ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ސުޖާއުގެ "އޮފިޝަލް އިވެންޓްސް" ގެ މުދާތަކެއް ޕަބްލިކް ސާވިސް މީޑިއާގެ ދެ އިމާރާތެއްގައި ގުދަން ކުރާ މައްސަލައެއް ފެންމަތިވެއްޖެ އެވެ.
ސުޖާއުގެ ކުންފުނީގެ ވަރަށް ގިނަ މުދާ ޓީވީ މޯލްޑިވްސްގެ އިމާރާތް އަދި ދިވެހިރާއްޖޭގެ އަޑުގެ އިމާރާތުގައި ގުދަންކޮށްފައި ހުރި ތަނުގެ ފޮޓޯތަކެއް އަދަދު އަށް ވަނީ ލިބިފަ އެވެ. އަދި އެއީ ސުޖާއުގެ ކުންފުނީގެ މުދާތަކެއްކަން މި ނޫހުން ވާނީ ކަށަވަރުކޮށްފަ އެވެ.
ސުޖާއުގެ އަމިއްލަ ކުންފުނީގެ މުދާ ޕީއެސްއެމްގައި ގުދަން ކުރާތާ އެއް އަހަރު ވެދާނެ ކަމަށް މި ނޫހާ ވާހަކަ ދެއްކި ޕީއެސްއެމްގެ މުވައްޒަފަކު ބުންޏެވެ. އަދި މީގެ ފަސް ވަރަކަށް މަސްދުވަސް ކުރިން ސުޖާއުގެ އިތުރު މުދާތަކެއް ވެސް ޕީއެސްއެމްގެ އިމާރާތަކަށް ގެނައި ކަމަށް އޭނާ ބުންޏެވެ.
ޕީއެސްއެމްގެ އިމާރާތްތަކުގައި ގުދަންކޮށްފައި ހުރި މުދަލުގެ ތެރޭގައި ލައިޓިންއަށް ބޭނުން ކުރާ ސާމާނާއި ގޮނޑި މޭޒާއި އިވެންޓު ތައްޔާރު ކުރަން ބޭނުންވާ އެހެނިހެން ސާމާނު ހިމެނެ އެވެ.
ސުޖާއުގެ ކުންފުނީގެ ޝެއާހޯލްޑަރުންގެ ތެރޭގައި ހިމެނޭ އަހުމަދު އަދުހަމްއަކީ ޕީއެސްއެމްގެ ބޯޑު މެންބަރެކެވެ. އޮފިޝަލް އިވެންޓުގެ އެއްވެސް މުދަލެއް ޕީއެސްއެމްގައި ގުދަންކޮށްފައި ނުހުންނާނެ ކަމަށް މި ނޫހާ ވާހަކަ ދައްކަވަމުން ސުޖާއު އަދި އަދުހަމް ވިދާޅުވި އެވެ.
އެކަމާ ގުޅިގެން މި ނޫހުން ޕީއެސްއެމްގެ މެނޭޖިން ޑައިރެކްޓަރު އަހުމަދު ޝަކީބު (ޝަކީއްބެ) އަށް ގުޅުމުން އޭނާ ވިދާޅުވީ އަމިއްލަ ކުންފުންޏެއްގެ ސާމާނު ޕީއެސްގެ އިމާރާތެއްގައި ހުރިކަން އޭނާއަށް އެނގިވަޑައިނުގަންނަވާ ކަމަށެވެ.
