ފްރާންސްގެ އިރުމަތީގައި އޮންނަ ޓޮމްބްލޭން ނަމަކަށް ކިޔާ އަވަށެއްގައި ޕެރަޝޫޓާ އެކު ފުންމުމުގެ ހަރަކާތެއްގައި ބައިވެރިވާން ދިޔަ ބަޔަކު ގޮވައިގެން ދަތުރުކުރި މަތިންދާބޯޓެއް ވެއްޓި 11 މީހުން މަރުވެއްޖެ އެވެ.
މި ހާދިސާގައި ބޯޓުގެ ޕައިލެޓާއި އޭގައި ތިބި 10 ފަސިންޖަރުން ވެސް ވަނީ މަރުވެފަ އެވެ. މަރުވި މީހުންގެ ތެރޭގައި ޕެރަޝޫޓާ އެކު ފުންމާލަން ދަސްކޮށްދޭ ފަސް އިންސްޓްރަކްޓަރުންނާއި، އަލަށް އެ ހަރަކާތުގައި ބައިވެރިވާން ދިޔަ ފަސް މީހަކު ހިމެނެ އެވެ.
ޕެރަޝޫޓް ދަސްކޮށްދޭ ސްކޫލަކުން ބޭނުންކުރަމުން ދިޔަ މި ބޯޓު ވެއްޓުނީ، ނޭންސީ-އެސޭ އެއާފީލްޑުން ފުރިތާ ކުޑަވަގުތުކޮޅެއްގެ ތެރޭގަ އެވެ.
ފްރާންސްގެ އިންޓީރިއާ މިނިސްޓަރު ލޯރެންޓް ނޫނޭޒް ވިދާޅުވި ގޮތުގައި، މި ހާދިސާ ހިނގަން މެދުވެރިވި ސަބަބު ހޯދުމަށް ޕެރިހުގެ ޕްރޮސެކިއުޓަރުގެ އޮފީހުން މިހާރު ވަނީ ތަހުގީގެއް ފަށާފަ އެވެ.
ނޫނޭޒް އިތުރަށް ވިދާޅުވީ، އާއިލާ މީހުން މި ހަރަކާތުގައި ބައިވެރިވާ މަންޒަރު ބަލަން އެއާފީލްޑަށް އެއްވެ ތިބި ބައެއް މީހުންނަށް ބޯޓު ވެއްޓުނު މަންޒަރު ފެނިފައިވާ ކަމަށެވެ. އެހެންވެ، އެ މީހުންނަށް ނަފްސާނީ އެހީތެރިކަން ފޯރުކޮށްދެމުންދާ ކަމަށް ވިދާޅުވި އެވެ.
އެ ގައުމުގެ އޭވިއޭޝަން ސޭފްޓީ އެޖެންސީ (ބީއީއޭ) އާ ހަވާލާދީ އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، މިއީ އަސްކަރީ އަދި ކޮމާޝަލް ފްލައިޓްތައް ނުހިމަނައި، އެ ގައުމުގެ ތާރީހުގައި އަމިއްލަ މަތިންދާބޯޓެއް ވެއްޓި މިހާ ގިނަ އަދަދެއްގެ މީހުން މަރުވި ފުރަތަމަ ހާދިސާ އެވެ.
