ހުޅުމާލެ ދެވަނަ ފިޔަވަހީގައި ހުންނަ ދޯދި އަދި ސްޓެލްކޯ ޓަވަރުތައް ކައިރީގައި ފެންބޮޑުވާ މައްސަލަ ހައްލުކޮށްދިނުމަށް މާލެ ސިޓީ ކައުންސިލުން އެދިއްޖެ އެވެ.
ފަހި ދިރިއުޅުން ކޯޕަރޭޝަން އަދި، ހައުސިން ޑިވެލޮޕްމެންޓް ކޯޕަރޭޝަންއަށް މާލެ ސިޓީ ކައުންސިލުން ފޮނުވި ސިޓީއެއްގައި ބުނީ އެ ސަރަހައްދުގެ މަގުތައް ރަނގަޅު ފެންވަރަކަށް ތަރައްގީކޮށްފައި ނުވާތީ، އެ ފްލެޓުތައި ދިރިއުޅޭ އާންމުންނަށް ބޮޑެތި ތަކުލީފުތަކެއް އުފުލަންޖެހިފައިވާ ކަމަށެވެ.
"މަގުތަކުގެ މިހާރުގެ ހާލަތުގެ ސަބަބުން އާންމު ރައްޔިތުންގެ ސަލާމަތާއި ރައްކާތެރިކަމަށް ބޮޑެތި ނުރައްކާތަކެއް ކުރިމަތިވެފައިވާއިރު، ހާއްސަކޮށް ކުޑަކުދިންނާއި އުމުރުން ދުވަސްވީ މީހުންނާއި ހިނގާބިނގާވެ އުޅުމުގައި ނުކުޅުދުންތެރިކަން ހުންނަ ފަރާތްތަކަށް މިކަމުގެ ދަތިކަން ވަނީ އިންތިހާއަށް ބޮޑުވެފަ އެވެ،" މާލެ ސިޓީ ކައުންސިލުން ފޮނުވި ސިޓީގައި ބުންޏެވެ.
ދޯދި ޓަވަރުތަކާއި ސްޓެލްކޯ ފްލެޓުގައި ދިރިއުޅޭ އާންމުންގެ ފަރާތުން ގިނަ ޝަކުވާތަކެއް ލިބެމުންދާ މައްސަލަ މާލެ ސިޓީ ކައުންސިލުގެ ޖަލްސާއަށް ހުށަހަޅައި، އެކަން ހައްލުކޮށްދިނުމަށް އެދި އެޗްޑީސީ އާއި އެފްޑީސީއަށް ސިޓީ ފޮނުވަން ފާސްކުރީ އޯގަސްޓު 5، ގައި އޮތް އެ ކައުންސިލްގެ ޖަލްސާގަ އެވެ.
އެ ސަރަހައްދުގެ މަގުތައް ތަރައްގީކުރަން ނިންމާފައިވާ ގޮތުގެ ޕްލޭން ހިއްސާކޮށްދިނުމަށް ވެސް މާލެ ސިޓީ ކައުންސިލްގެ ސިޓީގައި އެދިފައިވެ އެވެ.
އަމާން ދޯދި ސަރަހައްދުގައި މީހުން ދިރިއުޅެން ފަށާފައިވާއިރު، އެ ސަރަހައްދުގެ މައި މަގުތައް ފިޔަވައި ޓަވަރުތަކަށް ވަންނަން އޮންނަ ބައި އޮންނަނީ ނުހަދަ އެވެ. އެހެން އެތަން އޮތުމުގެ ސަބަބުން ވާރޭވެހި ފެންބޮޑުވުމުން، ފެންގަނޑަށް ނުއެރި ޓަވަރުތަކަށް ވަދެވޭނެ ގޮތެއް ނޯންނަކަމުގެ ޝަކުވާ އެ ސަރަހައްދުގައި ދިރިއުޅޭ ރައްޔިތުން ދަނީ ކުރަމުންނެވެ.
އެހެންނަމަވެސް، މިއަދާ ހަމައަށް އެ ސަރަހައްދު ތަރައްގީކުރުމުގެ މަސައްކަތެއް އެފްޑީސީން ނުކުރެ އެވެ.
