ހއ. ފިއްލަދޫގެ ދައްޕަރު ސަރަހައްދުގައި ފަތުރުވެރިކަމުގެ މަޝްރޫއެއް ތަރައްގީކޮށް، ހިންގާނެ ބަޔަކު ހޯދަން ބީލަމަށް ހުޅުވާލައިފި އެވެ.
ފިއްލަދޫ ކައުންސިލުން ގެޒެޓުކުރި އިއުލާނުގައި ބުނީ ފަތުރުވެރިކަމުގެ މަޝްރޫއުއެއް ހިންގަން ކުއްޔަށް ދޫކުރަން ނިންމާފައި ވަނީ އެ ރަށުގެ ފަޅާއެކު 226.13 ހެކްޓަރުގެ ބިން ކަމަށެވެ. އެ ބީލަމުގައި ދިވެހީންގެ އިތުރުން ބޭރުގެ ފަރާތްތަކަށް ވެސް ބައިވެރިވެވޭނެ އެވެ.
ބީލަމުގައި ބައިވެރިވުމުގެ ޝަރުތުތައް:
- އިގުތިސާދީ ތަރައްގީއާ ބެހޭ ވުޒާރާގައި، ގާނޫނު ނަންބަރު 18/2014 ގެ ދަށުން ރަޖިސްޓްރީކޮށްފައިވާ ކުންފުނިތަކާއި ޕާޓްނަޝިޕްއަކަށްވުން
- އިގުތިސާދީ ތަރައްގީއާ ބެހޭ ވުޒާރާގައި، ގާނޫނު ނަންބަރު 19/2014 ގެ ދަށުން ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރިއަކަށްވުން
- އިގުތިސާދީ ތަރައްގީއާ ބެހޭ ވުޒާރާގައި، ގާނޫނު ނަންބަރު 11/2024 ގެ ދަށުން ރަޖިސްޓްރީކޮށްފައިވާ ބޭރުގެ އިންވެސްޓްމަންޓަކަށްވުން
މި މަޝްރޫއަށް ބިން ކުއްޔަށް ދޫކުރުމަށް ހަމަޖެހިފައިވަނީ 50 އަހަރުގެ މުއްދަތަށެވެ. އަދި ކުލީގެ އެއްބަސްވުމުގައި ސޮއިކުރާ ތާރީހުން ފެށިގެން، އެ ތަން ތަރައްގީކުރުމަށް ގިނަވެގެން 36 މަސްދުވަހުގެ މުއްދަތެއް ލިބޭނެ އެވެ.
މި މަޝްރޫއާ ގުޅޭ އިތުރު މައުލޫމާތު ހޯދުމާއި، ބީލަން ފޮތް ބަލައި ފާސްކުރުމާއި ގަތުމުގެ ފުރުސަތު އޯގަސްޓު 20، އިން ފެށިގެން އޯގަސްޓު 31، 2026 ގެ ނިޔަލަށް ރަސްމީ ބަންދު ނޫން ކޮންމެ ދުވަހެއްގެ ހެނދުނު 09:00 އިން މެންދުރުފަހު 1:00 ފިއްލަދޫ ކައުންސިލްގެ އިދާރާއިން ލިބޭނެ ކަމަށް އެ އިއުލާނުގައި ބުންޏެވެ.
