\ބޭރުގެ ކޮންޓްރެކްޓަރުންގެ އަތުން ވިތުހޯލްޑިން ޓެކްސްގެ ގޮތުގައި ނަގާ އަދަދު އިތުރުކުރަން އިންކަމް ޓެކްސް ނެގުމުގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.
މަތިވެރި ދާއިރާގެ މެންބަރު، ހަސަން ޒަރީރު ހުށަހެޅުއްވި އެ އިސްލާހު ރައްޔިތުންގެ މަޖިލީހުން ފާސްކުރީ އިތުރު އެއްވެސް އިސްލާހެއް ނުގެނެސް ބިލު ހުށަހެޅި ގޮތަށެވެ. އެ ބިލު މަޖިލީހުން ފާސްކުރަން 54 މެންބަރުން ވޯޓުދެއްވި އެވެ. ބިލާ ދެކޮޅަށް ވޯޓުދެއްވީ ދެ މެންބަރުންނެވެ.
އިންކަމް ޓެކްސްގެ ގާނޫނަށް ހުށަހެޅި އިސްލާހުގައި ވަނީ ރާއްޖޭގައި ވަޒަންވެރިވެފައިނުވާ ކޮންޓްރެކްޓަރަކަށް ދައްކާ ފައިސާގެ ޖުމުލައިން ވިތުހޯލްޑިން ޓެކުހުގެ ގޮތުގައި އުނިކުރުމަށް ކަނޑައަޅާފައިވާ ފަސް ޕަސެންޓުގެ ބަދަލުގައި އެ އަދަދު 10 ޕަސެންޓަށް އިތުރު ކުރުމަށެވެ.
އެ އަދަދަކީ އެ ކޮންޓްރެކްޓަރުންގެ އަތުން ނަގާ ފައިނަލް ޓެކުހުގެ ގޮތުގައި ކަނޑައެޅުމަށް ވެސް އެ އިސްލާހުގައި ބަޔާންކޮށްފައިވެ އެވެ.
އެ އިސްލާހުގައި ދިވެހިރާއްޖޭގައި ވަޒަންވެރިވެފައި ނުވާ ކޮންޓްރެކްޓަރެއްގެ ގޮތުގައި މާނަކޮށްފައި ވަނީ ރާއްޖޭގައި ވަޒަންވެރިވެފައި ނުވާ އަދި، މުވައްޒަފެއްގެ ގޮތުގައި ނޫން ގޮތަކަށް ކޮންޓްރެކްޓެއް ނުވަތަ އެއްބަސްވުމެއް ނުވަތަ އެހެން އިންތިޒާމެއްގެ ދަށުން ރާއްޖޭގައި އެއްވެސް ބާވަތެއްގެ މުދަލެއް ނުވަތަ ހިދުމަތެއް ފޯރުކޮށްދޭ ފަރާތްތަކާއި އެހެން ފަރާތެއްގެ މުދަލެއް ނުވަތަ ހިދުމަތެއް ރާއްޖޭގައި ފޯރުކޮށްދޭ ނުވަތަ ދިވެހިރާއްޖޭގައި ފޯރުކޮށްދިނުމުގެ ހުއްދަ ދޭ ފަރާތަކަށެވެ.
މި ބަދަލާއެކު އެވަރެޖުކޮށް ދައުލަތުގެ އާމްދަނީ 251 މިލިއަން ރުފިޔާއިން އިތުރުވާނެ ކަމަށް މޯލްޑިވްސް އިންލެންޑް ރެވެނިއު އޮތޯތިޓީއާ ހަވާލާދީ އެ އިސްލާހާއެކު ހުށަހަޅާފައިވާ ކޮސްޓް އެސްޓިމޭޓުގައި ބަޔާންކޮށްފައިވެ އެވެ.
