ފާސްކޮށްފައިވާ ޖަބެޓާ އެއްގޮތަށް ފިނޭންސް މިނިސްޓްރީ އިން މާލޭ ސިޓީ ކައުންސިލަށް ދޭންޖެހޭ 19 މިލިއަން ރުފިޔާ ކަނޑާލަން ފިނޭންސް މިނިސްޓަރު ހަސަން ޒަރީރު ނިންމަވައިފި އެވެ.
ދިވެހިރާއްޖޭގެ އާބާދީގެ 42 ޕަސެންޓު ދިރިއުޅޭ މާލޭ ސިޓީގެ މުނިސިޕަލް ހިދުމަތްތައް ހިންގަން އޮންނަ ސިޓީ ކައުންސިލަށް ލިބެންޖެހޭ ބްލޮކް ގްރާންޓް ކަނޑާލަން ޒަރީރު ނިންމެވީ، ސިޓީ ކައުންސިލުން ދައުލަތުގެ ކުނި އުކާ ކުންފުނި ވެމްކޯއަށް ފައިސާތަކެއް ދައްކަންޖެހިފައި އޮތުމުންނެވެ.
ބަޖެޓުގައިވާ ގޮތުން ސިޓީ ކައުންސިލަށް ބްލޮކް ގްރާންޓުގެ ގޮތުގައި 19،285،734 ރުފިޔާ ދޭންޖެހެ އެވެ. ޒަރީރު ނިންމީ އޭގެ ތެރެއިން 19 މިލިއަން ރުފިޔާ ކަނޑާލުމަށެވެ. އެއިރުން ކައުންސިލަށް ދެން ލިބޭނީ އެންމެ 285،734 ރުފިޔާ އެވެ.
އެ މައްސަލައިގައި ސިޓީ ކައުންސިލުން މިއަދު ޒަރީރަށް ފޮނުވި ސިޓީއެއްގައި ބުނެފައި ވަނީ، ބްލޮކް ގްރާންޓް ކަނޑާލައިފި ނަމަ އެ ކައުންސިލުގެ މުވައްޒަފުންނަށް މުސާރަ އާއި އެލެވެންސް ނުދެވޭނެ ކަމަށެވެ.
"ދެންނެވިފައިވާ ފަދައިން 19 މިލިއަން އުނިކުރައްވައިފި ނަމަ އޯގަސްޓު، 2026، ގައި މި އިދާރާގެ މުވައްޒަފުންނަށް ދޭންޖެހޭ މުސާރަ އާއި އެލަވެންސް ދިނުމަށާއި އޮފީސް ހިންގުމުގެ އެހެނިހެން ހަރަދު ކުރުމަށް ދަތިވާނެ،" ކައުންސިލުން ފޮނުވި ސިޓީގައި ބުނެފައިވެ އެވެ.
އެ ސިޓީގައި ކައުންސިލުން އެދިފައި ވަނީ އެކަމާ ގުޅޭ ގޮތުން މަޝްވަރާ ކުރުމަށެވެ.
