ލާމަރުކަޒީ ގާނޫނަށް ގެންނަން އުޅޭ އިސްލާހު ފާސް ކުރަން ގޮވާލައި ސަރުކާރު އަޑީގައި އޮވެ ހުށަހަޅާފައިވާ ޕެޓިޝަނަށް މަޖުބޫރުން ސޮއި ހޯދުމުގެ ހުރިހާ ގެއްލުމެއް ލިބޭނީ ހަމަ ސަރުކާރަށް ކަމަށް އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސަރުކާރުން ޕެޓިޝަނެއް ހުށަހަޅައިގެން މި އުޅެނީ، ބޭނުންވާ ކޮންމެ އިރަކު ރަށްރަށުގެ ބިންބިން ދައުލަތަށް ހޯދަން ހުށަހަޅާފައިވާ އިސްލާހު ފާސްކުރަން ގޮވާލަ އެވެ. އެ ޕެޓިޝަން ހުށަހެޅީ، އިސްލާހު ބޭރު ކުރަން އާންމުން ޕެޓިޝަނެއް ހުށަހެޅުމުންނެވެ.
ސަރުކާރު ޕެޓިޝަނުގައި ސޮއި ހޯދަން މަޖުބޫރު ކުރާތީ، އެކަމާ ގުޅިގެން ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުން ދަނީ ޕެޓިޝަނުގައި ސޮއި ހޯދުމަށްޓަކައި އާންމުންނަށް ބިރު ދައްކަމުން ކަމަށެވެ.
"ސަރުކާރަށް ތާއީދު ކުރާ މީހުން ކަމަށް ބުނާ މީހުންގެ ޕެޓިޝަނެއް މަޖިލީހަށް ހުށަހެޅުމަށް ގެންދާ މަސައްކަތުގައި އެސްއޯއީތަކުގެ މުވައްޒަފުންނަށް އެ އަންނަނީ މަޖުބޫރު ކުރުވަމުން. ރަށްރަށުގެ އެސްއޯއީތަކުގެ މުވައްޒަފުންނަށް ސަރުކާރުން ދަނީ ބިރު ދައްކަމުން،" ނަޝީދު ވިދާޅުވި އެވެ.
ނަޝީދު ވިދާޅުވީ އެގޮތަށް މަޖުބޫރުކޮށްގެން ސޮއި ހޯދުމުން، ސަރުކާރަށް ހަގީގަތުގައި ތާއީދު އޮތް މިންވަރެއް ވެސް ތާއީދު ނެތް މިންވަރެއް ވެސް ނޭނގޭނެ އެވެ.
"ކަމެއްގައި ތާއީދު އޮތް ކަމަށް ދައްކަން ރައްޔިތުންނަށް ބިރު ދައްކައިގެން ސޮއި ހަމަކުރުމުގެ ބޮޑު ގެއްލުން ހަމަ ސަރުކާރަށް. އެ ގެއްލުމަކީ ރައްޔިތުންގެ ތާއީދު ހުރި ނެތް މިންވަރު ހުދު ސަރުކާރަށް ވެސް އޮޅުން،" އެމަނިކުފާނު ވިދާޅުވި އެވެ.
ރަށްރަށުގެ ބިން އަތުލުމުގެ ބާރު ގާނޫނުގެ ދަށުން މިހާރު ވެސް ސަރުކާރަށް ލިބެ އެވެ. އެކަމަކު މިހާރު ހުށަހަޅައިގެން އުޅޭ އިސްލާހު ފާސްވެއްޖެ ނަމަ ބިން އަތުލުމުގެ މަރުހަލާ ފަސޭހަވެގެންދާނެ އެވެ.
ލާމަރުކަޒީ ގާނޫނަށް ހަންނާނު މިހާރު ހުށަހަޅުއްވައިގެން އުޅޭ އިސްލާހުގެ ސަބަބުން އަންނާނެ ބަދަލަކީ، މަންޒަރުން ކައުންސިލުތައް ފޮހެވުމެވެ. ކައުންސިލުން ބިން ކަނޑައިދެން ދެން، އިދާރީ ކަންކަން ހަމަޖައްސަން ދެން ސަރުކާރުން މަޑުކުރަންޖެހޭ ކުރުން އެއިރުން ނިމުމަކަށް އަންނާނެ އެވެ.
