މިއުނިކް (މެއި 10) - ޖަރުމަނު ލީގު ޗެމްޕިއަންކަން ޔަގީންކޮށްފައިވާ ބަޔާން މިއުނިކުން ރޭ ލީގުގައި ކުޅުނު މެޗުގައި މައިކަލް އޮލީސޭ ކާމިޔާބުކުރި ހަމައެކަނި ގޯލުން 1-0 އިން ވުލްފްސްބާގް އަތުން މޮޅުވެއްޖެ އެވެ.
ވިންސެންޓް ކޮމްޕެނީގެ ކޯޗުކަމުގައި ކުޅޭ ބަޔާން މިއުނިކުން ވަނީ ލީގުގައި ބާކީ ހަތަރު މެޗު އޮއްވައި، އެ ކްލަބްގެ ތާރީހުގައި 35 ވަނަ ފަހަރަށް ލީގު ހޯދައިފަ އެވެ. ރޭގެ ނަތީޖާއާ އެކު، ޖަރުމަނު ލީގުގެ އެއް ވަނައިގައި ބަޔާން އޮތީ 33 މެޗުން 86 ޕޮއިންޓާ އެކު އެވެ. ދެ ވަނައިގައި އޮތް ބޮރޫޝިއާ ޑޯޓްމަންޑަށް ވަނީ 33 މެޗުން 70 ޕޮއިންޓް ލިބިފަ އެވެ.
ވުލްފްސްބާގުގެ ދަނޑުގައި ރޭ ކުޅުނު މެޗުގައި، އެ ޓީމުގެ ވިނީޝިއުސް ސޫޒާ ކުރި އެޓޭކެއް ބަޔާންގެ ކީޕަރު ޖޮނަސް އުރްބިގް ވަނީ މަތަކޮށްފަ އެވެ. ބަޔާނުގެ ޖަމާލް މުސިއާލާ، ވުލްފްސްބާގް އޭރިއާތެރެއިން ފޮނުވާލި ބާރު ޝޮޓް، ވުލްްފްސްބާގްގެ ކީޕަރު، ކަަމިލް ގްރަބާރާ ވަނީ މަތަކޮށްފަ އެވެ.
ބަޔާނުގެ އޮލީސޭ އަށް މެޗުގެ 32 ވަނަ މިނިޓްގައި ވުލްފްސްބާގުގެ ކޮންސްޓަންޓީނޯސް ކުލިއެރަކިސް ކުރި ފައުލަކަށް ދިން ޕެނަލްޓީން ހެރީ ކޭން ފޮނުވާލި ބޯޅަ ގޯލާ ސީދާ ވާގޮތެއް ނުވި އެވެ. އެންމެ ފަހުން ނުވަ ޕެނަލްޓީ ކާމިޔާބުކުރި ނަމަވެސް ކޭން މި ފަހަރު ފޮނުވާލި ބޯޅަ ގޯލަށް އަމާޒެއް ނުވި އެވެ.
އޭގެ ފަހުން، ވުލްފްސްބާގުގެ ކްރިސްޓިއަން އެރިކްސަން އާއި ޑެނިސް ވާވްރޯ އަށް ލިބުނު ފުރުސަތުތަކުގައި ވެސް ގޯލެއް ޖެހޭގޮތެއްނުވި އެވެ.
މެޗުގެ ހަމައެކަނި ގޯލު ބަޔާނުން ކާމިޔާބުކުރީ ދެ ވަނަ ހާފުގެ 10 މިނިޓް ހިނގި ފަހުންނެވެ. އެ ގޮތުން، މެޗުގެ 55 ވަނަ މިނިޓްގައި އަރިމަތިން އޮލީސޭ އަށް ލިބުނު ބޯޅަ، އޭރިއާ ރޮނގުމަތީގައި ހުރެފައި ފޮނުވާލިއިރު، ގޯލުގެ ދުރު ކަނަށް އަމާޒުވީ ވުލްފްސްބާގުގެ ކީޕަރު، ގްރަބާރާ އަތްމަތިން ގޮހެވެ.
ވުލްފްސްބާގަށް މެޗުގެ ނަތީޖާ ހަމަހަމަކުރަން ރަނުގެ ފުރުސަތެއް ލިބުނެވެ. އެ ގޮތުން، މުޅިން ހުސްކޮށް އޭރިއާތެރެއިން ލިބުނު ފުރުސަތުގައި، އެ ޓީމުގެ މަޓިއަސް ސްވެންބާގް ފޮނުވާލި ޝޮޓް އަމާޒުވީ ގޯލުގެ ދަނޑިއަށެވެ.
