މާޒިޔާ ސްޕޯޓްސް އެންޑް ރެކްރިއޭޝަން ޓީމު ދަސްވާ މިންވަރަކަށް ބޭނުންވާ މިސްރާބަށް ކުރިއަށްދާން ފަސޭހަވާނެ ކަމަށް އެ ޓީމުގެ ކޯޗު، ޗެކް ރިޕަބްލިކްގެ ތޯމަސް ޓްރުޗާ ބުނެފި އެވެ.
ރްވާންޑާގެ ކްލަބަކާ ހަވާލުވާން އެ ގައުމަށް ވެސް ގޮސްފައި، އެ ނިންމުން ބަދަލުކުރުމަށް ފަހު، މާޒިޔާގެ އޮފާ ގަބޫލުކޮށް ރާއްޖެ އަންނަން ނިންމި ނިންމުމަކީ ފުޓްބޯޅައިގެ ނިންމުމެއް ކަމަށް ޓްރުޗާ ވަނީ، އޭއެފްސީ ޗެލެންޖް ލީގުގެ ޕްރިލިިމިނަރީ ބުރުގައި ތަޖިކިސްތާންގެ ރެގާރު ޓަޑާޒްއާ ކުޅުނު މެޗުގެ ކުރިން އޮތް ނޫސްވެރިންގެ ބައްދަލުވުމުގައި ބުނެފަ އެވެ.
"މާޒިޔާ އިން އޮފާ ލިބުނު ހިސާބުން އަހަންނަށް އުނދަގޫ ކަމަކަށް ނުވި ކޮން ޓީމެއް ތޯ އިހުތިޔާރުކުރާނީ ކަނޑައަޅަން. އެއީ، މާޒިޔާ އަކީ ވަރަށް ރަނގަޅު ކްލަބެއް. ރަނގަޅު ރެޕިއުޓޭޝަނެއް އޮތް ޓީމެއް. ރަނގަޅު ސެޓަޕެއް އޮތް ޕްރޮފެޝަނަލް ޓީމެއް. ތަށްޓަށް ކޮންމެ އަހަރަކު ވާދަކުރާ ޓީމެއް. އެހެންވެ، އަހަރެން ވަރަށް އުފަލުން މި ހުރީ. 100 ޕަސެންޓް ޔަގީން، އަަހަރެން ނިންމީ ރަނގަޅު ނިންމުމެއްކަން ފަސޭހަ ކަމަކަށް ނުވިޔަސް،" މެލޭޝިއާ އާއި އިންޑޮނޭޝިއާ ލީގުގައި ކުރިން ކޯޗުކޮށްދިން ޓްރުޗާ ބުންޏެވެ.
ރެގާރުއާ ދެކޮޅަށް މާޒިޔާ އިން ކުޅުނީ ޓްރުޗާ ޓީމާ ހަވާލުވިތާ ދެ ހަފްތާ ވެސް ނުވަނީހެވެ. ޓްރުޗާގެ ކޯޗުކަމުގައި މާޒިޔާ އިން ވަނީ ކަޕް ވިނާސް ކަޕްގައި، އޮޑި ސްޕޯޓްސް ކްލަަބާއި ބުރު ސްޕޯޓްސް ކްލަބް އަތުން މޮޅުވެފަ އެވެ. ދެ ޓީމުގެ މައްޗަށް ވެސް މާޒިޔާ އިން ކުރިހޯދީ 2-1 އިންނެވެ. އެ އަށް ފަހު، ރެގާރު މެޗަށް ނުކުމެ، މާޒިޔާ ބަލިވީ ދެ ވަނަ ހާފުގައި ވަން ގޯލުތަކާ އެކު، 3-0 އިންނެވެ.
އެ މެޗަށް ފަހު އޮތް ނޫސްވެރިންގެ ބައްދަލުވުމުގައި، ޓްރުޗާ އަށް އަމާޒުވި ސުވާލަކީ، އޭއެފްސީ ޗެލެންޖް ލީގުގައި ވަރުގަދަ މެޗެއް ކުޅެފައި، ކަޕް ވިނާސް ކަޕްގައި، މިރޭ ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ކުޅޭ މެޗަށާއި މި ދެ ޓީމު ބުދަ ދުވަހުގެރޭ ކުޅޭ ފައިނަލަށް ތައްޔާރުވުމުގައި މާޒިޔާ އަށް އެޑްވާންޓޭޖެއް އޮތްތޯ އެވެ.
"އަހަންނަށް (މި ޓީމާ އެކު) ކޮންމެ މެޗަކީ ވެސް ސްކޫލަށް ގޮސް ލިބޭ ކްލާހެއް ފަަދަ ކަމެއް. އެއީ، އިތުރު މައުލޫމާތުތަކެއް ލިބޭނެ އަހަރެން ދަސްކުރަން ބޭނުންވާ، އަނެއްކޮޅުން، ކުޅުންތެރިންނަށް ވެސް ލިބޭނެ އިތުރު މައުލޫމާތުތަކެއް އެކުގައި ކުޅުމަށްޓަކައި އެ ބޭނުންވާ. އެކަކު އަނެކަކުގެ އެހީތެރިކަން ހޯދައިގެން ކުރިއަށްދާން. އަހަންނެއް ނުބުނާނަން މިއީ ލިބޭނެ އެޑްވާންޓޭޖެކޭ،" ޓްރުޗާ ބުންޏެވެ.
"ކޮންމެ މެޗަކީ ވެސް އަހަރެމެންނަށް ރަނގަޅެއް، ޓީމު ރޮޓޭޓްކުރެވޭނެ ކުޅުންތެރިން ވެސް ފައިނަލް މެޗަށް ތައްޔާރުވުމުގެ ގޮތުން، ކޮންމެ މެޗެއް ވެސް މުހިންމު، މި ލެވަލްގައި (އޭއެފްސީ ލެވަލް) ލޯކަލް ފުޓްބޯޅަ އަށް ވުރެން އުނދަގޫވާނެ،"
ދެ ފަހަރެއްގެ މަތިން ކެންޏާގެ އޭފްސީ ލެޕާސް އަށް ކޯޗުކޮށްދިން ޓްރުޗާ ވަނީ ބޮޓްސްވާނާގެ ޓައުންޝިޕް ރޯލާސް އާއި އޮރާޕާ ޔުނައިޓެޑަށް ވެސް އިރުޝާދުދީފަ އެވެ. ދެކުނު އެފްރިކާގެ އެފްސީ ކޭޕް ޓައުންގެ ޔޫތު ޓީމަށް ކޯޗުކޮށްދިން ޓްރުޗާ ވަނީ، ޗެކް ރިޕަބްލިކްގެ މަޝްހޫރު ކްލަބް، ވިކްޓޯރިއާ ޕްލްޒެންގެ އެސިސްޓަންޓް ކޯޗަކަށް ވެސް މަސައްކަތްކޮށްފަ އެވެ.
މި ސީޒަނުގައި މާޒިޔާ އިން ކުޅުނު ފުރަތަމަ މެޗުގައި ނުކުތީ އެސިސްޓަންޓް ކޯޗުން ކަމަށްވާ އަހުމަދު ސުޒޭރު (ކޮއްކޮ) އާއި އިބްރާހިމް ސައީދު (ކަކާ)ގެ އިރުޝާދުގެ ދަށުންނެވެ. ޕެނަލްޓީ ޖަހައިގެން، ނިއު ރޭޑިއަަންޓް ބަލިކޮށް މާޒިޔާ އިން ވަނީ ހަތް ވަަނަ ފަހަރަށް ޗެރިޓީ ޝީލްޑް ކާމިޔާބުކޮށްފަ އެެވެ.
މާޒިޔާ އާއި ނިއު އިން މިރޭ ކުޅޭ މެޗު ފަށާނީ 9 ޖަހާއިރު އެވެ.
