އިންޑިއާގެ މޮޑެލްއެއްގެ އިތުރުން އެކްޓަރެއްގެ ގޮތުގައި މަސައްކަތްކުރި އުމުރުން 33 އަހަރުގެ އަންހެނަކު ކައިވެނިކުރިތާ ފަސް މަސް ފަހުން، އޭނާ ދިރިއުޅޭ ގޭގައި މަރުވެފައި އޮއްވާ ފެނުނު މައްސަލައިގައި އެ ގައުމުގެ ފެޑަރަލް ފުލުހުން ދައުވާ އުފުލައިފި އެވެ.
މިދިޔަ މެއި މަހުގެ 12 ވަނަ ދުވަހު ބޯޕާލް ސިޓީގައި ޓްވިޝާ ޝަރުމާ މަރުވި ހާދިސާއާ ގުޅިގެން މީޑިއާގެ ބޮޑު ސަމާލުކަމެއް އެ މައްސަލައަށް ހުއްޓުނެވެ. އަދި އެއީ މީހަކު މަރާލުމުގެ ހާދިސާއެއްތޯ ނުވަތަ އަމިއްލައަށް މަރުވުމުގެ ހާދިސާއެއްތޯ ކުރެވުނު ބަހުސްތަކާއެކު، ކޮންމެ ދުވަހަކު ވެސް އެ މައްސަލައިގެ ހަބަރުތައް އައީ ފެންނަމުންނެވެ.
އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އިން ހުށަހެޅި ދައުވާ ފޯމުގައި، ޓްވިޝާގެ ފިރިމީހާ އާއި އޭނާގެ މައިދައިތަގެ މައްޗަށް އުފުލާފައިވަނީ އަމިއްލައަށް މަރުވާން ހިތްވަރު ދިނުމާއި އިހާނެތިކޮށް ހިތުމުގެ ދައުވާ އެވެ.
ޓްވިޝާގެ ފިރިމީހާ އަދި ވަކީލެއްގެ ގޮތުގައި މަސައްކަތް ކުރާ ސަމަރުތު ސިންގް އާއި، އޭނާގެ މަންމަ އަދި ރިޓަޔާޑް ފަނޑިޔާރެއް ކަމަށްވާ ގިރިބާލާ ސިންގް ވަނީ އެމީހުންގެ މައްޗަށް ކުރެވޭ ތުހުމަތުތަކަށް އިންކާރުކޮށްފަ އެވެ.
ޓްވިޝާގެ މަރުގެ މައްސަލައަށް އިންޑިއާގައި މިހާ ބޮޑު ސަމާލުކަމެއް ލިބުނީ، އާންމު ރައްޔިތުން ގަބޫލުކުރާ ގޮތުގައި އިންޑިއާގެ ނުފޫޒުގަދަ ޝަރުއީ ދާއިރާގެ ބޭފުޅުންނަކީ ނަމޫނާ ދައްކަންޖެހޭ ބަޔަކަށް ވާތީ އެވެ.
ޓްވިޝާގެ މައިންބަފައިންނާއި އާއިލާގެ މެންބަރުން ތުހުމަތުކުރާ ގޮތުގައި، ރަންކިޔުމުގެ ކަންކަމާ ގުޅިގެން ސަމަރުތު އާއި އޭނާގެ މަންމަ ޓްވިޝާއަށް އަނިޔާކޮށްފައިވެ އެވެ. އަދި ޓްވިޝާ މަރާލީ ކަމަށް ވެސް އާއިލާއިން ތުހުމަތުކުރެ އެވެ.
ގިރިބާލާ ވަނީ އެ ތުހުމަތުތަކަކީ "އަސާސެއް ނެތް" ވާހަކަތަކެއް ކަމަށް ބުނެފަ އެވެ. އޭނާ ބުނި ގޮތުގައި ޓްވިޝާގެ ނަފްސާނީ މައްސަލަތަކެއް ހުރި ކަމަށާއި އޭނާ މަރުވީ އަމިއްލައަށެވެ. މި ހާދިސާއަށް ފަހު ސަމަރުތު ފިލައިގެން އުޅުމަށްފަހު ފަހުން ފުލުހުންނާ ހަވާލުވިއިރު، އޭގެ ދުވަސްކޮޅެއް ފަހުން ގިރިބާލާ ވެސް ވަނީ ހައްޔަރުކޮށްފަ އެވެ. މި ދެމައިން މިހާރު ވެސް ތިބީ ޖަލުގަ އެވެ.
މިދިޔަ ހަފުތާގައި ކޯޓަށް ހުށަހެޅި 600 ސަފުހާގެ ދައުވާ ފޯމުގައި ސީބީއައި އިން ބުނެފައިވަނީ، ދައުވާލިބޭ ދެ މީހުން (ޓްވިޝާގެ ފިރިމީހާ އާއި މައިދައިތަ) މެދުނުކެނޑި ދެމުންދިޔަ ނަފްސާނީ އަނިޔާތަކުގެ ސަބަބުން، އަމިއްލަ ފުރާނަ ދުއްވާލުން ނޫން އިތުރު ގޮތެއް ޓްވިޝާއަށް ނެތް ކަމަށެވެ.
މޮޑެލްއެއްގެ އިތުރުން އެކްޓަރެއްގެ ގޮތުގައި މަސައްކަތްކުރި ޓްވިޝާ ވަނީ 2012 ވަނަ އަހަރު އިންޑިއާގެ ހުޅަނގުގެ ސިޓީއެއްގައި ބޭއްވި ރީތީގެ މުބާރާތަކުން "މިސް ޕޫނޭ" ގެ ތާޖު ކާމިޔާބުކޮށްފަ އެވެ. އޭނާ ވަނީ ގިނަ އިޝްތިހާރުތަކެއްގެ އިތުރުން ތެލުގޫ ބަހުން އުފެއްދި ފިލްމެއްގައި ވެސް މަސައްކަތްކޮށްފަ އެވެ. ފަހަކަށް އައިސް އޭނާ މަސައްކަތް ކުރަމުންދިޔައީ އަމިއްލަ ކުންފުނިތަކުގެ މާކެޓިން ދާއިރާގަ އެވެ.
ދައުވާ ފޯމުގައިވާ ގޮތުން، ޓްވިޝާ އާއި ސަމަރުތު ބައްދަލުވީ 2025 ވަނަ އަހަރުގެ ފެބްރުއަރީ މަހު ޑޭޓިން އެޕެއްގެ މެދުވެރިކޮށެވެ. އަދި އެ ދެމީހުން ކައިވެނިކުރީ އެ އަހަރުގެ ޑިސެމްބަރު މަހު އެވެ.
ސީބީއައި އިން ބުނި ގޮތުގައި، ކައިވެންޏަށްފަހު ސަމަރުތު ވަނީ އެކި ފަހަރުމަތިން ޓްވިޝާއަށް ނަފްސާނީ ގޮތުން އަނިޔާކޮށް، ހުތުރު ބަހުން މުހާތަބުކޮށްފަ އެވެ. އަދި ޓްވިޝާއަށް ނަފްސާނީ އަނިޔާ ދިނުމަށް ގިރިބާލާ ސިންގް އޭނާގެ ދަރިފުޅަށް އެކި ފަހަރުމަތިން ހިތްވަރު ދީފައިވާ ކަމަށްވެސް ތަހުގީގަށް އެނގިފައިވާ ކަމަށް ބުނެފައިވެ އެވެ.
ޓްވިޝާގެ އާއިލާއިން ބުނާ ގޮތުގައި، އޭނާ އާއި ފިރިމީހާގެ އާއިލާއާ ދެމެދު އެންމެ ބޮޑު މައްސަލައެއް ޖެހުނީ އޭޕްރީލް މަހު ޓްވިޝާ ބަލިވެ އިނުމާ ގުޅިގެންނެވެ. އާއިލާއިން ތުހުމަތުކުރާ ގޮތުގައި، ޓްވިޝާގެ ފިރިމީހާ އާއި މައިދައިތަ ވަނީ އޭނާގެ އަބުރާ ބެހި، އެއީ އެހެން މީހެއްގެ ދަރިއެއް ކަމަށް ތުހުމަތުކޮށްފަ އެވެ. އަދި މެއި މަހުގެ ފުރަތަމަ ހަފުތާގައި އޭނާ ލައްވައި މަޖުބޫރުން ދަރި ވައްޓާލުވާފައިވާ ކަމަށް ވެސް އާއިލާއިން ބުނެ އެވެ.
ނަމަވެސް ގިރިބާލާ ސިންގް ވަނީ މި ތުހުމަތުތައް ދޮގުކޮށްފަ އެވެ. އޭނާ ބުނި ގޮތުގައި ދަރި ވައްޓާލަން ބޭނުންވީ ޓްވިޝާ އަމިއްލައަށެވެ.
ޓްވިޝާ މަރުވިތާ މަދު ދުވަސްކޮޅެއްގެ ތެރޭގައި، ކުރީގެ ފަނޑިޔާރު ގިރިބާލާ ވަނީ ނޫސްވެރިންގެ ބައްދަލުވުމެއް ބާއްވައި، ޓްވިޝާގެ ނަފްސާނީ މައްސަލަތަކާ ބެހޭގޮތުން ވާހަކަދައްކައި، އޭނާއަކީ "މިނިވަން ޚިޔާލުގެ" (ލިބަރަލް) މީހެއް ކަމަށް ބުނެފަ އެވެ. އެ ބަހުގެ މާނަ އޮޅުންފިލުވައިދިނުމަށް ނޫސްވެރިއަކު އެދުމުން، އޭނާ ވަނީ ޓްވިޝާގެ އަޚުލާގާ ބެހޭގޮތުން ހުތުރު ވާހަކަތަކެއް ދައްކާފަ އެވެ.
މި ވާހަކަތަކާ ގުޅިގެން އާންމުންގެ ބޮޑު ނުރުހުމެއް އަމާޒުވިއިރު، ޓްވިޝާގެ ބައްޕަ ބުނީ އެއީ އޭނާގެ ދަރިފުޅު ބަދުނާމު ކުރުމަށް ކުރި މަސައްކަތެއް ކަމަށެވެ.
