އިސްލާމްދީނަށް ހޭލުންތެރިކަން އިތުރުކުރުވުމާއި، ދީނަށް ހިދުމަތްކުރުމާއި، ދީނީ އިލްމު އުނގަންނައިދިނުމުގެ ދާއިރާއިން ގައުމީ އިނާމު ހާސިލުކުރައްވާފައިވާ ޝައިހް އިސްމާއީލް މުހައްމަދު ރޭ އަވަހާރަވެއްޖެ އެވެ.
ޝެއިހް އިސްމާއިލް, 85, އަވަހާރަވީ ރޭ ދަންވަރުގެ ވަގުތެއްގައިކަން އެނގިފައިވެ އެވެ. ޝެއިހު ކަށުނަމާދު އޮންނާނީ މިއަދުގެ މެންދުރު ނަމާދަށްފަހު އިސްލާމީ މަރުކަޒުގަ އެވެ.
ރާއްޖޭގައި ދީނީ އިލްމު ފެތުރުއްވުމަށްޓަކައި ވަރަށްފުޅާ ދާއިރާއެއްގައި މަސައްކަތްޕުޅު ކުރައްވައިފައިވާ އަދި ރާއްޖެއިން ބޭރުގައި ދީނީ ރޮނގުން މަތީ ތައުލީމު ހާސިލުކުރުމުގެ ފުރުސަތު ދިވެހި އެތައް ދަރިވަރުންނަކަށް ހޯއްދަވައިދެއްވި ޝައިހް އިސްމާއީލް މުހައްމަދު ވަނީ ދީނީ އެކިއެކި ފޮތްތައް ދިވެހިބަހަށް ތަރުޖަމާ ވެސް ކުރައްވައިފަ އެވެ.
ދ. މީދުއަށް އުފަން ޝައިހް އިސްމާއީލް މުހައްމަދަކީ މަދީނާ ޔުނިވާސިޓީން ޑިގްރީ ހާސިލުކުރެއްވުމުގެ ޝަރަފު އެންމެ ފުރަތަމަ ލިބިވަޑައިގެންނެވި ދިވެއްސެވެ.
ޝައިހް އިސްމާއީލް މުހައްމަދުގެ އެހީތެރިކަމާއެކުގައި، ޕާކިސްތާނުގެ އެކިއެކި ޔުނިވާސިޓީތަކާއި ކޮލެޖްތަކުން ތައުލީމު ހާސިލުކުރި ދިވެހި ދަރިވަރުންގެ އަދަދު 100 އަށްވުރެ ގިނަ އެވެ. އެ ދަރިވަރުންގެ ތެރޭގައި، ރާއްޖޭގައި ދީނީ ރޮނގުން މަޝްހޫރު އިލްމުވެރިން ތިއްބެވިކަން ފާހަގަކޮށްލެވެ އެވެ.
ދީނީ އިލްމު ފެތުރުއްވުމަށްޓަކައި ކޮށްދެއްވި އަގުހުރި މަސައްކަތްޕުޅުގެ އަގު ވަޒަންކުރައްވައި، ދިވެހިރާއްޖޭގެ އިސްލާމީ ޔުނިވަރސިޓީން އޮނަރަރީ ޑޮކްޓަރޭޓް ކަމުގެ ޝަރަފު، ޝައިހް އިސްމާއީލް މުހައްމަދަށް ލިބިވަޑައިގެންފައިވެ އެވެ.
ދިވެހިރާއްޖޭގައި މަތީ ތަލީއުމު ދޭ މަރުކަޒަކުން އޮނަރަރީ ޑޮކްޓަރޭޓް ކަމުގެ ޝަރަފު އެންމެ ފުރަތަމަ ލިބިވަޑައިގެންނެވި ބޭފުޅަކީވެސް، ޝައިހް އިސްމާއީލް މުހައްމަދެވެ. މި ޝަރަފު ޝައިހް އިސްމާއީލް މުހައްމަދަށް އެރުވީ މިދިޔަ އަހަރެވެ.
