯން) އަށް ވިއްކާލާފަ އެވެ. މިހާރު ދިރާގުގެ މެޖޯރިޓީ ހިއްސާދާރަކީ ބިޔޯން އެވެ.
ދިރާގަކީ ރާއްޖޭގައި އޮތް އެންމެ އަގު ބޮޑު ކުންފުންޏެވެ. މޯލްޑިވްސް ސްޓޮކް އެކްސްޗޭންޖް (އެމްއެެސްއީ) ގައި ހުރި އަދަދުތަކުން ދައްކާ ގޮތުގައި އެ ކުންފުނީގެ މާކެޓް ކެޕިޓަލައިޒޭޝަން 12 ބިލިއަން ރުފިޔާއަށް އަރަ އެވެ. މިއީ ގާތްގަނޑަކަށް 776 މިލިއަން ޑޮލަރެވެ.
ދިރާގުން ވަނީ މިދިޔަ އަހަރުގެ ތެރޭގައި އާމްދަނީގެ ގޮތުގައި ލިބުނު 2.8 ބިލިއަން ރުފިޔާއިން 949 މިލިއަން ރުފިޔާގެ ސާފު ފައިދާއެއް ނެރެފަ އެވެ. މިއީ ލިބުނު އާމްދަނީގެ ނިސްބަތުން ވަރަށް ބޮޑު ފައިދާއެކެވެ.
