އަދަދުގެ ޝަހުޒާން މުހައްދާއި ލީވާން އަލީ ނާސިރް ޖަލަށް ލުމުގެ ބޭނުމަކީ ތަހުގީގީ ނޫސްވެރިކަން ކުށަކަށް ހަދައި އަދަބު ދިނުން ކަމަށް ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ބުނެފި އެވެ.
ދިފާއުވުމުގެ ފުރުސަތު ނުދީ ކްރިމިނަލް ކޯޓުން އިއްޔެ ޝަހުޒާން 15 ދުވަހަށް ޖަލަށް ހުކުމްކުރީ ރައީސް މުހައްމަދު މުއިއްޒުއާ ކުރި ސުވާލަކާ ގުޅިގެންނެވެ. އަދި ލީވާން 10 ދުވަހަށް ޖަލަށް ހުކުމް ކުރީ ކޯޓުގެ އަމުރާ ގުޅޭ ހަބަރެއް އޭނާގެ ނަމުގައި ޝާއިއުކޮށްފައި ވާތީ އެވެ.
"ޝަހްޒާން އާއި ލީވާން ޖަލަށް ލުމަކީ ތަހުގީގީ ނޫސްވެރިކަން ކުށަކަށް ހަދައި އަދަބުދީ، ފާޑުކިޔުންތަކުން ރައީސް ދިފާއުކުރުމަށް ކުރި ކަމެއް،" ސީޕީޖޭ އޭޝިއާ ޕެސިފިކް ޕްރޮގްރާމް ކޯޑިނޭޓަރު ކުނާލް މަޖުމްދަރް ވިދާޅުވި އެވެ.
އެ ދެ ނޫސްވެރިން މިނިވަންކޮށް، ފުލުހުން ގެންގޮސްފައިވާ އަދަދުގެ ތަކެތި އަނބުރާ ރައްދުކުރުމަށާއި. ބިރުވެރިކަމެއް ނެތް މާހައުލެއްގައި ރާއްޖޭގައި ނޫސްވެރިކަން ކުރެވޭނެ މަގުފަހި ކުރުމަށް ވެސް އޭނާ ގޮވާލެއްވި އެވެ.
ނޫސްވެރިންގެ ހައްގުގައި މަސައްކަތް ކުރާ ބައިނަލްއަގްވާމީ ޖަމިއްޔާއިން އިތުރަށް ވަނީ ކޯޓުތައް މެދުވެރިކޮށް އަދަދުގެ ނޫސްވެރިންނަށް ފުރައްސާރަ ކުރުމާއި ބިރުދެއްކުން ހުއްޓާލުމަށް ގޮވާލާފަ އެވެ.
އަދަދުގެ ދެ ނޫސްވެރިންނަށް ވެސް ހުކުމް އިއްވީ ދިފާއުވުމަށް އެކަށީގެންވާ ފުރުސަތު ނުދީ އެވެ. ދެ ނޫސްވެރިންނަށް ވެސް ވަކީލެއް އައްޔަނުކުރުމަށް ދިނި އެންމެ ދެ ގަޑިއިރުގެ މުއްދަތަކެވެ.
ރާއްޖެ އާއި ރާއްޖޭން ބޭރުގެ ފަރާތްތަކުން އަންނަނީ މިއީ ރާއްޖޭގެ ގާނޫނުއަސާސީގައި ނޫސްވެރިކަމުގެ މިނިވަންކަމުގެ ހައްގު ލިޔުނު ފަހުން އައި ކަޅު ދުވަހެއްގެ ގޮތުގައި ސިފަކުރަމުންނެވެ.
