އިސްތަންބޫލް، ތުރުކީ (ސެޕްޓެމްބަރު 2) - ޔުވެންޓަސް އަށް ކުޅެމުން އަންނަ ތުރުކީގެ މަޝްހޫރު ތަރި، ކެނާން ޔިލްޑިޒް އަށް މި ފަހަރުގެ ޓްރާންސްފާގައި ބޮޑު އަގުގައި ކްލަބް ބަދަލުނުކުރެވުނީ އަނިޔާއެއްގައި ހުރުމުން ކަމަށް ތުރުކީގެ ބައެއް މީޑިއާ ރިޕޯޓްތައް ބުނެފި އެވެ.
އުމުރުން 21 އަހަރުގެ ޔިލްޑިލް އަކީ މިދިޔަ ސީޒަނުގައި އިޓާލިއަން ލީގުން ހޮވި އެންމެ މޮޅު ޒުވާން ކުޅުންތެރިޔާ އެވެ. އިޓާލިއަން ސެރިއާގައި މި އެވޯޑް ދެނީ، 23 އަހަރުން ދަށުގެ ކުޅުންތެރިންނަށެވެ. ޔިލްޑިޒް މި މަގާމު ހޯދީ މިދިޔަަ ސީޒަނުގައި ލީގުގައި ޔުވެންޓަސް އަށް ކުޅެދިން 33 މެޗުން 10 ގޯލު ޖަހައި ހަ ލަނޑު ޖަަހަން ފުރުސަތުތައް ހޯދައިދީގެންނެވެ.
ޔިލްޑިޒް އަށް މި ފަހަރުގެ ޓްރާންސްފާ މާކެޓްގައި، ޕީއެސްޖީ، އެތުލެޓިކޯ މެޑްރިޑް، އާސެނަލް އަދި ލިވަޕޫލުން އޮފާތަކެއް ލިބުނެވެ. އަދި، އޭގެ ތެރެއިން ބައެއް ކްލަބްތަކުން، 80-100 މިލިއަން ޑޮލަރުގެ އޮފާއެއް ވެސް ޔިލްޑިޒް އަށް ކުރަން ތައްޔާރުވި ނަމަވެސް، މި ވަގުތު އޭނާގެ ސިއްހީ ހާލަތަށް ބަލައި، އެ ޓްރާންސްފާ ކުރިއަށް ގެންދިއުން މަޑުޖެއްސީ އެވެ.
ޖަރުމަނަށް އުފަންވި ޔިލްޑިޒް، ބަޔާންގެ ޔޫތު ޓިމަށް ކުޅުނު ނަމަވެސް، ކެރިއަރުގައި ކަންކަން ބަދަލުވާން ފެށީ 2022 ވަނަ އަހަރު ޔުވެންޓަސްގެ ޔޫތު ސެޓަޕަށް ބަދަލުވުމަށް ފަހު އެވެ. އޭގެ އެއް އަހަރު ފަހުން، ޔުވެންޓަސްގެ ސީނިއާ ޓީމަށް ކުޅެން ފެށި ޔިލްޑިޒް ވަނީ އެ ޓީމުގެ އިތުރުން ތުރުކީ ގައުމީ ޓީމުން ވެސް ގަވާއިދުން ޖާގަ ހޯދަން ފަށައިފަ އެވެ. އަހަރުން އަހަރަށް ޔިލްޑިޒްގެ ކުރިއެރުން ފެނި އޭނާ އަށް މީގެ ކުރިން ވެސް ބައެއް ކްލަބްތަކުގެ އޮފާތައް ލިބުނެވެ.
ޔިލްޑިޒް ވަނީ މި ފަހަރުގެ އިޓާލިއަން ލީގުގައި ޔުވެންޓަސް އިން ކުޅުނު ފުރަތަމަ މެޗުގައި ފޮރިސިނޯނޭއާ ދެކޮޅަށް ކުޅެފަ އެވެ. އެކަމަކު، މިދިޔަ މަހު 23 ވަނަ ދުވަހު ކުޅުނު އެ މެޗުގައި ޔިލްޑިޒް ބަދަލުކުރަން ޖެހުނުއިރު، ވާތުފައިތިލައިގައި ވަނީ ރެނދެއް ލައިފަ އެވެ. މިއީ، ކުރިން ވެސް އޭނާގެ ހުރި އަނިޔާއެއް ކަމަށްވާއިރު، މި ފަހަރު އަނިޔާ ސީރިއަސްވެ، އޮޕަރޭޝަނެއް ކުރަން ޖެހުނީ އެވެ.
އިޓަލީގެ މީޑިއާ ރިޕޯޓްތައް ބުނާގޮތުން، ޔިލްޑިޒް އަށް ކުޅުމުގެ ތެރެއަށް އެނބުރި އާދެވޭނީ މަހަަކަށް ވުރެން ގިނަ ދުވަސް ފަހުންނެވެ.
