އެމެރިކާގެ ވޮޝިންޓަން ސްޓޭޓްގެ ޖަންގަލިތަކުގައި ފެތުރިފައިވާ ވަރުގަދަ އަލިފާންގަނޑުތަކާ ގުޅިގެން، ސްޕޯކޭން ސަރަހައްދުން މީހުން ހުސްކުރުމާއި ކަރަންޓުގެ ޚިދުމަތް މެދުކެނޑުމުގެ މައްސަލަތައް ކުރިމަތިވެފައިވެއްޖެ އެވެ.
ވޮޝިންޓަން ސްޓޭޓްގެ ކޮމިޝަނާ އޮފް ޕަބްލިކް ލޭންޑްސް، ޑޭވް އަޕްތެގްރޯވް ބޭއްވި ވާޗުއަލް ނޫސްވެރިންގެ ބައްދަލުވުމެއްގައި ވިދާޅުވީ، އެ ސްޓޭޓްގެ އެކި ސަރަހައްދުތަކުގައި ރޯވެފައިވާ 12 އަށްވުރެ ގިނަ އަލިފާންގަނޑު ނިއްވުމުގެ މަސައްކަތުގައި ގާތްގަނޑަކަށް 4،000 މީހުން ހަރަކާތްތެރިވަމުންދާ ކަމަށެވެ.
ގަވަރުނަރު ބޮބް ފާގަސަން ވަނީ ހޮނިހިރު ދުވަހުގެ ހެނދުނު މުޅި ސްޓޭޓްގައި ކުއްލި ނުރައްކަލުގެ ހާލަތު އިއުލާންކުރައްވައި، އެއްވެސް ތަނެއްގައި އަލިފާން ރޯކުރުން ވަނީ މަނާކުރައްވާފަ އެވެ. މިހާތަނަށް މި ހާދިސާތަކުގައި އެއްވެސް މީހަކަށް އަނިޔާވިކަމުގެ ނުވަތަ މީހަކު މަރުވިކަމުގެ ރިޕޯޓެއް ލިބިފައިނުވާ ކަމަށް އޮފިޝަލުން ބުނެ އެވެ.
ސްޕޯކޭންގެ މޭޔަރު ލީސާ ބްރައުން ވިދާޅުވީ، ރައްކާތެރިކަމުގެ ފިޔަވަޅެއްގެ ގޮތުން އެ ސިޓީގެ މުހިންމު ބައެއް ތަންތަން މިހާރު ހުސްކޮށްފައިވާ ކަމަށެވެ. އޭގެ ތެރޭގައި ފެން ސާފުކުރާ މަރުކަޒުތަކާއި، ކުނިން ހަކަތަ އުފައްދާ ޕްލާންޓަކާއި، ޑިޕާޓްމަންޓް އޮފް ވެޓަރަންސް އެފެއާޒްގެ ހޮސްޕިޓަލް ހިމެނެ އެވެ.
ހޮނިހިރު ދުވަހުގެ މެންދުރުފަހު 3:30 އާ ހަމައަށް ސްޕޯކޭންގެ ގާތްގަނޑަކަށް 200 ގެއަކުން މީހުން ހުސްކޮށްފައިވީ ނަމަވެސް، އެ އަދަދު އިތުރުވާނެ ކަމަށް އޮފިޝަލުން ލަފާކުރެ އެވެ. މޭޔަރު ބްރައުން ވިދާޅުވީ އަލިފާން ފެތުރެމުންދަނީ ސިޓީގެ ބޮޑު ސަރަހައްދަކަށް ކަމުން، ގެދޮރު ދޫކޮށް ދާންޖެހޭ މީހުންގެ އަދަދު މިއަށްވުރެ މަތިވާނެ ކަމަށް ބެލެވޭ ކަމަށެވެ.
ކޮމިޝަނަރ އަޕްތެގްރޯވް ވިދާޅުވި ގޮތުގައި މި އަހަރުގެ ހޫނު މޫސުން ފެށުނީއްސުރެ މިހާތަނަށް ވޮޝިންޓަން ސްޓޭޓްގެ ގާތްގަނޑަކަށް 450،000 އޭކަރުގެ ބިން ވަނީ އަލިފާނުގެ ހާދިސާތަކުގައި އަނދާފަ އެވެ. އޭނާ ވިދާޅުވީ މިއީ އާދައިގެ ހާލަތެއް ނޫން ކަމަށާއި، މުޅި ސްޓޭޓްގެ އެކި ކަންކޮޅުތަކުގައި އަލިފާންގަނޑުތައް ވަރަށް ބާރަށް ފެތުރެމުންދާ ކަމަށެވެ.
މި އަހަރުގެ ހޫނު މޫސުމުގައި ޕެސިފިކް ނޯތުވެސްޓްގެ އެހެން ސަރަހައްދުތަކަށް ވެސް ވަނީ އަލިފާނުގެ ނުރައްކާ ކުރިމަތިވެފަ އެވެ. އެގޮތުން ވޭތުވެދިޔަ މަހު ބްރިޓިޝް ކޮލަމްބިއާގެ ދެކުނު ސަރަހައްދުތަކަށް 34،000 އެއްހާ ފަހަރު ހޮނު އެޅުމުގެ ސަބަބުން ސިލްސިލާ އަލިފާނުގެ ހާދިސާތަކެއް ހިނގައި، ގިނަ ބަޔަކު ގެދޮރު ދޫކޮށް ދާން ޖެހުނެވެ.
