ސަރުކާރުގެ ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރުމަކީ ރައީސް މުހައްމަދު މުއިއްޒުގެ ރިޔާސީ ވައުދަކަށް ވީނަމަވެސް، ހަމައެކަނި މިނިސްޓްރީ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސްގައި ތިބި ސިޔާސީ މުވައްޒަފުންގެ އަދަދު 386 އަށް އަރައިފި އެވެ.
ސަރުކާރުގެ ސިޔާސީ މުވައްޒަފުންގެ އަދަދު ހޯދުމަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނު ދަށުން އެކި ފަރާތްތަކުން ތަކުރާރުކޮށް ހުށަހެޅި ހުށަހެޅުންތަކަށް، ރައީސް އޮފީހުން އަދި ފިނޭންސް މިނިސްޓްރީތަކުން ވެސް ޖަވާބު ދީފައެއް ނުވެ އެވެ.
ނަމަވެސް ޔޫތު މިނިސްޓްރީގައި ތިބި ސިޔާސީ މުވައްޒަފުންގެ ލިސްޓު އިތުބާރު ކުރެވޭ މަސްދަރަކުން އަދަދު ނޫހަށް ވަނީ ލިބިފަ އެވެ. އެއީ ސައްހަ ލިސްޓެއްކަން އެހެން ބައެއް މަސްދަރުތަކުން ވެސް ކަށަވަރުކުރެވުނެވެ.
ޔޫތު މިނިސްޓްރީގެ ސިޔާސީ މަގާމުތަކުގެ ތަފްސީލު (386 މުވައްޒަފުން):
- ޔޫތު އެސޯސިއޭޓް: 99
- ސީނިއާ ޕޮލިޓިކަލް ޑިރެކްޓަރުން: 136
- ޕޮލިޓިކަލް ޑިރެކްޓަރުން: 86
- ޑެޕިއުޓީ މިނިސްޓަރުން: 39
- އެސިސްޓެންޓް ޕޮލިޓިކަލް ޑިރެކްޓަރުން: 17
- ސްޓޭޓް މިނިސްޓަރުން: 4
- ވަޒީރުންނާއި ވަޒީރުންގެ ފެންވަރު: 3 (މިނިސްޓަރު، ކޮމިޝަނަރ އޮފް ސްޕޯޓްސް، އަދި އެޑްވައިޒަރު)
- އެހެނިހެން ހާއްސަ ސިޔާސީ މަގާމުތައް: 3 (ސްޕޯޓްސް ޑިސެންޓްރަލައިޒޭޝަން އެޑްވައިޒަރު، ޑެޕިއުޓީ ކޮމިޝަނަރ އޮފް ސްޕޯޓްސް، އަދި މިނިސްޓަރުގެ ޕާސަނަލް އެސިސްޓެންޓް)
މިދިޔަ އަހަރުގެ ޖުލައި މަހުގެ ތެރޭގައި ރައީސް އޮފީހުން ހާމަކޮށްފައިވާ މައުލޫމާތުތަކަށް ބަލާއިރު، އެ ވަގުތު ސަރުކާރުގެ ސިޔާސީ މަގާމުތަކުގައި ތިބީ 922 މުވައްޒަފުންނެވެ. އެއީ؛
- ވަޒީރުންގެ ގޮތުގައި 20 ބޭފުޅުން
- ވަޒީރުންގެ ފެންވަރުގައި 14 ބޭފުޅުން
- ސްޓޭޓް މިނިސްޓަރުންގެ ގޮތުގައި 93 ބޭފުޅުން
- ސްޓޭޓް މިނިސްޓަރުންގެ ފެންވަރުގައި 7 ބޭފުޅުން
- ޑެޕިއުޓީ މިނިސްޓަރުންގެ ގޮތުގައި 216 ބޭފުޅުން
- ޑެޕިއުޓީ މިނިސްޓަރުންގެ ފެންވަރުގައި 20 ބޭފުޅުން
- ސީނިއާ ޕޮލިޓިކަލް ޑިރެކްޓަރުންގެ ގޮތުގައި 318 ބޭފުޅުން
- ސީނިއާ ޕޮލިޓިކަލް ޑިރެކްޓަރުންގެ ފެންވަރުގައި 8 ބޭފުޅުން
- ޕޮލިޓިކަލް ޑިރެކްޓަރުންގެ ގޮތުގައި 169 ބޭފުޅުން
- ޕޮލިޓިކަލް ޑިރެކްޓަރުންގެ ފެންވަރުގައި 4 ބޭފުޅުން
- އެސިސްޓެންޓް ޕޮލިޓިކަލް ޑިރެކްޓަރުންގެ ގޮތުގައި 4 ބޭފުޅުން
- އެހެނިހެން ސިޔާސީ މަގާމުތަކުގައި 49 ބޭފުޅުން
ރައީސް މުއިއްޒުގެ ރިޔާސީ ވައުދަކީ ސިޔާސީ މުވައްޒަފުންގެ މުޅި ޖުމްލަ 700 އަށް ވުރެ އިތުރު ނުކުރުން ކަމަށް ވާއިރު، ރައީސް އޮފީހުން އެންމެ ފަހުން އާންމުކުރި އެ މައުލޫމާތުންވެސް ވައުދަށް ވުރެ 222 މުވައްޒަފުން އިތުރުވެފައިވާކަން ސާފުވެ އެވެ.
މިހާރު ކެބިނެޓުގައި ތިއްބެވީ 16 ވަޒީރުން ކަމަށް ވާއިރު، އެހެން އޮފީސްތަކާއި މިނިސްޓްރީތަކުގެ ސިޔާސީ މުވައްޒަފުންގެ ވަކިވަކި ތަފްސީލުތައް ސަރުކާރުން އަދިވެސް ހާމައެއް ނުކުރެ އެވެ.
ނަމަވެސް، އެންމެ މިނިސްޓްރީއެއްގައި 386 ސިޔާސީ މުވައްޒަފުން ތިބިއިރު، އިދިކޮޅު ފަރާތްތަކުން ކުރިން ވެސް ބުނެފައި ވަނީ ސިޔާސީންގެ އަދަދު 2000 އަށް ވުރެ މަތިވާނެ ކަމަށެވެ.
މި ސަރުކާރުގައި ޔޫތު މިނިސްޓްރީ އާއި ސްޕޯޓްސް މިނިސްޓްރީ ކުރިން ހިންގަމުން ދިޔައީ ވަކި ދެ މިނިސްޓްރީއެއްގެ ގޮތުގަ އެވެ. ނަމަވެސް އޭޕްރީލް މަހު އޭރުގެ ޔޫތު މިނިސްޓަރު އިބްރާހިމް ވަހީދު (އަސްވާޑު) ހިމެނޭ ގޮތަށް ގިނަ ވަޒީރުންތަކެއް މަޖުބޫރުވެގެން އިސްތިއުފާ ދެއްވުމުން، ޔޫތު މިނިސްޓްރީ އާއި ސްޕޯޓްސް މިނިސްޓްރީގެ ޒިންމާތައް ވަނީ އެއް މިނިސްޓްރީއަކަށް ބަދަލުކޮށްފަ އެވެ.
ސަރުކާރުގެ ސިޔާސީ މަގާމުތަކުގެ އިތުރުން ސަރުކާރުގެ ކުންފުނިތަކުގެ އެކި ގިންތީގެ މަގާމުތަކަށް ވެސް ސިޔާސީ ގޮތުން މީހުން ވައްދާފައި އެބަ ތިއްބެވެ.
