ހޯމް މިނިސްޓަރު އަލީ އިހުސާން އާއި ޕޮލިސް ކޮމިޝަނަރު އަހުމަދު މުހައްމަދު (ޓޫފޯ) މިއަދުގެ ވަގުތެއްގައި ރައީސް މުހައްމަދު މުއިއްޒު ދިރިއުއްވާ މުލީއާގެއަށް ވަޑައިގެންފި އެވެ.
އިހުސާން އާއި ޓޫފޯ މުލީއާގެއަށް ވަޑައިގެންފައި މި ވަނީ، ރައީސް އޮފީހުގެ ކުރީގެ މުވައްޒަފަކު ރައީސް މުހައްމަދު މުއިއްޒުގެ ސީރިއަސް ޖިންސީ ތުހުމަތުތަކެއް އަމާޒު ކުރި މައްސަލަ ފުލުހުން ތަހުގީގު ކުރަމުންދަނިކޮށެވެ.
ހޯމް މިނިސްޓަރާއި ޕޮލިސް ކޮމިޝަނަރު މުލީއާގެއަށް ވަޑައިގެންނެވި ސަބަބު ހޯދަން މި ނޫހުން ފުލުހުންގެ މީޑިއާ ޑިޕާޓްމަންޓަށް ގުޅުމުން އެ ސުވާލަށް މިވަގުތު ޖަވާބެއް ލިބިފައެއް ނުވެ އެވެ.
އެ ވާހަކަތައް އާންމުންނާ ހަމައަށް ތިލަވެފައި ވަނީ އަދަދު ނޫހުން ގެނެސްދިން "އައިޝާ" ޑޮކިއުމެންޓަރީންނެވެ. އެ މައްސަލަ ފުލުހުން ތަހުގީގު ކުރަން ފެށީ އޭގެ މަހެއްހާ ދުވަސް ފަހުން މުއިއްޒުގެ އޯޑަރަށެވެ.
ފުލުހުން ބަލަނީ އަދަދު ނޫހުގެ މައްސަލަ އާއި މުއިއްޒަށް އަމާޒުކޮށް ތުހުމަތު ކުރި ރައީސް އޮފީހުގެ ކުރީގެ މުވައްޒަފުގެ މައްސަލަ އެވެ. އޭނާ އިއްޔެ ފުލުހަށް ހާޒިރުކޮށް ބަޔާނެއް ނަގާފައިވެ އެވެ. އެކަމަކު، ކަން ހިނގައިދިޔަ ގޮތް ކިޔައިދިނުމުގެ ފުރުސަތު ފުލުހުން އޭނާއަކަށް ނުދެ އެވެ.
އެ މައްސަލަ ތަހުގީގު ކުރަން ރައީސް އަމުރު ކުރެއްވީ ރައީސް އޮފީހުގެ ކުރީގެ މުވައްޒަފު ކުރާ ތުހުމަތުތަކާ ގުޅޭ ގޮތުން ނޫސްވެރިންގެ ބައްދަލުވުމެއްގައި މި ނޫހުގެ މުހައްމަދު ޝަހުޒާން ސުވާލު ކުރުމުންނެވެ. މައްސަލަ ބަލަން އަމުރު ކުރިތާ 12 ގަޑިއިރުގެ ތެރޭގައި ފުލުހުން ވަނީ އަދަދު ނޫހުގެ އޮފީސް ރެއިޑުކޮށްފަ އެވެ.
"އާދެ، ކަނޑައެޅިގެން ދޮގު ވާހަކައެއް ތިއީ އިނގޭތޯ. އަދަދު ނޫހުން ތި ވިދާޅުވީ ތިބޭފުޅުން ހެއްދެވި ވީޑިއޯގެ ވާހަކަ. އެހެންވީމަ ކަނޑައެޅިގެން ދޮގު ވާހަކަ ހިމެނޭ ގޮތަށް ތިބޭފުޅުން ވީޑިއޯއެއް ހެއްދެވި ހެއްދެވުމަށް ތި އިއުތިރާފުވަޑައިގެންނެވީ. މިފަދަ ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް އަޅުގަނޑު ދައުވާ ކުރަން އެދެން ކަމާބެހޭ ހުރިހާ ފަރާތްތަކުގެ ކިބައިން،" މުއިއްޒު ވިދާޅުވި އެވެ.
އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
