ގާނުނީ ވަކީލުކަން ކިޔަވަމުންދާ ދަރިވަރުންގެ އިމްތިހާނު، އެ ކޮލެޖެއްގެ ކެމްޕަހަކަށް ހާޒިރުވެގެން ހަދަންޖެހޭ ގޮތަށް ބާ ކައުންސިލުން ނިންމާފައިވާތީ، ދަތުރުފަތުރުކުރުމުގައި ދިމާވާނެ ދަތިތަކާ ގުޅިގެން އެ ނިންމުން ބަދަލުކޮށް، އޮންލައިންކޮށް އިމްތިހާން ހެދުމުގެ ފުރުސަތު ފަހިކޮށްދިނުމަށް ގޮވާލައި ޕެޓިޝަނެއްގައި ސޮއިކުރަން ފަށައިފި އެވެ.
މި ޕެޓިޝަނުގައި ބުނެފައިވަނީ، މި ކޯސް ފެށިއިރު ދަރިވަރުން އުންމީދުކުރީ މާލެ ސަރަހައްދުގައި ދިރިއުޅޭ ދަރިވަރުންނާއި މާލީ ތަނަވަސްކަން ހުރި ދަރިވަރުންނަށް ލިބޭ ފަދަ ފެންވަރު ރަނގަޅު ތައުލީމެއް، ވަޒީފާ އަދާކުރަމުންވެސް ލިބޭނެ ކަމަށެވެ.
ނަމަވެސް، އަލަށް ކަނޑައެޅި އުސޫލުގެ ސަބަބުން ވަޒީފާ އަދާކުރަމުން ކިޔަވާ ދަރިވަރުންނަށް އިމްތިހާނަށް ހާޒިރުވުމަށް މުސާރަ ލިބޭ ގޮތަށް ޗުއްޓީ ނުލިބުމާއި، އަތޮޅުތެރޭގެ ރަށްރަށުން ދަތުރުފަތުރު ކުރުމަށް ހިނގާ ބޮޑު ހަރަދަކީ އަތްފޯރާފަށުގެ ކަމެއް ނޫން ކަމަށް ބުނެ ދަރިވަރުން ދަނީ ކަންބޮޑުވުން ފާޅުކުރަމުންނެވެ.
ކޯސް ފެށުނީއްސުރެ އެކަޑެމިކް އިންޓެގްރިޓީ ނުވަތަ ތައުލީމީ އަމާނާތްތެރިކަމުގެ މުހިންމުކަމާއި، އޮންލައިން އިމްތިހާންތައް މޮނިޓާ ކުރާނެ ހަރުދަނާ އުސޫލުތަކާ ގުޅޭގޮތުން ދަރިވަރުންނަށް ތަމްރީނާއި މައުލޫމާތު ދީފައިވާކަން ޕެޓިޝަނުގައި ފާހަގަކޮށްފައިވެއެވެ.
"އަޅުގަނޑުމެންގެ ތެރެއިން ގިނަ ބަޔަކު މި ޑިގްރީއަށް ކިޔަވަނީ ސަރުކާރުގެ 'ނޭޝަނަލް ފްރީ ޑިގްރީ ސްކީމް'ގެ ދަށުން. މި ސްކީމްގެ މިހާރުގެ އުސޫލު ބުނާގޮތުން، މި އާ 'ފިޒިކަލް އެގްޒަމިނޭޝަން ރޫލް' ފަދަ އިމްތިހާނު އުސޫލެއްގެ ސަބަބުން ދަރިވަރަކު މެދުތެރެއިން ވަކިވާން ޖެހިއްޖެނަމަ، ގާނޫނީ ގޮތުންނާއި މާލީ ގޮތުންވެސް އެ ދަރިވަރަކު ޖެހޭނެ ޓިއުޝަން ފީ އަނބުރާ ދައްކަން،" ދަރިވަރަކު ބުންޏެވެ.
ޕެޓިޝަނުގައި އިތުރަށް ބުނީ އޮންލައިންކޮށް އިމްތިހާން ހެދުމަކީ ދަރިވަރުންނަށް ލިބޭ ނަހަމަ ފައިދާއެއް ކަމަށް ގަބޫލުނުކުރާ ކަމަށެވެ. އޮންލައިން އިމްތިހާންތައް ކުރިއަށްދާއިރު 'ލޮކްޑައުން ބްރައުޒާ' ބޭނުންކުރުމާއި، ވެބްކެމް މެދުވެރިކޮށް އިންވިޖިލޭޓަރުން ބެލެހެއްޓުމާއި، ކޮންމެ ވަގުތެއްގައިވެސް ވަށައިގެންވާ މާހައުލު ދެއްކުމަށް އެންގުން ފަދަ ހަރުކަށި ފިޔަވަޅުތައް އަޅާފައިވާކަން ޕެޓިޝަނުގައި ފާހަގަކޮށްފައިވެ އެވެ.
މީގެއިތުރުން ދަރިވަރުން ފާހަގަކުރާ ގޮތުގައި އިމްތިހާނަށް އިތުރު ވަގުތު ނުދިނުމާއި، އެކަކު އިމްތިހާން ނިންމާފައި ނުކުތުމަށްފަހު އެހެން މީހަކަށް ބައިވެރިނުވެވޭ ގޮތަށް ހެދިފައިވާ އުސޫލުތަކަކީ އިމްތިހާނުގެ ސައްހަކަން ކަށަވަރުކޮށްދޭ ކަންކަމެވެ.
ގާނޫނީ ދާއިރާގެ މީހުންނަކީ އަހުލާގީ ގޮތުން އެންމެ މަތީ މިންގަނޑުތަކަށް ތަބާވާ ބަޔަކަށް ވާންޖެހޭނެ ކަމަށް ދަރިވަރުން އިހުތިރާމާއެކު ގަބޫލުކުރެއެވެ. ނަމަވެސް އެ މިންގަނޑު ހިފެހެއްޓުމަކީ ކޮންމެހެން މަރުކަޒަކަށް ހާޒިރުވެގެން އިމްތިހާން ހެދުން ލާޒިމުކުރާ ކަމެއް ނޫންކަމަށް ދަރިވަރުން ބުންޏެވެ.
ދުނިޔޭގެ ކުރިއަރާފައިވާ ގައުމުތައް ކަމަށްވާ އޮސްޓްރޭލިއާ އަދި އިނގިރޭސިވިލާތުގެ ނަން މަޝްހޫރު ޔުނިވާސިޓީތަކުގައިވެސް ދުރުންދޭ ތައުލީމާއި އޮންލައިން އިމްތިހާންތައް ބަލައިގަންނަކަން ދަރިވަރުން ފާހަގަކުރެ އެވެ. އެހެންކަމުން ބާ ކައުންސިލުން މި މައްސަލަ އަލުން މުރާޖައާކޮށް، މިހާރު ކޯހުގައި ކިޔަވަމުންދާ ދަރިވަރުންނަށް ގެއްލުން ނުވާނެ ފަދަ އިންސާފުވެރި ނިންމުމެއް ނިންމައިދިނުމަށް ދަރިވަރުން ވަނީ އެދިފައެވެ.
