ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުން ނިމުނު ގޮތަށް ރައީސް މުހައްމަދު މުއިއްޒު ސިފައިންގެ މައި މަރުކަޒު، ބަންޑާރަކޮށްޓަށް ވަދެވަޑައިގެންފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އަދަދު ނޫހުގެ މުހައްމަދު ޝަހުޒާން ސުވާލެއް ކުރުމުން މުއިއްޒު ވަނީ ކޯފާވެވަޑައިގެން އެ ބައްދަލުވުމުން ނޫސްވެރިޔާ ބޭރުކޮށްލައިފަ އެވެ.
މުއިއްޒު ބަންޑާރަކޮށްޓަށް ވަދެވަޑައިގެންނެވި މަންޒަރު ފެނުނު މީހަކު މި ނޫހަށް އެކަން ކަށަވަރުކޮށްދިނެވެ. ނަމަވެސް އެމަނިކުފާނު ސިފައިންގެ މައި މަރުކަޒަށް ވަޑައިގެންނެވި ސަބަބެއް އަދި ނޭނގެ އެވެ. ރައީސްގެ ތަރުޖަމާނު މުހައްމަދު ހުސެއިން ޝަރީފްއާ އެކަމާ ގުޅޭ ގޮތުން ސުވާލު ކުރި ނަމަވެސް އޭނާ ޖަވާބެއް ނުދެއްވަ އެވެ.
ޝަހުޒާން ކުރި ސުވާލުގައި އޭނާ އެހީ، ރައީސްއަށް ތުހުމަތު ކުރާ މީހާގެ ފޯނަށް ދަންވަރާއި ފަތިހުގެ ވަގުތުތައް ހިމެނޭ ގޮތަށް އެކި ވަގުތުތަކުގައި ގިނަ ފަހަރު ގުޅުއްވީ ކީއްވެގެންތޯ އެވެ.
ނޫސްވެރިޔާގެ ސުވާލަށް ޖަވާބު ދިނުމުގެ ބަދަލުގައި މުއިއްޒު ވިދާޅުވީ، އެމަނިކުފާނަށް ތުހުމަތު ކުރާ މީހާގެ ބަސް ހިމަނައިގެން އަދަދު ނޫހުން ގެނެސްދިން ޑޮކިއުމެންޓަރީ އާއި ޑޮކިއުމެންޓަރީގެ ވާހަކަ ދެއްކުން މަނާކޮށް ކްރިމިނަލް ކޯޓުން ނެރެފައިވާ އަމުރާ ޝަހުޒާން ހިލާފުވެފައިވާ ކަމަށެވެ.
"މިހާރު ކޯޓުން އެ އޮތީ ގެގް އޯޑާއެއް ނެރެފަ. ޝަހުޒާން ތިވަނީ މިހާރު ކޯޓު އަމުރާ ހިލާފުވެފައި. އެހެންވީމާ އަޅުގަނޑު އެދެނީ ޝަހުޒާން މި މާލަން ދޫކޮށް ވަޑައިގަންނަވަން. ކަނޑައެޅިގެން ދޮގު ވާހަކައެއް، ދޮގު ތުހުމަތެއް އަޅުގަނޑުގެ ބޮލުގައި ތި އަޅުވަނީ،" މުއިއްޒު ވިދާޅުވި އެވެ.
ރައީސް އެހެން ވިދާޅުވުމުން ވެސް ޝަހުޒާން ވަނީ އިތުރު ސުވާލުތަކެއްކޮށްފަ އެވެ. އެކަމަކު އެ ސުވާލުތަކަށް ވެސް މުއިއްޒު ޖަވާބެއް ނުދެއްވަ އެވެ.
"ކަނޑައެޅިގެން ދޮގު ތުހުމަތު އަޅުގަނޑުގެ ބޮލުގައި ތި އަޅުވަނީ. ތިއީ އެއްގޮތަކަށް ވެސް އަޅުގަނޑު ބަލައިގަންނަ ކަމެއް ނޫން. މި މާލަމަކުއެއް ކޯޓު އަމުރަކާ ހިލާފަކަށް ކަންކަމެއް ނުކުރެވޭނެ. ރޫލް އޮފް ލޯ ރައީސް އޮފީހުގެ ތެރޭގައި ހިފެހެއްޓޭނެ،" މުއިއްޒު ވިދާޅުވި އެވެ.
