ދިވެހިރާއްޖެއަށް ދިމާވެފައިވާ މާލީ އަދި އިގްތިސާދީ ދަތިތަކުން އަރައިގަތުމަށްޓަކައި، ކިބުރުވެރިކަން އިސްނުކޮށް އިދިކޮޅު އެމްޑީޕީއާ މަޝްވަރާ ކުރަން އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
މިއަދު އެކްސްގައި ކުރެއްވި ޕޯސްޓެއްގައި ޑޮލަރުގެ ވާހަކަ ދައްކަވަމުން ނަޝީދު ވިދާޅުވީ، ރާއްޖޭގައި ހައިޕާ އިންފްލޭޝަން އުފެދުމުގެ ކުރިން ސަރުކާރުން އެމްޑީޕީއާ މަޝްވަރާ ކުރަންޖެހޭ ކަމަށެވެ.
"ޑޮލަރެއްގެ އަގު 23 ރުފިޔާގެ މައްޗަށް ގޮސް، ރާއްޖޭގައި ހައިޕާ އިންފްލޭޝަން އުފެދި، ތަކެތީގެ އަގު އިންތިހާއަށް އުފުލިގެން ނުދަނީ ސަރުކާރުން އެމްޑީޕީއާ ވާހަކަ ދެއްކުން ބޭނުންތެރި. ސަރުކާރުން ކިބުރުވެރިކަން އިސްކުރަނީ ނަމަ ގެއްލުން ލިބޭނީ ރާއްޖެއަށް، ދިވެހިންނަށް،" ނަޝީދު ވިދާޅުވި އެވެ.
މީގެ ކުރިން، ގާނޫނުއަސާސީއަށް ނަޝީދު ހުށަހަޅަން ބޭނުންވެވަޑައިގަންނަވާ "ބޮޑު ބަދަލު" ގެ ކަންކަމުގައި މަޝްވަރާ ކުރަން ވެސް އެމަނިކުފާނު ސަރުކާރަށް ދައުވަތު ދިނެވެ. އަދި އޭގެ ފަހުން އިންޑިއާގެ ކަރަންސީ ސްވޮޕު ރޯލްއޯވާ ކުރުމުގެ ކަންކަމުގައި ވެސް ސަރުކާރާ މަޝްވަރާ ކުރަން އެމަނިކުފާނު ބޭނުންވެވަޑައިގެންނެވި އެވެ.
ސަރުކާރުން މަޝްވަރާގެ މޭޒަށް އަންނަންދެން އިހުތިޖާޖު ކުރައްވާނެ ކަމަށް ވެސް މީގެ ކުރިން ނަޝީދު ވިދާޅުވެފައިވެ އެވެ.
"މަޝްވަރާގެ މޭޒަށް ވަޑައިގަންނަވާ ނޫނީ އަޅުގަނޑުމެން ތާ އަބަދު މި މަސައްކަތް ކުރުމުގައި މަގުމަތީގައި ދެމިތިބޭނަން. ރާއްޖޭގެ ރަށްރަށަށް ވެސް އަޅުގަނޑުމެން ދާނަން، ރައީސް މުއިއްޒު އާއި ސަރުކާރު މަޝްވަރާގެ މޭޒަށް ވަޑައިގަންނަވަން ދެން އަޅުގަނޑުމެން މިކަމުގައި ދެމި ތިބޭނަން،" އޭޕްރީލް 21، ގައި ނަޝީދު ވިދާޅުވި އެވެ.
ނަމަވެސް އިދިކޮޅު ޕާޓީތަކާ މަޝްވަރާ ނުކުރައްވާނެ ކަމަށް މުއިއްޒު ވަނީ އޭޕްރީލް 20، ގައި އިއުލާނު ކުރައްވައިފަ އެވެ. އެމަނިކުފާނު ވިދާޅުވީ، އިދިކޮޅު ޕާޓީތަކާ މަޝްވަރާ ކުރުން ރައްޔިތުން އެމަނިކުފާނާ ހަވާލު ކުރި މެންޑޭޓާ ހިލާފު ކަމަށެވެ.
"އަޅުގަނޑު ހިތުން ރައްޔިތުން އަޅުގަނޑަށް ދީފައިވާ މެންޑޭޓުން ބޭރު ކަމެއް އެއީ. ރައްޔިތުން އަޅުގަނޑަަށް ދީފައިވާ މެންޑޭޓަކީ ފަސް އަހަރުގެ ދައުރެއް ތިމަންނަމެން ހަވާލުކުރީއޭ، އަޅުގަނޑު އިއުލާނުކުރި މެނިފެސްޓޯ އާއި ވައުދުތަކާ އެއްގޮތަށް ކަންކަން ކުރަން. އެހެންވީމަ އަޅުގަނޑު ދާނީ ރައްޔިތުން އަޅުގަނޑާ ހަވާލުކުރި މަސައްކަތައިގެން ކުރިއަށް،" މުއިއްޒު ވިދާޅުވި އެވެ.
