މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް ކުރީގެ ރައީސް މުހައްމަދު ނަޝީދު ރަށްރަށަށް ކުރައްވަމުން ގެންދަވާ ދަތުރުތަކުގައި އެމަނިކުފާނަށް މަރުހަބާ ދެންނެވުމަށް ނުކުންނަ މުވައްޒަފުން ވަޒީފާއިން ވަކިކޮށް ސަސްޕެންޑުކުރަމުންދިޔުމާ ދެކޮޅަށް ނުކުންނަވާނެ ކަމުގެ ޔަގީންކަން އެމަނިކުފާނު ދެއްވައިފި އެވެ.
ހުވަދޫ އަތޮޅަށް ނަޝީދު ކުރެއްވި ކެމްޕޭން ދަތުރުގައި އެމަނިކުފާނުގެ އިސްތިގުބާލަށް ދިޔަ މުވައްޒަފުންނަށާއި އެމަނިކުފާނާއެކު ފޮޓޯ ނެގި ބައެއް މުވައްޒަފުންނާ ދެކޮޅަށް ކުންފުނިތަކުން އެކި ފިޔަވަޅުތައް ވަނީ އަޅާފަ އެވެ. އޭގެ ތެރޭގައި ވަޒީފާއިން ވަކިކުރުމާއި، ސަސްޕެންޑު ކުރުމާއި މިހާރު ވަޒީފާ އަދާކުރަމުންދާ ރަށް ދުރު އެހެން ރަށަކަށް ބަދަލުކުރުން ހިމެނެ އެވެ.
ނަޝީދުގެ ކެމްޕޭނުން ނެރުނު ނޫސްބަޔާނެއްގައި ވަނީ މި ފިޔަވަޅުތަކަކީ ސަރުކާރުން އެމްޑީޕީގެ އެތެރޭގެ އިންތިހާބުގެ ތެރެއަށް ވަދެގަތުމަށް ކުރަމުންދާ ކަމެއްގެ ގޮތުގައި ސިފަކޮށްފަ އެވެ. އެ ފިޔަވަޅުތަކަކީ ރައްޔިތުންނަށް ބިރު ދައްކައި ހައްގުތައް ނިގުޅައިގަތުން ކަމަށް ނަޝީދުގެ ކެމްޕޭނުން ބުނެފައިވެ އެވެ.
"ނަޝީދު އިސްވެ ހުންނަވައި، ގާނޫނީ ފަރުވާ ހިމެނޭހެން، އެ ފިޔަވަޅުތަކާ ދެކޮޅަށް ތެދުވާނެ ކަމުގެ ޔަގީންކަން ވެސް އަރުވަމެވެ. އަދި ނަހަމަ ފިޔަވަޅުތަކުގެ ޝިކާރައަކަށް ވަމުންދާ ފަރާތްތަކުގެ ކަންކަން މި ކެމްޕޭނުން ގާތުން ބަލައި، އެހީތެރިކަން ފޯރުކޮށްދެމުން ގެންދާނެ ވާހަކަ ވެސް ދަންނަވަމެވެ."
ނަޝީދުގެ ކެމްޕޭނުގެ އިތުރުން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ އިންތިހާބު ކާމިޔާބު ކުރި އަބްދުﷲ ސޯދިގު (ސޯބެ) އާއެކު ފޮޓޯއެއް ނެގި މައްސަލައިގައި މޯލްޑިވްސް ޓްރާންސްޕޮޓޭޝަން ސޭފްޓީ ބޯޑުގެ ޑިރެކްޓަރުގެ މަގާމުގައި ހުންނެވި އަހުމަދު ޒުހައިރު ވަނީ މަގާމުން ވަކިކޮށްފަ އެވެ.
ސޯބެއަށް ކެމްޕެއިންކޮށްދިން ކަމަށް ބުނެ ވެމްކޯގެ މުވައްޒަފަކު ވެސް ވަނީ ވަކިކޮށްފަ އެވެ. އަދި އެ ކުންފުނިން ގާނޫނާ ހިލާފަށް ޕެންޝަންގެ ފައިސާ ހިފަހައްޓާތީ މުޒާހަރާ ކުރި ދެ މީހަކު ވެސް ވަނީ ވަޒީފާއިން ވަކިކޮށްފަ އެވެ.
ސިޔާސީ ކަމެއްގައި މިހަފުތާގެ ތެރޭގައި ވަޒީފާއިން ވަކިކުރި/ސަސްޕެންޑު ކުރި މީހުންގެ އަދަދު 11 އަށް ވުރެ ވަނީ އިތުރުވެފަ އެވެ.
