އަދަދު ނޫހުގެ ސީއީއޯ ހުސެން ފިޔާޒް މޫސާ އަދި އެޑިޓަރު ހަސަން މުހައްމަދާ ދެކޮޅަށް އުފުލާފައިވާ ގަޒުފުކުރުމުގެ ކުށުގެ ދައުވާގެ މައްސަލައިގެ ޝަރީއަތް މިއަދު ފަށައިިފި އެވެ.
މި ޝަރީއަތް ކުރިއަށްގެންދަނީ ސިއްރު ކޮށްގެންނެވެ. މިއަދު މެންދުރު 13:00 އަށް ހަސަން އާއި ފިޔާޒު ކްރިމިނަލް ކޯޓަށް ހާޒިރުވި އެވެ.
މައްސަލައިގެ އަޑުއެހުންތައް ފެށިއިރު ދެން އަޑުއެހުމެއް ބާއްވާނީ ދެ ހަފްތާއެއްހާ ދުވަސް ފަހުން ކަމަށް ވަނީ މައުލޫމާތު ލިބިފަ އެވެ.
މިވަގުތު ވެސް އަދަދު ނޫހުގެ ދެ ނޫސްވެރިޔަކު އަންނަނީ މާފުށީ ޖަލުގައި ހުކުމް ތަންފީޒު ކުރަމުންނެވެ. ސުވާލެއްކޮށްގެން ޝަހުޒާން ޖަލަށްލިއިރު ލީވާން ޖަލަށްލީ ހަބަރެއް ލިޔެގެންނެވެ.
ފިޔާޒު އާއި ހަސަންގެ މައްޗަށް ގަޒްފު ކުރުމުގެ ކުށުގެ ދައުވާ އުފުލި ސަބަބެއް ކަމަށް ބުނެފައި ވަނީ އަދަދުގެ އެޑިޓަރުންގެ ގޮތުގައި ފިޔާޒް އާއި ހަސަން ތިބެ، ރައީސް މުހައްމަދު މުއިއްޒަށް ތުހުމަތުތަކެއް ރައްދުވާ ގޮތަށް ޑޮކިއުމެންޓަރީއެއް ޕަބްލިޝްކޮށްފައިވުމެވެ.
ފިޔާޒު އާއި ހަސަންގެ މައްޗަށް ދައުވާ އުފުލީ "އައިޝާ" ޑޮކިއުމެންޓަރީގެ މައްސަލަ ބަލަން ފެށިތާ 14 ވަނައަށް ވީ ދުވަހެވެ. އެ މައްސަލަ ބަލަން އެންގީ ތުހުމަތުތަކާ ގުޅޭ ގޮތުން އަދަދު އިން ސުވާލު ކުރުމުން ޕްރެސް ކޮންފަރެންސެއްގެ ތެރެއިން ސީދާ މުއިއްޒެވެ.
ހަމަ އެރޭ ފުލުހުން ވަނީ އަދަދުގެ އޮފީހަށް ރެއިޑުކޮށް 20 އިލެކްޓްރޯނިކް ޑިވައިސްއެއް ގެންގޮސްފަ އެވެ. އޭގެ ތެރޭގައި ލެޕްޓޮޕްތަކާއި ހާޑް ޑިސްކު ހިމެނެ އެވެ.
ޖެހިގެން އައި ދުވަހު ފިޔާޒް އާއި ހަސަން ރާއްޖެއިން ބޭރަށް ފުރުން މަނާކޮށް، ތަހުގީގުގެ ބޭނުމަށް ފުލުސް އޮފީހަށް ހާޒިރުކުރި އެވެ. މި މައްސަލައިގައި ހިމެނޭ ރައީސް އޮފީހުގެ ކުރީގެ މުވައްޒަފު ވެސް ފުލުސް އޮފީހަށް ހާޒިރުކޮށް، ނުފުރޭ ގޮތް ހެދި އެވެ.
