އިނގިރޭސިވިލާތުގެ ހެލްތު ސެކްރެޓަރީ ވެސް ސްޓްރީޓިން މަގާމުން އިސްތިއުފާ ދެއްވައި، ބޮޑުވަޒީރު ކިއަރ ސްޓާމަރގެ ލީޑަޝިޕާ މެދު އިތުބާރު ގެއްލިފައިވާ ކަމަށް ވިދާޅުވެއްޖެ އެވެ. ލޭބަރ ޕާޓީގެ އިސް ސަފުގައި ހިމެނިވަޑައިގަންނަވާ ސްޓްރީޓިން މި ނިންމެވުން ނިންމެވީ މިދިޔަ ހަފުތާގައި ބޭއްވި އިންތިޚާބުތަކުގައި އެ ޕާޓީއަށް ކުރިމަތިވި ބޮޑު ނާކާމިޔާބީއާ ގުޅިގެން ސްޓާމަރގެ މަގާމު ދިފާއުކުރެއްވުމަށް މަސައްކަތް ކުރައްވަމުންދާ ދަނޑިވަޅެއްގަ އެވެ.
ބޮޑުވަޒީރަށް ފޮނުއްވި އަދި އާންމުކޮށް ޝާއިއުކުރެއްވި އިސްތިއުފާގެ ސިޓީގައި ސްޓްރީޓިން ވިދާޅުވީ، ސަރުކާރަށް ތަސައްވުރެއް ބޭނުންވާ ވަގުތު އޮތީ ހުސްކަމެއް ކަމަށާއި، މިސްރާބެއް ބޭނުންވާ ވަގުތު އޮތީ މަގުއޮޅުމެއް ކަމަށެވެ. ސްޓްރީޓިން އަދި ރަސްމީކޮށް ލީޑަޝިޕް ޗެލެންޖެއް ފަށްޓަވާފައި ނުވި ނަމަވެސް، ކުރިއަށް އޮތް އާންމު އިންތިހާބުގައި ލޭބަރ ޕާޓީގެ ލީޑަރެއްގެ ގޮތުގައި ސްޓާމަރ ނުހުންނަވާނެކަން މިހާރު ސާފުވެފައިވާ ކަމަށް އޭނާ ވިދާޅުވި އެވެ.
ޕާޓީގެ ކުރިމަގާ ގުޅޭގޮތުން ވާހަކަ ދައްކަވަމުން ސްޓްރީޓިން ވިދާޅުވީ ދެން އަންނަންވާނީ ފިކުރުތަކުގެ މެދުގައި ކުރެވޭ ވަރުގަދަ ބަހުސެއް ކަމަށެވެ. އަދި ލީޑަޝިޕްގެ ވާދަވެރިކަން ވާންޖެހޭނީ ފުޅާ ދާއިރާއެއްގައި ހުރިހާ ފަރާތްތަކަކަށް ބައިވެރިވެވޭ، އަދި އެންމެ ގާބިލު ކެންޑިޑޭޓުން ކުރިމަތިލާނެ ފުރުސަތަކަށް ކަމަށް އޭނާ ފާހަގަކުރެއްވި އެވެ.
މި ހަލަބޮލިކަމުގެ ތެރޭގައި، ޑެޕިއުޓީ ޕްރައިމް މިނިސްޓަރު އެންޖެލާ ރޭނާ ލީޑަޝިޕް ރޭހަށް ނުކުމެވަޑައިގަތުމަށް ތައްޔާރަށް ހުންނެވި ކަމަށް މަސްދަރުތަކުން ބުނެ އެވެ. ރޭނާ ވަނީ ދާދި ފަހުން އޭނާގެ މާލީ މުއާމަލާތްތަކަކާ ގުޅޭގޮތުން އުފެދުނު މައްސަލައެއްގައި، ސާޅީސް ހާސް ޕައުންޑުގެ ސްޓޭމްޕް ޑިއުޓީއެއް ދެއްކެވުމުން ޓެކްސް އިދާރާއިން އޭނާ ކުށްވެރިނުވާ ކަމަށް ނިންމާފައިވާ ކަމަށް ވިދާޅުވެފަ އެވެ.
ނަމަވެސް، ޗާންސެލަރ ރޭޗަލް ރީވްސް ބީބީސީއަށް ދެއްވި ބަސްދީގަތުމެއްގައި ވިދާޅުވީ މިވަގުތު ލީޑަޝިޕް ބަދަލުކުރުމުގެ މަސައްކަތެއް ފެށުމަކީ މުޅި ގައުމު ބޮޑު ހައިޖާނެއްގެ ތެރެއަށް ވައްޓާލުން ކަމަށެވެ. ސްޓާމަރގެ ސަރުކާރު ދިފާއުކުރައްވަމުން ރީވްސް ވިދާޅުވީ މިވަގުތަކީ އެތެރޭގެ ކޯޅުންތަކަށްވުރެ ގައުމީ މަސްލަހަތަށް އިސްކަންދޭންޖެހޭ ވަގުތެއް ކަމަށެވެ.
ލޭބަރ ޕާޓީގެ ގަވާއިދު ބުނާގޮތުން ލީޑަޝިޕް ޗެލެންޖެއް ފެށުމަށްޓަކައި ޕާޓީގެ ވަކި އަދަދެއްގެ މެންބަރުންގެ ތާއީދު ބޭނުން ވެ އެވެ. ސްޓްރީޓިންގެ އިސްތިއުފާއާއެކު ސްޓާމަރގެ މަގާމަށް އޮތް ނުރައްކާ ބޮޑުވެފައިވާއިރު، ކުރިއަށް އޮތް ދުވަސްތަކުގައި ޕާޓީގެ އިތުރު އިސް ބޭފުޅުން މިކަމުގައި ގޮތެއް ނިންމަވާނެ ކަމަށް ބެލެވެ އެވެ. މި މައްސަލަ އުފެދިފައިވަނީ އިނގިރޭސިވިލާތުގެ ސިޔާސީ މަސްރަހު ނުތަނަވަސްވެ، ސަރުކާރުގެ ސިޔާސަތުތަކަށް އާންމުންގެ ފާޑުކިޔުން އަމާޒުވެފައިވާ ދަނޑިވަޅެއްގަ އެވެ.
