އިރާނަށް އަމާޒުކޮށް ދޭ ކޮންމެ ހަމަލާއެއްގެ ރައްދުގައި ދުޝްމަނުންގެ ހުރިހާ މަރުކަޒުތަކަކަށް ވަރުގަދަ ހަމަލާތަކެއް ދޭނެ ކަމުގެ އިންޒާރު އިރާނުގެ އިސް އޮފިޝަލަކު ދެއްވައިފި އެވެ.
އިރާނުގެ ގައުމީ ސަލާމަތާއި ހާރިޖީ ސިޔާސަތާ ބެހޭ ކޮމިޝަނުގެ މެންބަރު އަދި ގާނޫނު ހަދާ މަޖިލީހުގެ މެންބަރު އިބްރާހީމް ރެޒާއީ މި އިންޒާރު ދެއްވީ އެމެރިކާ ނުވަތަ އިޒްރޭލުން އިރާނަށް ހަމަލާއެއް ދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގަ އެވެ.
އެކްސްގައި ކުރެއްވި ޕޯސްޓެއްގައި ރެޒާއީ ވިދާޅުވީ، އިރާނަށް ދޭ ކޮންމެ ހަމަލާއެއްގެ ރައްދުގައި، އެ ހަމަލާއެއް އައި ތަނަކަށާއި ދުޝްމަނުންގެ ހުރިހާ އަސްކަރީ މަރުކަޒުތަކަކަށް އިރާނުން ހަމަލާދޭނެ ކަމަށެވެ.
އިރާނުން މީގެ ކުރިން ވެސް ވަނީ އެ ގައުމުގެ ހަކަތައާ ބެހޭ އިންފްރާސްޓްރަކްޗަރަށް ހަމަލާދީފި ނަމަ، މުޅި ގަލްފު ސަރަހައްދުގައި ހުރި ތެލާއި ގޭހުގެ ވަސީލަތްތަކަށް އަމާޒުކޮށް ހަމަލާދޭނެ ކަމަށް ބުނެފަ އެވެ.
މި ނުތަނަވަސްކަމުގެ ތެރޭގައި، އެމެރިކާއިން ދަނީ އިޒްރޭލަށް އިޒްރޭލަށް ހަނގުރާމަމަތީ މަތިންދާ ބޯޓުތަކާއި ވަސީލަތްތައް ޖަމާކުރަމުންނެވެ.
މީޑިއާ ރިޕޯޓުތައް ބުނާ ގޮތުގައި، ކުރިއަށް އޮތް ދުވަސްތަކުގެ ތެރޭގައި އެމެރިކާގެ އަސްކަރިއްޔާއިން އިތުރު ދިހަ ވަރަކަށް އޭރިއަލް ރިފިއުލިން އެއާކްރާފްޓް ނުވަތަ ވައިގެ ތެރޭގައި ބޯޓުފަހަރަށް ތެޔޮ އެޅުމަށް ބޭނުންކުރާ މަތިންދާބޯޓު އިޒްރޭލަށް ފޮނުވާނެއެވެ.
މަސްރަހު މިހާ ބޮޑަށް ހޫނުވެފައިވަނީ، އިޒްރޭލުން އިރާނުގެ އަސްކަރީ ނުވަތަ ނިއުކްލިއާ މަރުކަޒުތަކަށް ހަމަލާއެއް ދީފާނެ ކަމުގެ ބިރު ބޮޑުވެފައިވާ ވަގުތެއްގަ އެވެ.
އިރާނުން ބުނަމުންދަނީ އެ ގައުމުގެ ސިޔާދަތަށް އުނިކަން އަންނަ ފަދަ އެއްވެސް އަމަލެއް ހިންގައިފި ނަމަ، އޭގެ ބަދަލު ވަރަށް ހިތިވާނެ ކަމަށެވެ.
