'އައިޝާ ޑޮކިއުމެންޓަރީ' ދައުރުކުރުން މަނާކޮށް، އެ ޑޮކިއުމަންޓްރީގައި ދައްކާފައިވާ އެއްވެސް ވާހަކައެއް، އެއްވެސް ތަނެއްގައި ނުދެއްކުމަށް އަންގައި ކްރިމިނަލް ކޯޓުން ކޯޓުން ރޭގެ ވަގުތެއްގައި ނެރުނު އަމުރަށް ދިވެހި ހުރިހާ ރައްޔިތުން ތަބާވުމަކީ ލާޒިމު ކަމެއް ކަމަށް މުހައްމަދު މުއިއްޒު ވިދާޅުވެއްޖެ އެވެ.
ކްރިމިނަލް ކޯޓުގެ ގާޒީ މުޒައްމިލު ނާސިރު ނެރުއްވި މި އަމުރުގައި ވަނީ އެ ވީޑިއޯގައި ހިމެނޭ ވާހަކަތައް، އެއްވެސް ފަރާތަކުން ސީދާގޮތުންނާއި ނުސީދާގޮތުން ދެއްކުމަކީ ވެސް މަނާކަމެއްގެ ގޮތުގައި ކަނޑައަޅާފަ އެވެ. އެއީ ޣައިރު ގާނޫނީ އަމުރެއް ކަމަށް ގިނަ ބަޔަކު އަންނަނީ ބުނަމުންނެވެ.
އެ އަމުރާ ގުޅޭގޮތުން މިހާރު ކުރިއަށްދާ ނޫސްވެރިންގެ ބައްދަލުވުމެއްގައި އަމާޒުވިި ސުވާލަކަށް ޖަވާބު ދެއްވަމުން މުއިއްޒު ވަނީ އެއްވެސް ރައްޔިތަކު އެކަމާ ގުޅޭގޮތުން ވާހަކަ ދައްކައިގެން ނުވާނެ ކަމަށް ވިދާޅުވެފަ އެވެ.
“ކޯޓުން ތި އޮތީ ގެގް އޯޑާއެއް ނެރެފައި ތިކަމުގައި ނެރެފައި، އެހެންވީމާ އެ އަމުރަށް ތަބާވުމަކީ ދިވެހި ހުރިހާ ރައްޔިތުންގެ މައްޗަށް ލާޒިމު ކަމެއް، އެއީ އޭގެ ސީދާ ޖަވާބަކީ،”
“އެއީ ގެގް އޯޑާއެއް އޮތް ކަމެއް ވީމައި އެއަކަށް އަޅުގަނޑަކަށް ނުދެވޭނެ، އެއްވެސް ރައްޔިތަކު އެއަކަށް އެއްޗެއް ވިދާޅު ވެގެން ނުވާނެ.“
ހިޔާލު ފާޅުކުރުމުގެ މިނިވަންކަން އެންމެ ފުޅާކޮށް ދީފައި އޮތް ގައުމަކީ ރާއްޖެ ކަމަށް ވިދާޅުވެ މުއިއްޒު ވަނީ ދޮގު ހައްދަވާފަ އެވެ. އަދި ސަރުކާރުން ގާނޫނާ ހިލާފު އެތައް ކަމެއް ކުރަމުން އަންނައިރު ވެސް މުއިއްޒު ވިދާޅުވި ގޮތުގައި ސަރުކާރުން ގާަނޫނުގެ ވެރިިކަން އަންނަނީ ދަމަހައްޓަމުންނެވެ.
“ޔަގީނުން ވެސް ސަރުކާރުން ކުރާ ކަމެއް ނޫން، ތިން ބާރު ވަކިވެފައި އޮންނަނީ، ޝަރުއީ ދާއިރާއިން ކުރާ ކަންކަން ޝަރުއީ ދާއިރާއިން ކުރާނެ،”
ނޫސްވެރިކަމުގެ ފާހަކީ ރައްޔިތުންްގެ އަބުަރަށް އަރައިގަތުމަށް ލިބޭ ލައިސަންސެއް ނޫން ކަމަށް ވިދާޅުވެ ނޫސްވެރިންނަށް މުއިއްޒުގެ ބަހުގެ ހަމަލާއެެއް އަމާޒުކުރެެއްވި އެވެ.ކ
ކްރިމިނަލް ކޯޓުން ނެރުނު އަމުރަކީ ހިޔާލު ފާޅުކުރުމާއި ނޫސްވެރިކަމުގެ މިނިވަންކަމުގެ ހައްގަށް އަރައިގަންނަ އަމުރެއް ކަމަށް ގާނޫނީ ދާއިރާގެ ބޭފުޅުން އަންނަނީ ވިދާޅުވަމުންނެވެ.
އެ ދެ ހައްގަކީ ކުއްލި ނުރައްކަލުގެ ހާލަތުގައި ވެސް ނުހިފެހެއްޓޭ ގޮތަށް ގާނޫނުއަސާސީގައި ލިޔެފައިވާ ހައްގުތަކެކެވެ. އޭގެ އިތުރުން ޣައިރު ގާނޫނީ އަމުރަށް ތަބާނުވުމުގެ ހައްގު ގާނޫނުއަސާސީގެ 64 ވަނަ މާއްދާގެ ދަށުން ދިވެހި ކޮންމެ ރައްޔިތަކަށްމެ ލިބިގެންވެ އެވެ.
އައިޝާ ޑޮކިއުމެންޓްރީ މި ނޫހުން ގެނެސްދިނީ މާޗު 28، ގަ އެވެ.
އެ ޑޮކިއުުމެންޓްރީގައި އިންޓަވިއުދިން އަންހެން މީހާ ވަނީ ރައީސުލްޖުމްހޫރިއްޔާ މުހައްމަދު މުއިއްޒުގެ މައްޗަށް ސީރިއަސް ތުހުމަތުތަކެއް ކޮށްފަ އެވެ. އެ ގޮތުން، ކައިވެނިން ބޭރުން މުއިއްޒު ގުޅުމެއް ބޭއްވި ކަމަށާއި އޭނާއަށް މުއިއްޒު ޖިންސީ ފުރައްސާރަ ކުރި ކަމަށް ވެސް އޭނާ ތުހުމަތު ކޮށްފައިވެ އެވެ.
އެ ޑޮކިއުމެންޓްރީ އާންމުކުރުމުގެ ކުރިން ސަރުކާރުގެ ތަރުޖަމާނާ އެ ތުހުމަތުތަކާ ގުޅޭގޮތުން ސުވާލު ކުރުމުން ވަނީ އެ ތުހުމަތުތައް ދޮގުކުރައްވާފަ އެވެ. އެ ޑޮކިއުމެންޓްރީގައި އެ ޖަވާބު ވެސް ހިމަނާފައިވާނެ އެވެ.
އޭގެ މަހެއްހާ ދުވަސްފަހުން އަދަދު ނޫހުގެ އޮފީސް ރެއިޑުކޮށް ގިނަ އަދަދެއްގެ ސާމާނު ފުލުހުން ގެންދިޔައީ މުއިއްޒުއާ އެ ސުވާލު އަދަދު ނޫހުން ކުރުމުންނެވެ. ރެއިޑުކުރިތާ ދެ ހަފްތާއެއްހާ ދުވަސް ފަހުން ތަހުގީގު ނިންމައި އަދަދުގެ ސީއީއޯ ހުސައިން ފިޔާޒު އާއި އެޑިޓަރު ހަސަން މުހައްމަދުގެ މައްޗަށް ވަނީ ޖިނާއީ ދައުވާ އުފުލާފަ އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ "އައިޝާ" ޑޮކިއުމެންޓަރީގެ މައްސަލަ ބަލަން ފެށިތާ 14 ވަނައަށް ވީ ދުވަހެވެ. އެ މައްސަލަ ބަލަން އެންގީ ތުހުމަތުތަކާ ގުޅޭ ގޮތުން އަދަދު އިން ސުވާލު ކުރުމުން ޕްރެސް ކޮންފަރެންސެއްގެ ތެރެއިން ސީދާ ރައީސް މުއިއްޒެވެ.
ހަމަ އެރޭ ފުލުހުން ވަނީ އަދަދުގެ އޮފީހަށް ރެއިޑުކޮށް 20 އިލެކްޓްރޯނިކް ޑިވައިސްއެއް ގެންގޮސްފަ އެވެ. އޭގެ ތެރޭގައި ލެޕްޓޮޕްތަކާއި ހާޑް ޑިސްކު ހިމެނެ އެވެ.
ޖެހިގެން އައި ދުވަހު ފިޔާޒް އާއި ހަސަން ރާއްޖެއިން ބޭރަށް ފުރުން މަނާކޮށް، ތަހުގީގުގެ ބޭނުމަށް ފުލުސް އޮފީހަށް ހާޒިރުކުރި އެވެ. މި މައްސަލައިގައި ހިމެނޭ ރައީސް އޮފީހުގެ ކުރީގެ މުވައްޒަފު ވެސް ފުލުސް އޮފީހަށް ހާޒިރުކޮށް، ނުފުރޭ ގޮތް ހެދި އެވެ.
ފިޔާޒް އާއި ހަސަންގެ މައްޗަށް ދައުވާ އުފުލާފައި މި ވަނީ ދުނިޔޭގެ ހަތް ޖަމިއްޔާއަކުން ޖިނާއީ ދައުވާތައް އަނބުރާ ގެންދިޔުމަށް ގޮވާލައި، މައްސަލައިގައި ތުހުމަތު ރައްދުވާ ފަރާތުގެ މިނިވަން ތަހުގީގެއް ކުރުމަށް ގޮވާލާފައި ވަނިކޮށެވެ.
