ދައުލަތުގެ އެންމެ ތަނަވަސް އަދި އާމްދަނީ ލިބޭ ކުންފުނިތަކުގެ ތެރޭގައި ހިމެނޭ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗެއާމަން ކަމުން އަހުމަދު ޝަހީރު ވަކިކޮށްފި އެވެ.
އަދަދު ނޫހަށް މައުލޫމާތު ލިބުނު ގޮތުގައި ޝަހީރު އެ މަގާމުން ވަކިކުރީ މިދިޔަ ބުރާސްފަތި ދުވަހުގަ އެވެ. މިކަން ސާފުކުރަން މި ނޫހުން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސް މުހައްމަދު ނިޒާރަށް ގުޅުމުން އޭނާ ވަނީ ޝަހީރު ވަކިކުރިކަން ކަށަވަރުކޮށްދެއްވާފަ އެވެ.
ނިޒާރު ވިދާޅުވީ ޝަހީރު ވަކިކުރީ އެހެން ކުންފުންޏަކަށް ބަދަލުކުރަން ކަމަށެވެ. ނަމަވެސް، އެއީ ކޮން ކުންފުންޏެއް ކަމެއް އަދި އެނގިވަޑައި ނުގަންނަވާ ކަމަށް ކަމަށް އޭނާ ވިދާޅުވި އެވެ.
ޝަހީރަކީ މި ސަރުކާރުގައި އެޗްޑީސީގެ ޗެއާމަން ކަމުން ވަކިކުރި ތިން ވަނަ މީހާ އެވެ.
މި ސަރުކާރުން އެޗްޑީސީގެ ޗެއާމަނަކަށް ފުރަތަމަ އައްޔަންކުރީ އަހުމަދު ޒުހޫރެވެ. އެއީ ފެބްރުއަރީ 20. 2024 ގައި އެވެ. އޭގެ އެންމެ ތިން މަސް ދުވަސް ފަހުން ޒުހޫރު އެ މަގާމުން ވަކިކުރީ އޭރު އެޗްޑީސީގެ މެނޭޖިން ޑިރެކްޓަރަކަށް ހުންނެވި އިބްރާހިމް ފަޒުލް ރަޝީދުގެ ހިޔާނާތުގެ މައްސަލަތަކެއް ފެންމަތި ކުރި ހިސާބުންނެވެ.
މުއިއްޒުގެ ސަރުކާރުގައި އެޗްޑީސީގެ ޗެއާމަނުން
- އަހުމަދު ޒުހޫރު - ފެބްރުއަރީ 20، 2024 އިން މެއި 23، 2024 (ތިން މަސް)
- އަހުމަދު ނާސިފު - ނޮވެމްބަރު 6، 2024 އިން މާޗު 5، 2025 އަށް (ހަތަރު މަސް)
- އަހުމަދު ޝަހީރު - މެއި 29، 2025 އިން ސެޕްޓެމްބަރު 3، 2026 އަށް (އެއް އަހަރާއި ހަތަރު މަސް)
ޒުހޫރުގެ ފަހުން ހަ މަހެއްހާ ދުވަސް ވަންދެން ޗެއާމަންގެ މަގާމު ހުސްކޮށް ބޭއްވުމަށް ފަހު ނޮވެމްބަރު 6، 2024 ގައި އެ މަގާމަށް އައްޔަންކުރީ، އަހުމަދު ނާސިފެވެ. ނާސިފަށް ވެސް ޗެއާމަން ކަމުގައި ހުރެވުނީ ގާތްގަނޑަކަށް ހަތަރު މަސް ދުވަސް ވަންދެނެވެ. މިދިޔަ އަހަރު ކުރީކޮޅު އޭނާ ވަނީ ވެމްކޯއަށް ބަދަލުކޮށްފަ އެވެ.
ނާސިފުގެ ފަހުން އައްޔަނު ކުރި ޝަހީރަކީ މި ސަރުކާރުގައި އެޗްޑީސީގެ މަގާމުގައި އެންމެ ގިނަ ދުވަސް ވަންދެން ހުންނެވި މީހާ އެވެ. މިދިޔަ އަހަރުގެ މެއި 29، ގައި ޗެއާމަން ކަމަށް އައްޔަންކުރި ޝަހީރު މި ވަކިކުރީ ޗެއާމަނަކަށް ހުންނަވާތާ އަހަރަކާއި ހަތަރު މަސް ފަހުންނެވެ.
އެޗްޑީސީއަށް އައްޔަނުކުރުމުގެ ކުރިން ޝަހީރު ހުންނެވީ ފެނަކަ ކޯޕަރޭޝަންގެ ޗެއާމަނަކަށެވެ. އޭނާގެ އެންމެ ފާހަކޮށްލެވޭ ހިދުމަތަކީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގައި އޭނާ ހޭދަކުރެއްވި 29 އަހަރެވެ. މި މުއްދަތުގެ ތެރޭގައި އޭނާ ވަނީ 2015 އިން 2018 އަށް އެ ކުންފުނީގެ މެނޭޖިން ޑިރެކްޓަރުކަން ވެސް އަދާކުރައްވާފަ އެވެ.
ޝަހީރަށް ފަހު އެޗްޑީސީގެ ޗެއާމަނަކަށް އައްޔަންކުރަނީ ކާކު ކަމެއް އަދި ނޭނގެ އެވެ.
އެޗްޑީސީއަކީ މި ސަރުކާރުގެ މުހިންމު ޕްރޮޖެކްޓުތަކެއް ހިންގަމުން އަންނަ ކުންފުންޏެކެވެ. އޭގެ ތެރޭގައި ރަސްމާލެ ތަރައްގީކުރުމާއި އެކި ރަށްރަށުގައި ހައުސިން ޕްރޮޖެކްޓުތަކާއި ހިންގުން ހިމެނެ އެވެ. މިހެން ނަމަވެސް މިއަދާ ހަމައަށް އެ ކުންފުންޏާ ހަވާލުކޮށްފައިވާ މަސައްކަތްތައް ނިންމުމުގައި އަދި އެ ކުންފުނީގެ ހަވާލުގެ ދަށުގައިވާ ހުޅުމާލެ އާއި ތިލަފުއްޓާއި ގުޅީފަޅު ތަރައްގީކުރުމުގައި ވެސް މާ ބޮޑު ކުރިއެރުމެއް ނުހޯދެ އެވެ.
