އަންޓްވާޕް، ބެލްޖިއަމް (ޖުލައި 22) - އެމެރިކާ، މެކްސިކޯ އަދި ކެނަޑާގައި މި ފަހަރު ކުރިއަށްދިޔަ ފީފާ ވޯލްޑް ކަޕްގައި ބެލްޖިއަމްގެ ގައުމީ ފުޓްބޯޅަ ޓީމަށް ކޯޗުކޮށްދިން ރުޑީ ގާސިއާ މަގާމު ދޫކޮށްލައިފި އެވެ.
ބެލްޖިއަމުން ވަނީ މި ފަހަރުގެ ވޯލްޑް ކަޕްގައި ކުއާޓާ ފައިނަލުގައި ވެސް ވާދަކޮށްފަ އެވެ. އެ ޓީމު ކުއާޓާ ފައިނަލުން ކެޓީ މުބާރާތުގެ ޗެމްޕިއަންކަން ހޯދި ސްޕެއިން އަތުންނެވެ. ސްޕެއިން ކޮޅަށް މި ފަހަރުގެ ވޯލްޑް ކަޕްގައި ވަން ހަމައެކަނި ލަނޑު ޖެހީ ބެލްޖިއަމުންނެވެ. އެ ގޮތުން، އެމެރިކާ ބަލިކޮށް ކުއާޓާ ފައިނަަލަށް ދަތުރުކުރި ބެލްޖިއަމުން، ގަދަ އަށް ޓީމުގެ ބުރުގައި ސްޕެއިން އަތުން ފަހު ވަގުތު ބަލިވީ 2-1 އިންނެވެ.
އުމުރުން 62 އަހަރުގެ ގާސިއާ، ބެލްޖިއަމްގެ ކޯޗުކަމާ ހަވާލުވީ ޖެނުއަރީ މަހު އެވެ. މަގާމުގައި ހޭދަކުރި ހަ މަސް ތެރޭ އޭނާ ވަނީ އެ ޓީމަށް ޖުމްލަ އެކުގައި 20 މެޗުގައި ކޯޗުކޮށްދީފަ އެވެ. އޭގެ ތެރެއިން 12 މެޗުން މޮޅުވިއިރު، ހަ މެޗުން އެއްވަރުވި އެވެ. ބަލިވީ އެންމެ ދެ މެޗުންނެވެ.
ރިޕޯޓްތައް ބުނާގޮތުން، ގާސިއާ، ބެލްޖިއަމްގެ ކޯޗުކަން ދޫކޮށްލީ މުސްތަގުބަލަށް ޕްލޭނެއް ހަދައިގެން މަސައްކަތް ކުރެވޭނެ ޕްރޮޖެކްޓެއް ފަށަން ބެލްޖިއަމްގެ ފުޓްބޯޅަ ފެޑެރޭޝަނުގެ އެކަށީގެންވާ މިންވަރެއްގެ ސަޕޯޓް ނުލިބިގެންނެވެ.
ބެލްޖިއަމުން އާ ކޯޗަކަށް ހަމަޖައްސަން މަސައްކަތްކުރަނީ، ނެދަލެންޑްސްގެ ގައުމީ ޓީމަށް ކުރިން ކުޅުނު މިޑްފީލްޑަރު، މާކް ވެން ބޮމެލް އެވެ. ކުރިން ބަޔާން މިއުނިކާއި ބާސެލޯނާ އަށް ކުޅުނު ވެން ބޮމެލް އެންމެ ފަހުން ކޯޗުން މަސައްކަތްކުރީ ބެލްޖިއަމްގަ އެވެ. އެ ގޮތުން، 2024 ވަނަ އަހަރު ޖޫން މަހު ބެލްޖިއަމްގެ ރޯޔަލް އަންޓްވާޕް ދޫކޮށްލީ ދެ އަހަރު އެ ޓީމަށް ކޯޗުކޮށްދީފަ އެވެ.
