ކޮންމެ މަހެއްގައި ވެސް މުސާރަ ދިނުން ލަސްވާތީ ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ މުވައްޒަފުންނަށް ބޮޑު ތަކުލީފަކަށްވެ، ކަންބޮޑުވުން ފާޅުކޮށްފި އެވެ.
އަދަދު އަށް އެނގިފައިވާ ގޮތުގައި ވެމްކޯއިން މިދިޔަ މަހުގެ މުސާރަ ދިވެހި މުވައްޒަފުންނަށް ދީފައިވަނީ މިއަދު އެވެ. ނަމަވެސް ބިދޭސީ މުވައްޒަފުންނަށް މިހާތަނަށްވެސް މުސާރަ ދީފައި ނުވާ ކަމަށް މައުލޫމާތު ލިބެ އެވެ.
ވެމްކޯގެ މުވައްޒަފުންނަށް މަހު މުސާރަ ޖެހިގެން އަންނަ މަސް ފެށުމުގެ ކުރިން އާންމުކޮށް ކުރިން ދެ އެވެ. ނަމަވެސް މިދިޔަ އަހަރު ވަކި ހިސާބަކުން ފެށިގެން މަހު މުސާރަ ދެނީ ޖެހިގެން އަންނަ މަހު 5 ހިސާބުގަ އެވެ. އެއަށްފަހު މިހާރު މުސާރަ ދެމުން އަންނަނީ މަހުގެ 10 ހިސާބުގަ އެވެ.
މިކަމާ ގުޅިގެން ވެމްކޯގެ މުވައްޒަފުން ދަނީ ކަންބޮޑުވުން ފާޅުކުރަމުންނެވެ. އެ މުވައްޒަފުން ބުނާ ގޮތުގައި މުސާރަ ދިނުން ލަސްވުމުގެ ސަބަބުން ކުއްޔާއި ބިލުތައް ދައްކާ ދުވަސް ލަސްވުމުން ޖޫރިމަނާތައްވެސް ދައްކަންޖެހެ އެވެ.
"ޑޭޓެއް ކަނޑައަޅާފައި ދައްކަންޖެހޭ ބިލްތައްވެސް ހުރޭ. އެއިންނަ ޑޭޓްގެ ލާރި ނުދެއްކެންޏާ ދެން ލާރި ބަލައިގަންނާނީ ޖޫރިމަނާއާ އެކީގައި. މިކަންކަމުގެ ޒިންމާއެއް ހަމަ ގައިމުވެސް ވެމްކޯއިން ނަގާކަށް ނުޖެހޭ. މަހުގެ 10 އަކާ ހަމައަށްދާއިރު ސަރުކާރު ކުންފުންޏެއްގެ ނިމިދިޔަ މަހުގެ މުސާރަ ނުދެވި އޮތުމަކީ ވަރަށް ދެރަ ކަމެއް،" ވެމްކޯގެ މުވައްޒަފަކު ބުންޏެވެ.
ވެމްކޯގެ އިތުރު މުވައްޒަފަކު ބުނީ ކޮންމެ މަހެއްގެ ކުއްޔާއި ބިލުތައް ދައްކަން ވަކި މުއްދަތެއް ކަނޑައެޅިފައިވާއިރު، ލަހުން އެ ފައިސާ ޖެހުމުން ގޭގެ އޯނަރުންގެ ޕްްރެޝަރުވެސް ކުރިމަތިވާ ކަމަށެވެ.
"ކޮންމެ މަހަކު ވަކި ދުވަހެއް އެބަ އިނދޭ ކަނޑައަޅާފައި ކުލި ދައްކަން. ބިލުތައް ދައްކަންވެސް. އެ މުއްދަތުގައި ކުއްޔާއި ބިލުތައް ނުދެއްކުމުން ގޭގެ އޯނަރުގެ ފަރާތުންވެސް ޕްރެޝަރު އެބަ ކުރިމަތިވޭ. އޭގެ ސަބަބުން ލަދުވެސް ގަންނަން އެބަޖެހޭ،" މުވައްޒަފަކު ބުންޏެވެ.
ވެމްކޯގެ މުސާރައިގެ މައްސަލަ ބޮޑުވެ މިދިޔަ މަހުގެ މުސާރަ އަދިވެސް ނުލިބޭ
އަދަދު އަށް އެނގިފައިވާ ގޮތުގައި އާންމު ގޮތެއްގައި ކޮންމެ މަހެއްގެ އެއްވަނަ ދުވަހު މުވައްޒަފުންނަށް މުސާރަ ދޭ ވެމްކޯއަށް މި އަހަރު ފެށުނުފަހުން މުސާރަ ދިނުމުގައި ލަސްތަކެއް ދިމާވާން ވަނީ ފަށާފައި.
މީގެއިތުރުން ވެމްކޯގައި މަސައްކަތްކުރާ ބިދޭސީ މުވައްޒަފުން މި ނޫހަށް ބުނީ އެ މުވައްޒަފުންނަށް މުސާރަ ލިބެނީ އާންމުގޮތެއްގައި މިހާރު މަހުގެ 15 ހިސާބުގައި ކަމަށެވެ. އެގޮތުން އޭގެ ސަބަބުން ގައުމަށް ލާރި ފޮނުވުމުގައި ލަސްވާތީ ވަރަށް ގިނަ ގޮންޖެހުންތަކާ ކުރިމަތިވަމުންދާ ކަމަށް އެ މުވައްޒަފުން ބުންޏެވެ.
ވެމްކޯގެ މުވައްޒަފުންގެ މުސާރައިން ކަނޑާ ޕެންޝަން ފައިސާ، އެ މުވައްޒަފުންގެ ޕެންޝަން ފައިސާ އޮކްޓޯބަރު 16، 2024، އިން ފެށިގެން ޖަމާނުކުރެ އެވެ. ނަމަވެސް މުވައްޒަފުންނަށް މުސާރަ ދޭއިރު ޕެންޝަނަށް ފައިސާ ކަނޑަ އެވެ. އެއީވެސް މުވައްޒަފުންގެ ކަންބޮޑުވުމެކެވެ.
މުވައްޒަފުންނަށް ޕެންޝަން ފައިސާ ނުދޭ ކަމަށް ވެމްކޯއިން ވަނީ އެއްބަސްވެ، އުޒުރަކަށް މާލެ ސިޓީ ކައުންސިލުން އެތަނަށް ލިބެންޖެހޭ ގިނަ އަދަދެއްގެ ފައިސާ ނުލިބޭ ކަމަށް ބުނެފަ އެވެ. އެ ފައިސާ ވެމްކޯއަށް ދިނުމަށް ކަމަށް ބުނެ ފިނޭންސް މިނިސްޓްރީން މިދިޔަ މަހު ވަނީ މާލޭ ސިޓީ ކައުންސިލަށް ދޭންޖެހޭ 19 މިލިއަން ރުފިޔާގެ ބްލޮކް ގްރާންޓް ކަނޑާލާފަ އެވެ.
ސަރުކާރު ކުންފުނިތަކުގެ ތެރެއިން އެންމެ ގިނަ އަދަދަކަށް މުވައްޒަފުން ގެންގުޅޭ އެއް ކުންފުނި، ވެމްކޯއަށް މިދިޔަ އަހަރު އެކަނިވެސް މުވައްޒަފުންގެ މުސާރަ އާއި އިނާޔަތްތަކަށް 439.6 މިލިއަން ރުފިޔާ ހަރަދުކުރިކަން ތަފާސްހިސާބުތަކުން ދައްކަ އެވެ.
މިދިޔަ އަހަރުގެ ނިޔަލަށް އެ ކުންފުނީގައި 3,500 އެއްހާ މުވައްޒަފުން ތިބިއިރު، މިދިޔަ އެޕްރީލް މަހު ބޭއްވި ކައުންސިލް އިންތިހާބުގެ ކެމްޕެއިނުގެ ތެރެއިން ގިނަ އަދަދެއްގެ މުވައްޒަފުން ވެމްކޯއަށް ނަގާފައިވާކަން ފާހަގަކުރެވެ އެވެ.
ޕީސީބީން ބުނާ ގޮތުގައި ވެމްކޯއަށް 2024 ވަނަ އަހަރު 138 މިލިއަން ރުފިޔާ ގެއްލުންވި އެވެ. އެ ކުންފުންޏަށް މިދިޔަ އަހަރު އެންމެ ބޮޑު ގެއްލުމެއްވީ 55 މިލިއަން ރުފިޔާއާއެކު ފަހު ކުއާޓާގަ އެވެ. އެ ކުންފުންޏަށް 2024 ވަނަ އަހަރު 61 މިލިއަނުގެ ގެއްލުމެއް ލިބުނުއިރު، 2023 ގައި 93 މިލިއަނުގެ ގެއްލުމެއް ލިބިފައިވެ އެވެ.
