ސަރުކާރު ކުންފުނިތަކުގެ ހިންގުން ހަރުދަނާކުރަން ކަމަށް ބުނެ މުވައްޒަފުން ކަނޑަމުންދާ ދަނޑިވަޅެއްގައި، މާލެ ސިޓީ ކައުންސިލުގެ އިންތިހާބުގައި ޕީއެންސީގެ ޓިކެޓުގައި ވާދަކޮށް ނާކާމިޔާބީއާ ކުރިމަތިލާން ޖެހުނު އައިޝަތު ނިޒްލީ ރަޝީދަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބޮޑު މަގާމެއް ދީފި އެވެ،
އިތުބާރު ހުރި މަސްދަރަކުން އަދަދު ނޫހަށް ބުނި ގޮތުގައި، މި ނިމުނު މަހުގެ ފަހުކޮޅުގައި ނިޒްލީއަށް އެޗްޑީސީގެ އެސިސްޓެންޓް ޑިރެކްޓަރުގެ މަގާމު ވަނީ ދީފަ އެވެ.
"އެއީ 40،000ރ. އަށް ވުރެ ގިނައިން މުސާރަ ލިބޭ ވަޒީފާއެއް. ރައިޓް ސައިޒުކުރަން ކަމަށް ބުނެ މިތަނުގައި ތިބި ގިނަ ދުވަސްވީ ބައެއް މުވައްޒަފުން ވަކިކުރާއިރު، ސިޔާސީ ގޮތުން މުވައްޒަފުން ވައްދަމުން މިދަނީ،" އޭނާ ބުންނެވެ.
މީގެ ކުރިން 2021 ވަނަ އަހަރު ބޭއްވި ސިޓީ ކައުންސިލް އިންތިހާބުގައި ނިޒްލީ ގޮނޑި ކާމިޔާބު ކުރެއްވީ އިދިކޮޅު އެމްޑީޕީގެ ޓިކެޓުގަ އެވެ. ނަމަވެސް، 2024 ވަނަ އަހަރުގެ ތެރޭގައި އޭނާ ވަނީ ޕީއެންސީއަށް ބަދަލުވެފަ އެވެ.
އެޗްޑީސީއަށް ނިޒްލީ އައްޔަންކޮށްފައި މިވަނީ، ސަރުކާރުގެ ހަރަދުތައް އިންތިހާއަށް ބޮޑުވެ މާލީ ދަތިތައް ކުރިމަތިވުމާ ގުޅިގެން ސަރުކާރު ހިއްސާވާ ކުންފުނިތަކުގެ މުވައްޒަފުންގެ ތެރެއިން 33 އިންސައްތަ މުވައްޒަފުން މަދުކުރުމުގެ މަސައްކަތް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ފަށާފައިވާ ދަނޑިވަޅެއްގަ އެވެ.
މިދިޔަ ހަފުތާގައި ރައީސް މުހައްމަދު މުއިއްޒު ވަނީ ކުންފުނިތަކުން 6,000 އަށްވުރެ ގިނަ މުވައްޒަފުން ވަކިކުރާނެ ކަމަށް ވިދާޅުވެފަ އެވެ. ކުންފުނިތަކުން ވަކިކުރަމުންދާ ގިނަ މުވައްޒަފުންނަކީ އެމްޑީޕީގެ މެމްބަރުން ކަމަށް ބުނެ، އިދިކޮޅު އެމްޑީޕީން ވަނީ ބުނެފަ އެވެ.
