އޭއެފްސީ 20 އަހަރުން ދަށުގެ މުބާރާތުގެ ކޮލިފައިންގެ ޑިވެލޮޕްމަންޓް ފޭސްގައި މި ފަހަރު ވާދަކުރާ ރާއްޖޭގެ ޒުވާން ޓީމުން ކުޅުނު ދެ ވަނަ މެޗުގައި 4-0 އިން ސްރީ ލަންކާ ބަލިކޮށް މުބާރާތުގެ ކޮލިފައިން ފޭސް އިން ޖާގަ ހޯދައިފި އެވެ.
އޭއެފްސީ ކޮލިފައިންގެ އޮނިގަނޑަށް މި ފަހަރު ވަނީ ބަދަލު ގެނެސްފަ އެވެ. އެ ގޮތުން، ކޮލިފައިން ކުރިއަށްދާނީ ކޮލިފިކޭޝަން ފޭސް އާއި ޑިވެލޮޕްމަންޓް ފޭސް އެއް ގޮތަށެވެ. ކޮލިފިކޭޝަން ފޭސްގައި މަތީ ރޭންކުގެ ގައުމުތަކުން ކުޅޭއިރު، ޑިވެލޮޕްމަންޓް ފޭސްގައި ކުޅޭނީ ދަށް ރޭންކުގެ ގައުމުތަކެވެ. ރާއްޖެ ހިމެނެނީ ޑިވެލޮޕްމަންޓް ފޭސްގަ އެވެ. ޑިވެލޮޕްމަންޓް ފޭސްގައި ތިން ގްރޫޕެއް އޮތްއިރު، ރާއްޖޭގެ ގްރޫޕްގެ މެޗުތައް ކުޅޭނީ މިޔަންމާގަ އެވެ. އެ ގްރޫޕްގައި މިޔަންމާ އާއި ރާއްޖެ އަދި ސްރީ ލަންކާ އާއި ދާރުއްސަލާމް ހިމެނޭއިރު، މީގެއިން އެންމެ ރަނގަޅު ނަތީޖާ ނެރޭ ދެ ޓީމަކަށް ދެން އޮތް އޭޝިއަން ކަޕް ކޮލިފައިންގެ ކޮލިފިކޭޝަން ފޭސް އިން ޖާގަ ލިބޭނެ އެވެ.
ޑިވެލޮޕްމަންޓް ފޭސްގައި ރާއްޖެ ހިމެނޭ ގްރޫޕްގައި ކުޅުނު ފުރަތަމަ މެޗުން ބްރުނާއީ ދާރުއްސަލާމް އަތުން 2-0 އިން ރާއްޖެ މޮޅުވި އެވެ. މި ގްރޫޕްގެ މެޗުތައް ކުޅޭ މިޔަންމާ އިން ވަނީ ފުރަތަމަ މެޗުގައި ލަންކާ އަތުން 4-0 އިން މޮޅުވެފަ އެވެ. އަދި، ދެ ވަނަ މެޗުން މިއަދު، ބްރުނާއީ އަތުން 7-0 އިން މޮޅުވެ، މިޔަންމާ އޮތީ ގްރޫޕްގެ އެއް ވަނައިގަ އެވެ. އެއީ، ދެ ވަނައިގައި އޮތް ރާއްޖެއާ ޕޮއިންޓް އެއްވަރުވި ނަމަވެސް ލަނޑުގެ ތަފާތުން ކުރި ލިބޭތީ އެވެ.
އޭޝިއަން ކަޕް ކޮލިފައިންގައި ހާސިލް މި ކުރެވުނީ ތާރީހީ ކަމެއް: އިލާން
އޭޝިއަން ކަޕް ކޮލިފައިންގެ ޑިވެލޮޕްމަންޓް ފޭސްގައި ކުޅުނު ދެ މެޗުން މޮޅުވެ، ރާއްޖޭގެ 20 އަހަރުން ދަށުގެ ގައުމީ ޓީމު ވަނީ ކޮލިފިކޭޝަން ފޭސް އިން ޖާގަ ހޯދައި ތާރީހީ ކާމިޔާބީއެއް ހާސިލްކޮށްފައި. މިއީ އޭޝިއަން ކަޕް ކޮލިފައިންގެ ދެ މެޗުން ރާއްޖެ މޮޅުވި ފުރަތަމަ ފަހަރު ކަމަށްވާއިރު، މިއީ ތާރީހީ ކަމެއް ކަމަށް ޓީމުގެ ކެޕްޓަން، އިލާން ފާހަގަކުރި.
މި ގްރޫޕްގައި ބާކީ މެޗެއް އޮއްވައި، ރާއްޖެ އާއި މިޔަންމާ އިން ކޮލިފައިން ފޭސް އިން ޖާގަ ހޯދިއިރު. ގްރޫޕްގެ އެއް ވަނަ އަށް މި ދެ ޓީމުން ވާދަކުރާ މެޗު އޮތީ އާދިއްތަ ދުވަހު އެވެ. ފުރަތަމަ ދެ މެޗުން ބަލިވި، ބްރުނާއީ އާއި ލަންކާ ދެން އަންނަ ފަަހަރު ވެސް ކުޅެން ޖެހޭނީ ޑިވެލޮޕްމަންޓް ފޭސްގަ އެވެ.
ޔަންގޮންގެ ތުވުންނާ ސްޓޭޑިއަމްގައި ކުޅުނު މިއަދުގެ މެޗުގައި ރާއްޖޭން ލީޑުނެގީ ފުރަތަމަ ހާފުގެ އިތުރު ވަގުތުގަ އެވެ. މިއީ، އޭރިއާތެރެއިން ލިބުނު ފުރުސަތަކުން ރާްއްޖޭގެ ކެޕްޓަން، މުހައްމަދު އިލާން އިމްރާން ޖެހި ގޯލެކެވެ. ލަންކާ އޭރިއާތެރެއިން ރާއްޖޭގެ ނައްސާހު އިބްރާހިމް ނާސިރު ފޮނުވާލި ބޯޅައެއް ލަންކާގެ ކީޕަރު، ޝާތިން އަތުގައި ޖެހިފައި ނުކުތް ވަގުތު އިލާން ވަނީ ރީބައުންސުން ގޯލަށް ބޯޅަ ފޮނުވާލައިފަ އެވެ. މި ގޯލު ޖެހުމުގެ ކުރިން އިލާނަށް ލިބުނު ހުސް ފުރުސަތެއްގައި ރަނގަޅަށް ބޯޅަ ފޮނުވާނުލެވުނެވެ.
ދެ ވަނަ ހާފު ފެށިގެން މިނިޓްެއްހާއިރު ތެރޭ ރާއްޖޭގެ އަހުޒަމް ރަޝީދު (އަހު)، ހާފުގެ މެދެއްހާ ހިސާބުން ލިބުނު ހިލޭ ޖެހުމަކުން ފޮނުވާލި ބޯޅަ ކިީޕަރު ޝާތިން މަތަކުރި އެވެ. ފުރަތަމަ ހާފުގައި އަހު ފޮނުވާލި ހިލޭ ޖެހުމެއް ވަނީ ދަނޑިކައިރިން ބޭރަށް ގޮސްފަ އެވެ.
މެޗުގެ 53 ވަނަ މިނިޓްގައި ލަންކާގެ މިޑްފީލްޑަރު، ހިޖާޒީ ޖެހި ޝޮޓެއް ރާއްޖޭގެ ކީޕަރު، ޒަހުރާން ހަސަން ޒިޔާދު (ޒަހު) ވަނީ މަތަކޮށްފަ އެވެ.
ރާއްޖޭން ލީޑުފުޅާކުރީ 60 ވަނަ މިނިޓްގަ އެވެ. މިއީ، ބަދަލަަކަށް ކުޅެން އެރި އައިދު މުހައްމަދު ޖަވީޒް ދިން ބޯޅައަކުން އޭރިއާބޭރުން މުހައްމަދު ޝަމްހާން (ޝަމްބެ) ޖެހި ގޯލެކެވެ. ޝަމްހާން ތިރިތިރިން ފޮނުވާލި ބޯޅަ ކީޕަރު ޝާތިން އަތް ކައިރިން ގޮސް އަމާޒުވީ ގޯލުގެ ކަނަށެވެ.
މެޗުގައި ރާއްޖޭން ލީޑުނެގިތާ ތިން ވަރަކަށް މިނިޓް ފަހުން ލަންކާގެ ޑިފެންޑަރު، މުހައްމަދު ފާރިގު އަށް ދެ ވަނަ ރީނދޫ ކާޑަކާ އެކު ރަތެއް ދެއްކި އެވެ. ފާރިގަށް ދެ ވަނަ ރީނދޫ ކާޑު ދެއްކީ ރާއްޖޭގެ ފުލްބެކް، މުހައްމަދު ނައިސަމް އަށް ކުރި ފައުލަކަށެވެ.
މެޗުގައި ރާއްޖޭން ތިން ވަނަ ލަނޑު ޖެހީ 78 ވަނަ މިނިޓްގަ އެވެ. މިއީ، އަހުޒަމް ނަގައިދިން ކޯނަރަކުން ހުސްކޮށް ހުރެފައި ނައްސާހު ބޮލުން ޖެހި ގޯލެކެވެ. އޭގެ ދެ މިނިޓް ފަހުން، އިލާން ބޯޅަ ހިފައިގެން ގޮސް ހުސްކޮށްލާފައި ދިން ފުރުސަތަކުން، ނައްސާހު ވަނީ ރާއްޖޭގެ ހަތަރު ވަނަ ލަނޑު ޖަހައިފަ އެވެ.
ރާއްޖެ އާއި ސްރީ ލަންކާ އިން ވަނީ މިދިޔަ މާޗް މަހު މާލޭގައި ކުރިއަށްދިޔަ ސާފް 20 އަހަރުން ދަށުގެ މުބާރާތުގެ ގްރޫޕް ސްޓޭޖުގައި ވާދަކޮށްފަ އެވެ. އެ މެޗުން ރާއްޖެ 2-0 އިން ކުރީގައި އޮއްވައި، ސްރީ ލަންކާ އިން ވަނީ ދެ ވަނަ ހާފުގައި ނަތީޖާ އަނބުރާލައި، 3-2 އިން މޮޅުވެފަ އެވެ. އެކަމަކު، މިޔަންމާގައި މިރޭ ކުޅުނު މެޗުގައި ލީޑުނެގުމަށް ފަހު ވެސް މެޗުގެ ކޮންޓްރޯލް އަތުން ނުގެއްލި ރަނގަޅު ކުޅުމެއް ދައްކައި ރާއްޖޭން މޮޅުވީ އެވެ.
