ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުގެ މަގާމުތަކަށް ކުރިމަތިލުމުގެ ފުރުސަތު އެ ޕާޓީން ހުޅުވާލައިފި އެވެ.
ޕީއެންސީގެ މަތީ މަޖިލީހުގެ އިންތިހާބު ބޭއްވުމަށް ހަމަޖެހިފައި ވަނީ ސެޕްޓެމްބަރު 15، އިން 18 އަށެވެ. އެ އިންތިހާބު ކުރިއަށް ގެންދާނީ ޕީއެންސީގެ މަތީ މަޖިލީހުގެ ތެރެއިންނެވެ.
ޕީއެންސީގެ މަތީ މަޖިލީހުގައި ވާދަކުރެވޭނީ އެ ޕާޓީގެ ރަސްމީ ދަފުތަރުގައި ހިމެނޭ ފަރާތްތަކުގެ ތެރެއިން ޖިނާއީ ބޮޑު ކުށެއްގެ ރިކޯޑެއް ނެތް ފަރާތްތަކަށެވެ.
ޕީއެންސީގެ މަތީ މަޖިލީހުގެ 49 މަގާމަކަށް މީހުން އައްޔަނުކުރާނެ އެވެ. އެ ޕާޓީގެ އަސާސީ ގަވާއިދު ބުނާ ގޮތުން، އެ ޕާޓީގެ ވެރިކަމެއްގައި ނަމަ، ވެރިކަމުގައި ހުންނަވާ ބޭފުޅަކު މަތީމަޖިލީހަށް އިންތިހާބު ކުރާކަށް ނުޖެހޭނެ އެވެ. ވެރިކަމުގައި ހުރެއްޖެނަމަ، ރައީސުލްޖުމްހޫރިއްޔާއަކީ މަތީ މަޖިލީހުގެ މެންބަރެކެވެ.
އެ މަޖިލީހަށް އިންތިހާބުކުރާ މެންބަރުންގެ ތެރެއިން އެންމެ ގިނަ ބައެއްގެ ސަމާލުކަން ހުއްޓިފައި އޮތީ އެ ޕާޓީގެ ނައިބުރައީސުންގެ މަގާމަށް ކުރިމަތިލެއްވި ބޭފުޅުންނަށެވެ.
އެ މަގާމަށް ޖުމުލަ އަށް ބޭފުޅަކު ކުރިމަތިލައްވާނެކަން ވަނީ މިހައިތަނަށް އިއުލާނުކުރައްވައިފަ އެވެ. ނަމަވެސް، އެ މަގާމަށް އިންތިހާބުކުރަން ޖެހޭ އަދަދަކީ ހައެކެވެ.
