އޭއެފްސީ 20 އަހަރުން ދަށުގެ އޭޝިއަން ކަޕްގެ ކޮލިފައިން ޑިވެލޮޕްމަންޓް ފޭސްގައި ރާއްޖެ 6-0 އިން ބަލިކޮށް މިޔަންމާ އިން ކޮލިފައިން ގްރޫޕް ކޭގެ އެއް ވަނަ ހޯދައިފި އެވެ.
އޭއެފްސީ ކޮލިފައިންގެ އޮނިގަނޑަށް މި ފަހަރު ވަނީ ބަދަލު ގެނެސްފަ އެވެ. އެ ގޮތުން، ކޮލިފައިން ކުރިއަށްދާނީ ކޮލިފިކޭޝަން ފޭސް އާއި ޑިވެލޮޕްމަންޓް ފޭސް އެއް ގޮތަށެވެ. ކޮލިފިކޭޝަން ފޭސްގައި މަތީ ރޭންކުގެ ގައުމުތަކުން ކުޅޭއިރު، ޑިވެލޮޕްމަންޓް ފޭސްގައި ކުޅޭނީ ދަށް ރޭންކުގެ ގައުމުތަކެވެ.
ރާއްޖެ ހިމެނުނީ ޑިވެލޮޕްމަންޓް ފޭސްގަ އެވެ. ޑިވެލޮޕްމަންޓް ފޭސްގައި ތިން ގްރޫޕެއް އޮތްއިރު، ރާއްޖޭގެ ގްރޫޕްގެ މެޗުތައް ކުރިއަށްދަނީ މިޔަންމާގަ އެވެ. އެ ގްރޫޕްގައި މިޔަންމާ އާއި ރާއްޖެ އަދި ސްރީ ލަންކާ އާއި ދާރުއްސަލާމް ހިމެނޭއިރު، ގްރޫޕްގައި ފުރަތަމަ ކުޅުނު މެޗުތަކުން މޮޅުވެ، ރާއްޖެ އާއި މިޔަންމާ ވަނީ ދެން އޮތް ކޮލިފައިން ބުރުގެ ކޮލިފިކޭޝަން ފޭސް އިން ޖާގަ ހޯދައިފަ އެވެ.
ރާއްޖޭން ފުރަތަމަ މެޗުގައި، 2-0 އިން ބްރުނާއީ ބަލިކުރިއިރު، ދެ ވަނަ މެޗުގައި ސްރީ ލަންކާ އަތުން މޮޅުވީ 4-0 އިންނެވެ.
މިއަދުގެ މެޗުން ރާއްޖެ ބަލިކޮށް މިޔަންމާ އިން ވަނީ ކޮލިފައިން ގްރޫޕްގެ އެއް ވަނަ ހޯދައިފަ އެވެ. މިޔަންމާ އިން ވަނީ ކޮލިފައިންގައި ތިން މެޗުން މޮޅުވެ، ނުވަ ޕޮއިންޓް ހޯދައިފަ އެވެ. ދެ ވަނަ ހޯދި ރާއްޖެ އަށް ލިބުނީ ތިން މެޗުން ހަ ޕޮއިންޓެވެ. މި ގްރޫޕްގެ ފަހު މެޗުގައި މިއަދު ސްރީ ލަންކާ އާއި ބްރުނާއީ ދާރުއްސަލާމް ކުޅޭނެ އެވެ.
މިޔަންމާގެ ޔަންގޮންގެ ތުވުންނަ ސްޓޭޑިއަމްގައި މިއަދު ކުޅުނު މެޗުގެ 10 ވަނަ މިނިޓްގައި އޭރިއާތެރެއިން ލިބުނު ފުރުސަތަކުން، މިޔަންމާ އަށް ލީޑުނަގައިދިނީ ސައި ބޯ ބޯ އެވެ. އޭނާ ވަނީ ހަމަޖެހިލައިފައި ގޯލުގެ ތެރެއަށް ބޯޅަ ފޮނުވާލައިފަ އެވެ. މިޔަންމާ އިން ލީޑުފުޅާކުރީ މެޗުގެ 21 ވަނަ މިނިޓްގަ އެވެ. އޭރިއާބޭރުން، ތުރާ މިން ތަންޓު، ޖެހި ބޯޅަ އަމާޒުވީ ގޯލުގެ ތިރީ ކަނަށެވެ.
ރާއްޖޭގެ އީތަން އިބްރާހިމް ޒަކީ، ފުރަތަމަ ހާފުގައި ފޮނުވާލި ދެ ހަމަލާއެއް މިޔަންމާގެ ކީޕަރު، ސައި ކަންޓް މިން ޔޯ ވަނީ މަތަކޮށްފަ އެެވެ.
ދެ ވަނަ ހާފު ފަށައިގެންް މާ ލަސްތަކެއް ނުވެ މިޔަންމާ އިން އެޓޭކަށް ޖެހި އިތުރު ލަނޑުތަކެއް ޖެހި އެެވެ. މެޗުގެ 52 ވަނަ މިނިޓްގަައި މިިޔަންމާގެ ތިން ވަނަ ލަނޑު ޖެހީ ތުރާ މިން އެވެ. އޭނާ މި ލަނޑު ޖެހީ އޭރިއާތެރޭގައި ހުސްކޮށް ހުރެފަ އެވެ. އޭގެ ހަތަރު މިނިޓް ފަހުން، ރާއްޖޭގެ ޕެނަލްޓީ އޭރިއާ އަރިމަތިން ލިބުނު ހިލޭ ޖެހުމަކުން، ކިޔާލް ޔައުން ފޮނުވާލި ބޯޅަ ގޯލަށް ވަނީ ރާއްޖޭގެ ކެޕްޓަން، މުހައްމަދު އިލާން އިމްރާން ފައިގައި ޖެހިފައި، ކީޕަރު ޒަހުރާން ހަސަން ޒިޔާދު ފައި ކައިރިންނެވެ.
މެޗުގެ 65 ވަނަ މިނިޓްގައި ރާއްޖޭން ލަނޑެއް ޖެހުމާ ގާތަށް ޖެހިލި އެވެ. އިލާން، ފޮނުވާލި ބޯޅައެއް ގޯލުގެ ރޮނގުމަތިން ސަލާމަތްކުރީ މިޔަންމާގެ ކެޕްޓަން، ތެޓު ޕައިން ސޮން އެވެ. އޭގެ ފަސް މިނިޓް ފަހުން، މިޔަންމާ އިން ވަނީ ފަސް ވަނަ ލަނޑު ޖަހައިފަ އެވެ. މިއީ، ރާއްޖޭގެ އޭރިއާ ރޮނގުކައިރިން މިޔަންމާގެ ކައުން ކަޓް ކާމިޔާބުކުރި ގޯލެކެވެ.
ރާއްޖޭން ކުޅުން އަވަސްކޮށް، މެޗުގެ 76 ވަނަ މިނިޓްގައި ވެސް ރަނގަޅު އެޓޭކެއް ކުރި އެވެ. އެ ގޮތުން، އީތަން ނަގައިދިން ހުރަހަކަށް އަރައި، އިލާން ފޮނުވާލި ބޯޅަ ކީޕަރު ސައި ކަންޓް ވަނީ މަތަކޮށްފަ އެވެ.
މިޔަންމާ އިން ހަ ވަނަ ލަނޑު ޖެހީ 85 ވަނަ މިނިޓްގަ އެވެ. އޭރިއާތެރެއިން އެ ޓީމުގެ ފުލްބެކް، ސްވަން ޒަރް ނީ އަށް ލިބުނު ފުރުސަތުގައި ގޯލުގެ ދުރު ކަނަށް ބޯޅަ އަމާޒުކޮށްލި އެވެ.
