ވާވު އަތޮޅު ދެވަނަ ކަނޑުގެ އަޑީގައި ހުންނަ ހޮހޮޅައެއްގައި ތާށިވެފައި ތިބި އިޓަލީގެ ހަތަރު ޑައިވަރުންގެ ތެރެއިން ދެ މީހެއްގެ ހަށިގަނޑު މިއަދު ނަގައިފި އެވެ.
އެ ދެ ޑައިވަރުންގެ ހަށިގަނޑު ނެގިފައި މިވަނީ ހޮހޮޅައިގައި އެ މީހުން ތާށިވިތާ ފަސް ދުވަސް ފަހުންނެވެ. އެ މީހުންގެ ހަށިގަނޑު ލޮކޭޓު ކުރެވުނީ އިއްޔެގެ ވަގުތެއްގަ އެވެ. މިހާރު މި ރިކަވަރީ އޮޕަރޭޝަން ލީޑުކުރަނީ އިޓަލީގެ ސަރުކާރުގެ އެހީތެރިކަމާއެކު ރާއްޖެއަށް ފޮނުވި ފިންލެންޑުގެ ތަޖުރިބާކާރު ކޭވް ޑައިވަރުންގެ ޓީމުންނެވެ.
އެ އޮޕަރޭޝަނުގައި ބައިވެރިވާ ތަޖުރިބާކާރުންގެ ޓީމުން ހާމަކޮށްފައިވާ ގޮތުގައި އެ އޮޕަރޭޝަނުގައި ރީބްރީތާސް އާއި އަޑީގައި ދުއްވާ ސްކޫޓަރާއި، ލައިފް-ސަޕޯޓް ސިސްޓަމްތައް ހިމެނޭހެން އެންމެ ފަހުގެ ޒަމާނީ ވަސީލަތްތައް ބޭނުންކޮށްފައިވެ އެވެ.
އެ މީހުންގެ ހަށިގަނޑު ހޮހަޅައިގެ ތެރެއިން ނެރެ 30 މީޓަރާ ހަމައަށް ގެންދިޔައީ ފިންލޭންޑުގެ ޓީމުންނެވެ. އެ ހިސާބުން ފެށިގެން އެ ދެ މީހުންގެ ހަށިގަނޑު ފެނުން މައްޗަށް ނެގީ ދިވެހި ސިފައިންނާއި ފުލުހުންގެ ޑައިވް ޓީމުތަކުންނެވެ.
"މިއީ އެތައް ބައެއްގެ ބުރަ މަސައްކަތާއެކު ހިންގާ އޮޕަރޭޝަނެއް. މިއަދު، ހޮހަޅައިގެ ތެރެއިން ދެ މީހެއްގެ ހަށިގަނޑު ވަނީ ނެރެވިފައި. ކުރިއަށް އޮތް ދުވަސްތަކުގައި ބާކީ ތިބި މީހުން އަނބުރާ ގެނައުމުގެ މަސައްކަތް އަޅުގަނޑުމެން ކުރިއަށް ގެންދާނަން،" ފިންލޭންޑުގެ ޑައިވަރުންގެ ޓީމުގައި ހިމެނޭ ތަޖުރިބާކާރު ޑައިވަރު ސާމީ ޕާކަރިނެން ޑޭން ޔޫރޮޕާގެ ވެބްސައިޓަށް ބުނެފައިވެ އެވެ.
މޫސުން ތަންދޭނަމަ މާދަމާ ބާކީ ދެ މީހުންގެ ހަށިގަނޑު ހޮހަޅައިން ނެރެ ފެނުން މައްޗަށް ނެގޭނެ ކަމަށް ޑޭން ޔޫރޯޕާއިން ބުނެ އެވެ.
ހޮހަޅައަށް ދިޔަ ފަސް މީހުންގެ ތެރެއިން ތިން މީހުންގެ ހަށިގަނޑު މިހާރު ވަނީ ނަގާފަ އެވެ. އެންމެ ފުރަތަމަ ނެގީ ޓޫރިސްޓުންގެ ޓީމު ގޮވައިގެން އަޑިއަށް ދިޔަ ޑައިވު ޓީމް ލީޑަރު ޖިއަންލޫކާ ބެނެޑެއްޓީގެ ހަށިގަނޑެވެ. މިއަދު ނެގީ ކޮން ބައެއްގެ ހަށިގަނޑު ކަމެއް މިހާތަނަށް އެނގިފައެއް ނުވެ އެވެ.
މި ހާދިސާ އާއި ރެސްކިއު އޮޕަރޭޝަންގައި ހަ މީހުން ވަނީ މަރުވެފަ އެވެ. އެއީ އިޓަލީގެ ފަސް ޑައިވަރުންގެ އިތުރުން ރެސްކިއު އޮޕަރޭޝަންގައި ހަރަކާތްތެރި ވަނިކޮށް ނިޔާވި ސްޓާފް ސާޖަންޓު މުހައްމަދު މަހުދީ އެވެ.
މި ހާދިސާއާއެކީ ރާއްޖޭގައި ފީނުމުގެ ސަލާމަތާއި ރައްކާތެރިކަމާއި ގަވާއިދުތަކަށް ބޯނުލެނބުމާއީ ސަލާމަތީ ހިދުމަތްތަކުގެ ގާބިލިއްޔަތުކަމާއި ރެސްކިޔު އޮޕަރޭޝަންތަކުގައި ގޮތް ނިންމާ ގޮތާ ބެހޭ އުނދަގޫ ބަހުސެއް ވަނީ ފެށިފަ އެވެ.
