ސަރުކާރުން ހުށަހެޅި ގޮތަށް ބޭރު ފައިސާއާ ބެހޭ ގާނޫނު ބަދަލުކުރަން މާލިއްޔަތު ކޮމިޓީން ފާސްކުރުމަށް ފަހު ތަޅުމަށް ފޮނުވުމުން، އަދިވެސް އިތުރު ބަދަލުތަކެއް ގެންނަން ޖެހޭ ކަމަށް ބުނެ އެ ބިލު އިތުރަށް ދިރާސާކުރަން އަލުން ކޮމިޓީއަށް ފޮނުވަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
މަޖިލީހުގެ ޖަލްސާގައި ބޭރު ފައިސާއާ ބެެހޭ ގާނޫނަށް ގެންނަ ބަދަލުތައް ފާސްކުރަން ފެނޭތޯ ނެގި ވޯޓުގައި ބައިވެރިވީ 58 މެންބަރުން ވެސް ވޯޓު ދިނީ ބިލު ދިރާސާކުރަން އަނބުރާ ކޮމިޓިއަށް ފޮނުވާލަން ފެންނަ ކަމަށެވެ.
އެ ބިލު ކޮމިޓީއަށް ފޮނުވާލިއިރު، މާލިއްޔަތު ކޮމިޓީން ފޮނުވި ރިޕޯޓަށް ބަހުސްކުރި ވަގުތު މި ގާނޫނު އިތުރަށް ހަރުކަށި ކުރަން ޖެހޭ ކަމަށް، ސަރުކާރު ހިންގާ އަދި މަޖިލީހުގެ ސުޕަ މެޖޯރިޓީ އޮންނަ ޕީއެންސީގެ މެންބަރުން ވަކާލާތުކުރި އެވެ. މި ގޮތަށް އަޑުއުފުލުމުގައި އެންމެ އިސްކޮށް ހުންނެވީ ޕާލިމެންޓަރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހެވެ.
ފަލާހު ވިދާޅުވި ގޮތުގައި ޑޮލަރު މާރުކޮށްގެން ވަރަށް ގިނަ ފައިދާތަކެއް ލިބިއްޖެ ކަމަށެވެ. މިހެން ނަމަވެސް ހުރިހާ ރިސޯޓަކުން އެ ގާނޫނާ އެއް ގޮތަށް އަމަލުނުކުރާ ކަމަށާއި، ޑޮލަރު މާރުނުކުރާ ނަމަ އެ ކަން ނުކުރާ ރިސޯޓުތަކާ ދެކޮޅަށް ފިޔަވަޅު އަޅަން ޖެހޭނެ ކަމަށް އޭނާ ވިދާޅުވި އެވެ.
ބޭރު ފައިސާ މާރުކުރުމުގައި މި މަޖިލީހުން ހެދިފައި ހުރި ގާނޫނުތަކާ އެއްގޮތަށް ހުރިހާ ރިސޯޓުތަކުން ވެސް ފައިސާ މާރުކުރައްވަންޖެހޭނެ، އިނގޭތޯ؟ އެކަން ކުރައްވަން ޖެހޭނެ. ނުކުރާ ކަމަށް ވަންޏާމުން އެ ކަންކަމާ، އެ ކަމާ ގުޅުންހުރި އިދާރާތަކުން ފިޔަވަޅު އަޅުއްވަން ޖެހޭނެ. 100 ރިސޯޓު އޮތިއްޔާމުން 60 ރިސޯޓުން މާރުކޮށްފައި އަނެއް 40 ރިސޯޓުން މާރު ނުކުރާ ކަމަށް ވަންޏާމުން ފިޔަވަޅު އަޅުއްވަން ޖެހޭނެ،" ފަލާހު ވިދާޅުވި އެވެ.
މި މައްސަލައިގައި ފަލާހު ވިދާޅުވީ ބޭރު ފައިސާގެ ގާނޫނަށް އަދިވެސް ބަދަލުތަކެއް ގެންނަން ޖެހޭ ކަމަށެވެ. އެ ގޮތުން ޑޮލަރުގެ ކަޅު ބާޒާރުގެ މައްސަލަ އާއި ޑޮލަރު މާރުނުކުރާ މައްސަލައަށް ގާނޫނަށް ގެންނަ ބަދަލުތަކުގެ ތެރެއިން ހައްލު ހޯދޭނެ ކަމަށް އޭނާ ވިދާޅުވި އެވެ.
"އަޅުގަނޑަށް ގަބޫލުކުރެވޭ ގޮތުގައި އަދިވެސް މި ބޭރުފައިސާއާ ބެހޭ ގާނޫނަށް އިސްލާހު ގެންނަން ޖެހޭ، އެއީ ޑޮލަރުގެ މި ކަޅު، ބްލެކް މާކެޓު ތެރޭގައި މިއުޅޭ ޑޮލަރު މާރުކުރުމާއި ގާނޫނާއި ގަވާއިދާ ހިލާފަށް ޑޮލަރު މާރުކުރުމުގެ މި ނިޒާމު އަޅުގަނޑަށް ގަބޫލުކުރެވެނީ އަދިވެސް ގާނޫނަށް އިތުރަށް، އިސްލާހުތަކެއް ގެެނެސްގެން ހައްލުތަކެއް ހޯދޭނެ ކަމަށް،" ފަލާހު ވިދާޅުވި އެވެ.
ޑޮލަރު މާރުކުރުމުގެ ކަންކަން އިތުރަށް ހަރުކަށި ކުރަން ބޭނުންވެގެން އުޅޭއިރު، މިހާރު ގެންނަން އުޅޭ ބަދަލުތަކާ ގުޅިގެން ވެސް ބައެއް ޓޫރިޒަމް ވިޔަފާރިތަކަން ވަނީ ޝަކުވާކޮށްފަ އެވެ. އަދި، އިދިކޮޅު އެމްޑީޕީ އާއި ޕީއެންއެފް އިން ވެސް ވަނީ މި ބަދަލުތަކާ ދެކޮޅު ކަން ހާމަކޮށްފަ އެވެ.
ސަރުކާރުން މިހާރު ހުށަހަޅާފައި ވަނީ ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރެވޭ އިހުތިޔާރު އުވާލާ، ޖުމްލަ އާމްދަނީގެ 20 ޕަސެންޓުގެ މާރުކުރަން މަޖުބޫރުކުރާ ގޮތަށެވެ. މިއީ މަތީ ފަންތީގެ ރިސޯޓުތަކާއި އެ ނޫން ރިސޯޓުތަކުގެ މެދުގައި ހަމަހަމަ ކުރަން ކުރާ ކަމެއް ކަމަށް އެމްއެމްއޭއިން ވަނީ މައުލޫމާތު ދީފަ އެވެ.
މި ގޮތަށް ހަރުކަށި ކުރި ނަމަވެސް ޑޮލަރު މާރުކުރުން އިންސްޓޯލްމަންޓް ޕްލޭންތަކަށް ބަހައިދިނުން ފަދަ ލުއިތައް ދެވޭ ބަދަލުތަކެއް ވެސް ހިމަނާފައިވެ އެވެ. އަދި، އެހެން ދާއިރާތަކުން ޑޮލަރު މާރުކުރަން ޖެހޭ ވިޔަފާރިތަކަށް ލުއިތަކެއް ދޭން ވަނީ ހުށަހަޅާފަ އެވެ.
މީގެ ތެރޭގައި އަހަރެއްގެ ތެރޭގައި ލިބެން ޖެހޭ ބޭރު ފައިސާގެ އާމްދަނީ 15 މިލިއަން ޑޮލަރުން 25 މިލިއަން ޑޮލަރަށް މަތިކުރުމާއި، ސައްތައިންސައްތަ ދިވެހިންގެ ވިޔަފާރިތަކަށް މާރުކުރުމުގައި އިތުރު ލުއިތަކެއް ދިނުމުގޭ ބާރު އެމްއެމްއޭއަށް ދިނުން ހިމެނެ އެވެ.
