މިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ގުޅީފަޅުން ގޯތި ލިބުނު މީހުންނަށް މި ހަފުތާ ތެރޭގައި ގޯތި ހަވާލުކޮށް ނިންމޭތޯ މަސައްކަތް ކުރަމުންދާ ކަމަށް މުއްތަލިބު ވިދާޅުވެއްޖެ އެވެ.
ރައްޔިތުންގެ މަޖިލީހަށް މިއަދު ހާޒިރުވެވަޑައިގެން މެންބަރަކު ކުރެއްވި ސުވާލަކަށް ޖަވާބުދެއްވަމުން މުއްތަލިބު ވިދާޅުވީ މިދިޔަ ސަރުކާރުން ފެށި ހުރިހާ މަޝްރޫއުތަކެއް ވެސް ކުރިއަށް ގެންދިޔުމަކީ މި ސަރުކާރުގެ ސިޔާސަތު ކަމަށެވެ.
އެގޮތުން، ގުޅީފަޅުން ގޯތި ލިބުނު މީހުންނަށް މި ހަފުތާ ތަރޭގައި ޑިޖިޓަލްކޮށް ގޯތި ހަވާލުކޮށް ނިންމޭތޯ މަސައްކަތް ކުރަމުންދާ ކަމަށް މުއްތަލިބު ވިދާޅުވި އެވެ.
"މިހާރު ގުޅީފަޅުގެ މަސައްކަތް ނިންމައި، ގުޅީފަޅުން އިރާދަކުރެއްވިއްޔާމުން މި ހަފުތާގެ ތެރޭގައި އަޅުގަނޑުމެން މި ބަލަނީ ގޯތި ދެވެން ހުރި ހުރިހާ ފަރާތްތަކަށް ވެސް އެ ޑިޖިޓަލް ގޮތަށް އެ ބޭފުޅުންގެ ގޯތި ސީދާ ފެންނަ ގޮތަށް ބަލާފައި އެ ބޭފުޅުންގެ ގޯއްޗާ ހަވާލުވުމުގެ ފުރުސަތު ދޭން، އަދި، އެ ތަނުގެ ވަށާ ފާރު ރޭނުމުގެ ފުރުސަތު ވެސް ވަރަށް އަވަހަށް ހުޅުވައިލަން،" މުއްތަލިބު ވިދާޅުވި އެވެ.
މި ސަރުކާރުން ވަނީ ގުޅީފަޅުގެ ލޭންޑް ޔޫޒް ޕްލޭނަށް ބަދަލުތަކެއް ގެނެސް، އެތަނުން 3,520 ގޯތި ދޫކުރުމަށް ނިންމާފައެވެ. މީގެ ތެރޭގައި ކުރިން ގިރާވަރުފަޅުން ދޭން ނިންމި 1,114 ގޯތި ވެސް ހިމެނެއެވެ.
އެ ތަނުން ގޯތި ލިބުނު ހުރިހާ އެންމެންނަށް ގޯތި ހަވާލުކޮށް އަދިވެސް ނުނިމެ އެވެ. އެ މަސައްކަތް ލަސްވަނީ ގުޅީފަޅަކީ ބޮޑު ސަރަހައްދަކަށް ވެފައި، އެތަނުގައި އެއްގަމު ދަތުރުފަތުރުގެ ދަތިކަން ހުރުމުން ކަމަށް މީގެ ކުރިން މުއްތަލިބު ވިދާޅުވެފައިވެ އެވެ. އެކަން ހައްލު ކުރުމަށްޓަކައި ގުޅީފަޅަށް ބަހެއް ގެންގޮސްގެން އެ މަސައްކަތް ހަލުވި ކުރާނެ ކަމަށް ވެސް އޭރު މުއްތަލިބު ވިދާޅުވި އެވެ.
މިއަދުގެ ޖަލްސާގައި ވާހަކަދައްކަވަމުން މުއްތަލިބު ވިދާޅުވީ ހުޅުމާލެ ތިންވަނަ ފިޔަހިން ދޫކޮށްފައި ހުރި ހުރިހާ ގޯއްޗެއް ގާތްގަނޑަކަށް ހަވާލުކޮށް ނިމިފައިވާ ކަމަށެވެ. އަދި، ގިރާވަރު ފަޅު ހިއްކުމުގެ މަސައްކަތް ވެސް ވަރަށް އަވަހަށް ފެށުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
"ގިރާވަރުގެ އަދި އިތުރަށް 50 ވރަކަށް ހެކްޓަރުގެ ބިން ހިއްކަން އެބައޮތް، މިއީ މިޑްލް އީށްޓް ކްރައިސިސްއާ އެއްކޮށް އޭރުގައި ހިނގަމުން އައި މަސައްކަތް މަޑުޖެހިފައި އަނެއްކާ ވެސް މި މަހުގެ ތެރޭގައި މަސައްކަތް ފެށިގެންދާނެ،" މުއްތަލިބު ވިދާޅުވި އެވެ.
ގިރާވަރު ފަޅު ހިއްކައި ނިމުމުން، އެ ތަނުން ގޯތި ލިބުނު މީހުންނަށް ގޯތިތައް ހަވާލުކުރުމުގެ މަސައްކަތް ފަށާނެ ކަމަށް މުއްތަލިބު ވިދާޅުވި އެވެ.
އެމްޑީޕީ ސަރުކާރުން އެމްއެފްއެމްސީ އާ ހަވާލުކޮށްގެން ގިރާވަރު ހިއްކުމުގެ މަސައްކަތް ފަށައި 54 ހެކްޓަރުގެ ބިން ހިއްކި އެވެ. ނަމަވެސް އެ މަސައްކަތް ފަހުން ހުއްޓި، މި ސަރުކާރުން އެމްއޭސީއެލްއާ ހަވާލުކޮށްގެން އެ މަޝްރޫއު ހަވާލުކޮށްގެން ބާކީ ނުހިއްކިހުރި 97 ހެކްޓަރުގެ ބިން ހިއްކަން ފެށީ ޖެނުއަރީ 31، 2025، ގަ އެވެ.
ގިރާވަރުފަޅު ހިއްކައި ނިންމުމަށް މި ސަރުކާރުން އެންމެ ފުރަތަމަ ދިން ތާރީހަކީ މިދިޔަ ފެބްރުއަރީގެ ނިޔަލަށެވެ. ނަމަވެސް އެ ތާރީހަށް ގިރާވަރުފަޅު ހިއްކައި ނުނިންމުމުން، މާޗު 21، ގައި ރައީސުލްޖުމްހޫރިއްޔާ މުހައްމަދު މުއިއްޒު ކުރެއްވި ޕޯސްޓެއްގައި ވިދާޅުވީ މިދިޔަ އޭޕްރިލްގެ ނިޔަލަށް އެ ތަން ހިއްކައި ނިންމާނެ ކަމަށެވެ.
އެ މަސައްކަތް ނިންމަން ސަރުކާރުން އެންމެފަހުން ދީފައި އޮތް ތާރީހަކީ މިދިޔަ މެއި 31، އެވެ.
